Rot Bilong Famili i Ken Stap Amamas

Redim Ol Tineja Long Kamap Man o Meri i Bikpela Pinis

“Mi save toktok gut wantaim ol pikinini man bilong mi. Ol i save putim gut yau long tok mi mekim, na kwiktaim ol i bihainim. Tasol nau ol i tineja, na mipela i kros long olgeta samting. Na ol i no laikim ol samting bilong lotu mipela i save mekim. Ol i askim: ‘Bilong wanem yumi mas toktok long Baibel?’ Paslain long ol pikinini man bilong mi i kamap tineja, mi no bin ting dispela samting bai kamap long famili​​—maski mi save dispela samting i save kamap long ol narapela.”​​—Reggie.a

YU MEKIM bikpela long wanpela tineja? Sapos olsem, yu lukim wanpela haptaim we bikpela senis i kamap long laip bilong pikinini bilong yu. Dispela haptaim inap givim hevi tu long yu. Olsem wanem? Ol samting i stap daunbilo i bin painim yu tu?

▪ Taim pikinini man bilong yu i liklik, em i olsem wanpela bot ol i pasim long bris​—em yu. Nau olsem wanpela tineja, em i pulim strong dispela rop na em i laik seil i go, na yu pilim olsem em i no laik bai yu go wantaim em.

▪ Taim pikinini meri bilong yu i liklik, em i save tokim yu long olgeta samting. Nau olsem wanpela tineja, em yet i makim ol pren em i laik toktok wantaim ol na yu pilim olsem yu no wanpela bilong ol dispela pren.

Sapos kain samting olsem i kamap long famili bilong yu, no ken hariap na kisim tingting olsem pikinini bilong yu i bikhet na em i no inap senis. Orait wanem samting i wok long kamap long em? Bilong bekim dispela askim, yumi ken skelim bikpela samting em dispela haptaim olsem tineja i mekim long pikinini bilong yu.

Haptaim Olsem Tineja ​—Em i Bikpela Samting

Kirap long taim pikinini i bon na i kam, i gat planti samting em bai mekim namba wan taim, olsem wokabaut namba wan taim, toktok namba wan taim, namba wan de bilong i go long skul, na ol kain samting olsem. Ol papamama i save amamas taim pikinini bilong ol i kirap mekim olsem. Dispela ol samting pikinini i mekim i kamapim klia samting em papamama i amamas long save long en​​—em i wok long kamap bikpela.

Kamap tineja, dispela tu em i wanpela bikpela samting​​—maski papamama i pilim olsem dispela haptaim i gat hatwok bilong en. I stret ol i tingting planti long dispela samting. I no gat wanpela papa o mama bai amamas long lukim pikinini bilong em husat i save bihainim gut tok i kamap wanpela tineja husat i laik bihainim laik na tingting bilong em yet tasol. Tasol haptaim olsem tineja em i wanpela bikpela samting long laip bilong pikinini. Olsem wanem em i bikpela samting?

Baibel i tok “man i save lusim papamama.” (Stat 2:24) Bikpela samting bilong haptaim olsem tineja, em bilong redim pikinini bilong yu long dispela taim we em bai lusim famili. Long dispela taim, pikinini bilong yu inap long mekim dispela tok olsem aposel Pol i mekim: “Taim mi stap pikinini yet, save bilong mi i olsem save bilong ol pikinini, na mi save tingting na toktok long pasin bilong pikinini. Tasol taim mi kamap bikpela pinis, mi lusim ol pasin bilong pikinini.”​—1 Korin 13:11.

Em samting pikinini man o pikinini meri bilong yu i mekim taim em i tineja​—em i wok long lusim pasin bilong pikinini na lain long kamap yangpela man o meri husat i gat tingting olsem bilong bikpela man na em inap lukautim em yet taim em i lusim famili. Wanpela wok painimaut i tok dispela haptaim olsem tineja, em taim we tineja i wok long redi long lusim papamama.

Sapos nau yu tingim olsem liklik pikinini man o pikinini meri bilong yu bai i lusim yu, dispela inap mekim yu tingting planti. Ating yu laik save:

▪ “Sapos pikinini man bilong mi i no save mekim rum bilong em i stap klin, orait olsem wanem em bai lukautim gut haus bilong em yet?”

▪ “Sapos pikinini meri bilong mi i no save kam bek long haus long taim stret mipela i makim, olsem wanem em inap kisim na holim wanpela wok?”

Sapos yu gat wankain tingting, tingim dispela: Bilong pikinini i ken kisim ol pasin we inap helpim em long bosim wokabaut bilong em yet, dispela i no olsem wanpela dua em i go insait long en na i kamap wantu long hapsait, nogat, em i olsem wanpela rot em i mas wokabaut long en inap planti yia. Tasol long nau yet yu luksave olsem “ol pikinini i save mekim olkain longlong pasin.”​—Sindaun 22:15.

Taim pikinini bilong yu i kisim ol tok i stret bilong stiaim em, em bai kamap wanpela gutpela man o meri i bikpela pinis na em inap “skelim wanem ol pasin i gutpela na wanem ol pasin i nogut, na nau [em] i save gut pinis na tingting bilong [em] i klia.”​—Hibru 5:14.

Rot Bilong Mekim Samting i Kamap Gutpela

Bilong helpim tineja bilong yu long kamap man o meri i bikpela pinis, yu mas helpim em long wokim gut “tingting” na bai em inap long wokim ol gutpela disisen bilong em yet. (Rom 12:​1, 2) Ol stiatok bilong Baibel i stap daunbilo bai helpim yu long mekim olsem.

Filipai 4:5: “Larim ol i lukim dispela gutpela pasin bilong yupela.” Tineja bilong yu i askim yu long surikim taim yu bin makim bilong em long kam bek long haus. Wantu tasol yu tok nogat. Tineja bilong yu i tok, “Yu wok long mekim pasin long mi olsem mi wanpela liklik pikinini!” Paslain long yu bekim tok olsem, “Yu wok long mekim pasin olsem liklik pikinini,” tingim dispela samting: Ol tineja i laikim planti tumas fridom, tasol ating papamama i givim fridom i aninit long mak i stret long pikinini i mas kisim. Yu ting sampela taim yu inap givim sampela moa fridom long pikinini bilong yu? Em bai gutpela sapos yu tingim tingting bilong tineja bilong yu.

TRAIM MEKIM OLSEM: Raitim wanpela o tupela samting we yu inap givim sampela moa fridom long pikinini bilong yu long en. Tokim em olsem yu bai givim dispela fridom long em inap sotpela taim bilong painimaut olsem em bai mekim gutpela wok long en o nogat. Sapos em i mekim gutpela wok long en, orait yu bai givim sampela fridom moa long em. Sapos em i no mekim olsem, orait yu bai rausim dispela fridom em i holim pinis.​​—Matyu 25:21.

Kolosi 3:​21: “Yupela papa, yupela i no ken mekim ol pikinini bilong yupela i kros, nogut ol i pilim olsem ol i no inap mekim wanpela gutpela wok.” Sampela papamama i save traim long bosim olgeta liklik liklik samting em pikinini bilong ol i mekim. Ol i makim ol poroman bilong pikinini na ol i save hait na harim tok em i mekim long telefon. Tasol ol dispela pasin inap kamapim samting nogut. Pasin bilong bosim strong pikinini inap mekim na em bai i gat laik long ranawe; pasin bilong tok planti taim olsem ol pren bilong em i no gutpela, dispela inap mekim na em i laikim ol moa yet; pasin bilong hait na harim toktok em i mekim long telefon, dispela inap kirapim em long toktok wantaim ol pren bilong em long pasin hait. Sapos yu strong tumas long bosim em, ating em bai strong long sakim yu. Tru tumas, sapos pikinini bilong yu i no lain long mekim ol disisen bilong em yet taim em i stap wantaim famili, em bai hatwok long wokim ol disisen bilong em yet taim em i lusim famili.

TRAIM MEKIM OLSEM: Narapela taim yu toktok wantaim tineja bilong yu long wanpela samting, helpim em long wokim tingting olsem ol disisen em i wokim inap mekim sampela samting long pasin bilong em. Olsem, no ken tok ol pren bilong em ol i no gutpela, yu ken tok: “Olsem wanem sapos [kolim nem] i brukim lo na ol i arestim em? Ol man bai ting wanem long yu?” Helpim tineja bilong yu long luksave olsem disisen em i mekim inap mekim em i kisim gutnem o bagarapim gutnem bilong em.​​—Sindaun 11:​17, 22; 20:11.

Efesus 6:4 i tok: “Yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas . . . stretim gut ol pikinini bilong yupela na skulim ol long tok bilong Bikpela.” Dispela tok “skulim ol” i no makim tasol pasin bilong givim save long ol, nogat. Yu laik bai tok yu skulim pikinini long en i mas stret wantaim tingting bilong pikinini long stretpela pasin na bai dispela i ken stiaim pasin bilong em. Dispela em i bikpela samting taim pikinini bilong yu i kamap wanpela tineja. Andre, em wanpela papa, em i tok: “Taim pikinini bilong yu i kamap bikpela, yu mas senisim pasin bilong yu long toktok na helpim em long wokim tingting.”​​—2 Timoti 3:​14.

TRAIM MEKIM OLSEM: Taim yupela i mas toktok long wanpela samting, traim mekim olsem yu pikinini na nau em i mas kamap olsem papa o mama na bekim askim bilong yu. Askim em long em bai givim wanem tok long yu sapos yu pikinini bilong em. Askim em long mekim wok painimaut long ol tok em bai kamapim bilong sapotim tingting bilong em. Stori gen wantaim em long dispela samting insait long dispela wik yet.

Galesia 6:7: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” Yu ken skulim pikinini long rot bilong panismen​​—olsem salim em i go long rum bilong em o pasim em long mekim wanpela samting em i save laik long mekim. Tasol long tineja, i gutpela yu larim em i karim hevi bilong pasin em i mekim.​​—Sindaun 6:​27.

TRAIM MEKIM OLSEM: No ken helpim em long bekim ol dinau bilong em o mekim ol eskius long tisa bilong em taim em i no kisim gutpela mak long skul. Larim em i karim hevi bilong pasin em i mekim, dispela skul bai i stap longpela taim wantaim em.

Olsem wanpela papa o mama, ating yu laik bai dispela haptaim pikinini i stap olsem tineja i no ken givim hatwok long pikinini bilong yu na bai isi tasol em i ken kisim ol pasin bilong man o meri i bikpela pinis. Tasol wan wan taim tasol kain samting olsem inap kamap. Dispela haptaim i givim gutpela rot long yu long “skulim pikinini bilong yu long bihainim gutpela pasin.” (Sindaun 22:6) Ol stiatok bilong Baibel i mas i stap olsem as bilong amamas yupela i kisim insait long famili bilong yupela.

[Futnot]

[Piksa long pes 12]

ASKIM YU YET . . .

Taim tineja bilong mi i lusim haus, em inap long mekim ol dispela samting?

▪ mekim ol wok bilong lotu

▪ mekim ol gutpela disisen

▪ toktok gut wantaim ol narapela

▪ lukautim gut helt bilong em yet

▪ bosim gut mani

▪ klinim na lukautim gut haus

▪ bel bilong em yet i kirapim em long mekim samting

[Piksa long pes 12]

Sapos pikinini bilong yu i kamapim olsem em i ken bosim gut ol samting em i mekim, inap yu givim sampela moa fridom long em?