Yu Ting God i Save Senisim Tingting Bilong Em?

BAIBEL i tok long God olsem: “Em i no save senisim nabaut pasin bilong en.” Na God yet i tok olsem: “Mi tasol mi Bikpela na mi no save senisim tingting bilong mi.” (Jems 1:17; Malakai 3:6) God Jehova i narapela kain tru long ol man em yumi hatwok long amamasim ol na bilip long ol, long wanem, oltaim ol i save senisim tingting bilong ol!

Tasol sampela man bilong ritim Baibel ol i ting olsem God i bin senisim tingting bilong em. Olsem, long bipo God Jehova i bin givim strong long ol Kristen long wokim ol mirakel, tasol long nau, nogat. Long bipo, God i bin larim ol man i maritim planti meri, tasol long nau em i no orait long dispela pasin. Aninit long Lo Bilong Moses, Jehova i tok ol man i mas bihainim Sabat, tasol long nau, nogat. Olsem wanem? Ol dispela samting i soim olsem tingting bilong God i bin senis?

Namba wan samting, yumi ken bilip tru olsem God i no save senisim ol lo bilong em bilong pasin laikim na stretpela pasin. Na samting em “bipo yet God i tingting long mekim,” olsem blesim ol lain manmeri long rot bilong Kingdom bilong em, dispela tu i no bin senis. (Efesus 3:11) Tasol Jehova i save senisim tingting bilong em taim sampela senis i kamap, wankain olsem yu inap senisim tingting bilong yu long wanpela man sapos planti taim em i bagarapim bel bilong yu.

God i save senisim tu ol tok em i givim long lain bilong em na bai dispela tok i stret long i stap bilong ol na ol samting ol i mas kisim. Yumi no ken kirap nogut long dispela. Tingim samting wanpela man bilong kisim ol turis i go raun bai mekim taim em i lukim olsem hevi i laik kamap. Em bai tokim ol turis long bihainim narapela rot, longwe long hap we hevi i laik kamap. Tasol dispela i no makim olsem em i senisim tingting bilong em long hap em bai kisim ol turis i go long en, nogat. Olsem na gutpela sapos yumi skelim dispela tripela samting yumi kolim pinis, em sampela i save tingting planti long en.

Bilong Wanem Ol Mirakel i Pinis?

Bilong wanem God i givim strong long sampela long mekim ol mirakel long taim bilong ol Kristen bilong bipo? Ating yu save olsem taim lain Israel i stap olsem lain bilong God, planti taim long rot bilong ol mirakel God i soim long ol olsem em i stap wantaim ol. Long rot bilong Moses, God i mekim wok long bikpela strong bilong em long helpim ol Israel long lusim Isip, na em i soim rot long ol long ples drai nating i go inap long Graun Bilong Promis. Tasol sori tru, planti taim tru ol Israel i no bilip long em. Taim Jehova i sakim lain Israel na kamapim kongrigesen Kristen, em i givim strong long ol aposel na sampela narapela long wokim ol mirakel. Olsem, aposel Pita na aposel Jon i oraitim wanpela man i lek nogut pinis taim mama i karim em, na Pol i kirapim bek wanpela man i dai pinis. (Aposel 3:​2-8; 20:​9-11) Ol mirakel ol i wokim i helpim lotu Kristen long i go long planti kantri. Orait, bilong wanem pasin bilong wokim ol mirakel i pinis?

Aposel Pol i mekim tok piksa: “Taim mi stap pikinini yet, save bilong mi i olsem save bilong ol pikinini, na mi save tingting na toktok long pasin bilong pikinini. Tasol taim mi kamap bikpela pinis, mi lusim ol pasin bilong pikinini.” (1 Korin 13:11) Ol papamama i no save mekim wankain pasin long liklik pikinini olsem ol i save mekim long pikinini man i bikpela pinis, na olsem tasol pasin Jehova i mekim long kongrigesen Kristen i senis taim kongrigesen i no olsem “pikinini” moa. Aposel Pol i tok ol presen bilong wokim ol mirakel, olsem mekim kain kain tok ples o mekim tok profet, ‘em bai i pinis.’​—1 Korin 13:8.

Bilong Wanem God i Bin Larim Ol Man i Maritim Planti Meri?

Jisas i tok God i kamapim lo bilong marit taim Em i tokim namba wan man na meri olsem: “Man i save lusim papamama na i pas wantaim meri bilong en, na tupela i kamap wanpela bodi tasol.” (Matyu 19:5) Marit em bilong tupela man na meri i stap wantaim inap oltaim. Tasol taim God i mekim ol Israel i kamap wanpela lain na givim Lo long ol, planti man i kisim pinis pasin bilong maritim planti meri. Olsem na maski God i no as bilong dispela pasin na em i no kirapim ol man long maritim planti meri, em i kamapim ol lo bilong bosim dispela pasin. Taim kongrigesen Kristen i kamap, Baibel i tambuim pasin bilong maritim planti meri.​—1 Timoti 3:2.

God Jehova i save larim ol man i mekim sampela samting i go inap long em i taim bilong em long stretim dispela samting. (Rom 9:​22-24) Jisas i soim olsem inap sampela haptaim Jehova i bin “larim” ol Israel i bihainim ol pasin i no stret long ol samting bilong marit, long wanem, ol i “man bilong bikhet.”​—Matyu 19:8; Sindaun 4:​18, 19.

Bilong Wanem Sabat i Bin Stap Inap Sampela Haptaim Tasol?

Taim God i kisim bek lain Israel long Isip, em i bin kamapim pasin bilong mekim Sabat long olgeta wik. Bihain em i mekim dispela i kamap wanpela hap bilong Lo bilong ol. (Kisim Bek 16:​22-30; 20:​8-10) Aposel Pol i tok olsem Jisas i bin givim em yet olsem ofa na i “rausim . . . lo bilong Moses wantaim olgeta hap tok na olgeta lo bilong en” na em i “rausim olgeta dispela tok bilong kotim yumi.” (Efesus 2:15; Kolosi 2:14) Samting em i “rausim” i gat lo bilong Sabat insait long en, olsem Baibel i kamapim klia na i tok: “Olsem na yupela i no ken larim wanpela man i sutim tok long yupela, na tok yupela i no bihainim ol lo bilong kaikai na dring na ol lo bilong ol bikpela de bilong lotu na bilong ol lotu bilong nupela mun na bilong de Sabat.” (Kolosi 2:16) Bilong wanem God i bin givim Lo, na lo bilong Sabat tu?

Aposel Pol i tok: “Lo i stap olsem waspapa bilong yumi, bilong bringim yumi i kam long Krais.” Na em i tok moa: “Nau taim bilong bilip i kamap pinis, na yumi no i stap aninit long dispela waspapa moa.” (Galesia 3:​24, 25) God i no senisim tingting bilong em, nogat, em i kamapim Sabat bilong skulim ol manmeri olsem ol i mas lusim hap taim bilong tingim ol tok bilong God. Tru, lo bilong Sabat i bin stap inap sampela haptaim tasol, tasol dispela lo i makim taim bai kamap bihain we ol lain man bai kisim malolo long olgeta kain hevi bilong skin na spirit.​—Hibru 4:10; KTH 21:​1-4.

God i Gat Pasin Laikim na Yumi Inap Bilip Long Em

Ol stori bilong Baibel em yumi skelim pinis, i soim olsem God Jehova i bin givim ol narapela narapela tok na lo long narapela narapela taim. Tasol dispela i no makim olsem em i bin senisim tingting bilong em, nogat. Em i bin mekim ol samting i stret wantaim ol samting lain bilong em i mas kisim long narapela narapela taim, na em i mekim dispela samting bilong helpim ol. Em i save mekim wankain long nau tu.

Jehova i no save senisim ol lo bilong em, olsem na oltaim yumi ken save long ol samting yumi mas mekim bilong amamasim em. Na tu, yumi ken bilip tru olsem olgeta samting God i bin promis long mekim em bai kamap tru. Jehova i tok: “Sapos mi laik mekim wanpela samting, orait mi save mekim tasol. . . . Ol samting mi makim pinis bilong mekim, em bai mi mekim.”​—Aisaia 46:​10, 11.

[Rait long pes 21]

God i no save senisim ol lo bilong em bilong pasin laikim na stretpela pasin

[Rait long pes 22]

Pol i tok ol presen bilong wokim ol mirakel ‘em bai i pinis’

[Rait long pes 23]

Marit em bilong tupela man na meri i stap wantaim inap oltaim