Rot Bilong Kliagut Long Ol Tok Bilong Baibel

1. Askim God Long Helpim Yu

Ninfa bilong Itali i tok: “Bipo, paslain long mi slip, mi save ritim Baibel. Mi mekim olsem, long wanem, mi save olsem Baibel em i Tok Bilong God, na maski mi no save amamas long rit, mi laik save long ol tok em God i bin kirapim ol man long raitim long Baibel. Mi laik ritim Baibel olgeta. Pastaim mi no hatwok long ritim, tasol bihain mi kamap long ol tok i hatwok tru long kisimgut, na mi no ritim moa.”

OLSEM WANEM? Kain samting olsem i bin painim yu tu? Kain samting olsem i bin painim planti man. Tasol olsem stori i kamap paslain long dispela i kamapim, God Jehova i laik bai yu kliagut long Tok bilong em. Tasol olsem wanem yu inap kliagut long en? Namba wan samting em yu mas askim God long helpim yu.

Ol man i ting ol aposel bilong Jisas ‘i no bin skul na ol i man nating tasol,’ long wanem, ol i no bin skul long ol bikpela skul bilong ol tisa bilong lotu Juda. (Aposel 4:​13) Tasol Jisas i tokim ol aposel olsem i gat rot bilong kliagut long Tok Bilong God. Em i tok: “Helpim tru bilong strongim yupela em i Holi Spirit. Na long nem bilong mi, Papa bai i salim em i kam. Em bai i skulim yupela long olgeta samting.” (Jon 14:26) God i bin yusim holi spirit, olsem strong bilong em, long wokim graun na olgeta samting i gat laip i stap long en. (Stat 1:2) Na tu, em i bin yusim holi spirit long kirapim 40 man long raitim ol tingting bilong em long Baibel. (2 Pita 1:​20, 21) Dispela wankain spirit i stap yet bilong helpim ol man i gat laik long kliagut long ol tok bilong Baibel.

Olsem wanem yu inap kisim holi spirit bilong God? Yu mas bilip na askim God long givim long yu. Na ating yu mas askim planti taim. Jisas i tok: “Yupela i mas [wok long] prea na askim God long givim ol samting long yupela, na em bai i givim long yupela. . . . Yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Luk 11:​9, 13) Jehova bai amamas long givim holi spirit long ol man i gat gutpela bel na i askim em long en. Dispela strong inap helpim yu long kliagut long ol tok ol man i bin raitim long Baibel inap planti tausen yia i go pinis. Na spirit bilong God inap helpim yu long save long olsem wanem yu inap bihainim ol tok bilong Baibel long laip bilong yu.​​—Hibru 4:​12; Jems 1:​5, 6.

Olsem na olgeta taim yu ritim Baibel, beten askim God long holi spirit i ken helpim yu long kliagut long Tok bilong em.