Yu Ting Mani Em As Bilong Amamas Tru?

MAMA i karim Sonia long Spen. Taim em i liklik, em i save go wantaim mama bilong em long ol miting bilong ol Witnes Bilong Jehova. Tasol taim em i kamap bikpela, em i go sindaun long London, Inglan, na bihain em i kirap wok long wanpela fainens kampani we ol bikpela bisnis i save investim mani bilong ol.

Sonia i laikim tru dispela wok na em i save kisim bikpela pe. Em i save lukautim bikpela mani em ol bisnisman i save investim. Em i gat save long mekim gut tru dispela wok na em i kisim bikpela amamas long en. Sonia i save wok inap 18 aua long olgeta wan wan de, na long sampela nait em i save slip 2-pela o 3-pela aua tasol. Dispela wok em nambawan samting long laip bilong em. Tasol bihain liklik, laip bilong em i senis wantu. Sonia i kisim bikpela sik strok​​—ating as bilong dispela em, em i save wok wok tasol na em i no kisim gutpela malolo. Em i gat 30 krismas tasol.

Wanpela sait bodi bilong Sonia i paralais, na ol dokta i no save tumas bai em inap toktok gen o nogat. Kwiktaim mama bilong em i kam long Inglan bilong lukautim em. Taim Sonia i kirap long wokabaut gen, mama i tokim em, “Mi bai go long ol miting bilong kongrigesen na yu bai kam wantaim mi, long wanem, mi no inap lusim yu i stap wanpis.” Sonia i orait long go wantaim mama. Na wanem samting i bin kamap?

Sonia i tok: “Mi luksave olsem olgeta tok mi harim em i trupela tok. Dispela i wanpela gutpela samting tru. Planti i bin tok amamas long mi taim mi go namba wan taim long Haus Kingdom na mi orait long wanpela bilong ol i stadi wantaim mi long Baibel. Ol pren bilong mi long bipo, ol i no visitim mi moa, tasol ol nupela pren bilong mi ol i save laikim mi na mekim gut long mi.”

Isi isi Sonia inap toktok gen, na tu, kwiktaim em i kamap strong long ol samting bilong spirit. Wanpela yia i no pinis yet na em i kisim baptais. Planti nupela pren bilong em i mekim wok Kristen fultaim, na em i lukim olsem ol i stap amamas tru. Sonia i tingting olsem, ‘Mi laik stap olsem tu. Mi laik givim God Jehova olgeta samting mi inap givim!’ Long nau Sonia i mekim wok autim tok fultaim.

Sonia i lainim wanem samting long ekspiriens bilong em? Em i tok: “Maski mi bin kisim bikpela pe tru, wok presa na pasin bilong mi long i no stap bel isi i mekim na mi tingting planti na mi no amamas. Nau mi luksave olsem nambawan bikpela samting long laip bilong mi em long pas gut wantaim Papa bilong mi long heven, em Jehova. Long nau mi stap amamas tru.”

Aposel Pol i tok: “Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.” (1 Timoti 6:​10) Ol samting i bin painim Sonia i mekim na em inap tok dispela tok em tru olgeta.