Ol Man i Askim

Yu Ting Satan i Stap Tru?

Tru tumas, Baibel i tok Satan em wanpela man i stap tru. Tasol ol man bilong sutim tok long Baibel, ol i tok bilas long dispela tok olsem Satan em wanpela man i stap tru. Ol i tok, Satan i makim pasin nogut i stap long bel bilong ol man.

Olsem wanem? Yumi kirap nogut long ol man i paul long Satan em i husat tru? Nogat tru. Yumi ken tok piksa olsem: Wanpela raskol i mekim wanpela rong na em i haitim em yet na bai ol man i no ken save em i husat tru, tasol em i wok yet long mekim ol wok bilong em long pasin hait na ol man i no inap painim em. Na olsem tasol, Satan em wanpela man nogut i save stap long ples hait na i mekim wok bilong em, na i kirapim ol man long insait long pasin nogut. Jisas i kamapim klia olsem Satan em i as bilong olgeta pasin nogut ol man i mekim. Jisas i tok Satan em i “hetman i save bosim dispela graun.”​—Jon 12:31.

Satan i kamap olsem wanem? Pastaim God i bin wokim em olsem wanpela gutpela ensel long heven. Tasol dispela bikhet ensel i kisim strongpela laik olsem ol manmeri i mas lotuim em na ol i no ken lotuim God, olsem na em i kamap Satan. Baibel i stori long Satan i toktok wantaim Jisas hia long graun na Satan i kamapim klia laik bilong em long kisim namba. Em i laik bai Jisas i “brukim skru na lotu” long em.​—Matyu 4:​8, 9.

Na tu, Buk Jop i stori olsem taim Satan i toktok wantaim God, Satan i kamapim klia tingting tru bilong em. Em bai mekim olgeta samting em inap mekim bilong pulim ol manmeri long lusim God.​—Jop 1:​13-19; 2:​7, 8.

Tingim: Sapos Satan i bin toktok wantaim God Jehova na Jisas Krais, orait yu ting Satan i olsem pasin nogut i stap insait long man? I no gat wanpela pasin nogut i stap insait long God na long Pikinini bilong em! Dispela i kamapim klia tru olsem Satan em wanpela man i stap tru​—em wanpela spirit nogut i no gat rispek long Jehova na Jisas.

Ol wok nogut bilong ol man i kamapim klia olsem Satan i stap tru. Ol kantri bilong dispela graun i save larim planti kaikai i sting na bagarap, na planti manmeri ol i stap hangre yet. Ol kantri i wok long bungim ol samting bilong pait em inap bagarapim bikpela lain manmeri. Ol i bagarapim win, wara na ol samting bilong graun. Tasol ol man i no save olsem as bilong ol dispela kain pasin nogut i bilong bagarapim ol yet. Bilong wanem i olsem?

Baibel i kamapim klia olsem Satan i “pasim tingting bilong ol dispela man i no bilip.” (2  Korin 4:4) Bilong stiaim ol manmeri, Satan i mekim wok long wanpela oganaisesen em yumi no inap lukim. Em i “hetman bilong ol spirit nogut.” (Matyu 12:24) Olsem bos bilong wanpela lain raskol i save bosim ol wok samting bilong dispela lain raskol, em i no save kamapim em yet long ol man i mekim wok bilong em, Satan tu i save mekim wok long oganaisesen bilong em, em ol ensel nogut, bilong bosim bikpela lain manmeri em ol i no luksave long wok bilong em.

Yumi ken amamas olsem Baibel i kamapim long ples klia Satan em i husat tru na i kamapim klia oganaisesen bilong em. Olsem na yumi inap mekim ol samting bilong sakim ol wok bilong Satan. Baibel i tokim yumi: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.”​—Jems 4:7.