Famili Lotu​​—Bikpela Samting Long Abrusim Bagarap!

PIKSAIM long tingting dispela “pait long dispela bikpela de bilong God I Gat Olgeta Strong”! (KTH 16:14) Profet Maika i mekim wanpela gutpela tok piksa na i stori olsem: “Ol maunten i kamap olsem wara . . . , olsem kandel i lait na gris bilong en i save kamap wara. Bai ol dispela maunten i kapsait i go daun long ples stret olsem wara i save ran i kam daun long maunten.” (Mai. 1:4) Wanem samting nogut bai painim ol man i no mekim wok bilong Jehova? Baibel i tok: “Long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun.”​—Jer. 25:33.

Ol het bilong famili​—planti em ol papa o mama wanpis​—i mas tingim kain tok lukaut olsem taim ol i tingim ol yangpela pikinini bilong ol em ol i bikpela pinis na ol inap long skelim samting na wokim disisen bilong ol yet, na i gutpela long ol papamama i ken askim ol yet olsem, ‘Ol pikinini bilong mi bai abrusim bagarap long Armagedon o nogat?’ Baibel i tok promis olsem ol inap abrusim bagarap, sapos ol i stap strong long samting bilong spirit na pas gut wantaim Jehova inap long mak bilong krismas bilong ol.​—Mt. 24:21.

Em i Bikpela Samting Long Makim Taim Bilong Mekim Famili Lotu

Yu wanpela papa o mama, olsem na yu mas mekim olgeta samting yu inap mekim bilong lukautim gut ol pikinini “long ai bilong Bikpela, na stretim gut ol . . . na skulim ol long tok bilong Bikpela.” (Ef. 6:4) Pasin bilong stadi long Baibel wantaim ol pikinini bilong yumi em i bikpela samting. Yumi laik bai ol yangpela bilong yumi i kisim wankain pasin bilong ol Kristen long Filipai, em Pol i tok amamas long pasin bilong ol long bihainim tok bilong Jehova. Em i tok: “Ol pren bilong mi, oltaim yupela i save bihainim tok bilong mi, na nau tu yupela i mas mekim olsem. Yupela i no ken bihainim tok long taim mi stap wantaim yupela tasol. Nogat. Nau mi stap longwe, na yupela i mas bihainim gut tru. God i kisim bek yupela pinis, na nau yupela i mas pret na guria na wok strong long kisim tru dispela presen em i makim bilong yupela.”​—Fl. 2:12.

Olsem wanem? Ol pikinini bilong yu i save bihainim ol lo bilong Jehova maski yu no stap wantaim ol? Olsem wanem taim ol i stap long skul? Yu ken mekim wanem bilong helpim ol pikinini long bilip long savetingting i stap long ol lo bilong Jehova, na dispela bai i stiaim ol taim yu no stap wantaim ol?

Famili lotu inap mekim bikpela samting bilong strongim bilip bilong pikinini long bihainim tok bilong Jehova, maski yu no stap wantaim em. Nau bai yumi stori long 3-pela samting bilong helpim yu long mekim Baibel stadi bilong famili i kamap gutpela moa.

Mekim Long Olgeta Taim

Baibel i kamapim olsem God i bin makim taim stret bilong singautim ol pikinini bilong em, em ol ensel, long kam bung. (Jop 1:6) Mekim wankain pasin long ol pikinini bilong yu. Makim wanpela de na taim stret bilong mekim Famili Lotu, na bihainim dispela sediul long olgeta wik. Na tu, yu ken makim wanpela narapela de tu, nogut wanpela hevi i kamap long dispela de bilong mekim Famili Lotu.

Taim ol mun i wok long kamap na i go pinis, yu no ken kisim kain tingting olsem, ‘nau mipela i bisi na neks wik bai mipela i mekim famili stadi,’ nogat. Tingim, em i bikpela samting long stadi wantaim ol pikinini bilong yu. Maski yu mekim olsem, Satan i laik pulim ol bilong bagarapim ol. (1 Pi. 5:8) Sapos yu tromoi nating dispela taim bilong mekim Famili Lotu long lukim televisen o mekim ol narapela samting i no bikpela samting, Satan bai win.​—Ef. 5:​15, 16; 6:12; Fl. 1:10.

Stadi Long Ol Samting Inap Helpim Famili Long Olgeta De

Yupela i ken mekim ol narapela samting tu long Famili Lotu. Traim long mekim ol samting we yupela inap long bihainim. Bai yu mekim olsem wanem? Sampela taim, makim ol tok we i stret long ol hevi em inap painim pikinini long ol de o wik bihain. Olsem: Long taim bilong Famili Lotu, yupela i ken mekim traim tu pasin bilong autim tok. Ol yangpela i save amamas long mekim samting em ol i save gut long mekim. Mekim traim ol pasin bilong autim tok na tingting long ol rot em inap helpim ol long bekim tok bilong man i no laik harim tok, dispela bai strongim ol moa taim ol i mekim ol narapela narapela wok bilong autim tok bilong Kingdom.​—2 Ti. 2:15.

Na tu, yupela i ken mekim traim sampela tok bilong helpim ol pikinini long toktok wantaim ol wanlain i laik grisim ol. Kisim ol tok long sapta 9 bilong buk Sampela Askim Bilong Ol Yangpela​—Ol Gutpela Bekim, Volium 1, na famili i ken toktok wantaim long en. Aninit long liklik het tok “Bai Mi Mekim Wanem?,” long pes 76 na 77, i gat sampela gutpela tok na ol askim em inap helpim ol pikinini bilong yu long redim gut ol tok ol inap bekim long ol wanlain. Yangpela i ken mekim traim ol tok em bai bekim​—wantaim papa, mama, o wanpela pren i strong long samting bilong lotu. Sampela taim yupela i ken mekim dispela pasin i kamap hap pasin bilong Famili Lotu bilong yupela.

Famili lotu i opim rot long ol papamama i ken kamapim klia long ol pikinini olsem ol gutpela samting inap painim ol taim ol i putim ol mak bilong spirit. Bilong helpim ol yangpela, i gat ol gutpela tok i stap long stori “Ol Yangpela i Laik Save . . . Bai Mi Mekim Wanem Long Laip Bilong Mi?,” long Kirap! bilong Oktoba 2006. Taim yupela i stori long dispela, helpim pikinini long luksave olsem man i putim wok bilong Jehova i stap namba wan long laip bilong em, dispela i nambawan gutpela rot long bihainim. Helpim pikinini bilong yu long kisim laik bilong mekim wok painia, wok long Betel, go long Ministerial Trening Skul, o insait long ol narapela wok bilong fultaim sevis.

Tasol was gut: Sampela papamama i laik helpim pikinini na ol i tingting strong long ol gutpela wok samting em ol i laik bai pikinini i kisim, na ol i no laik luksave long ol wok em pikinini i kirap pinis long mekim. Tru, i gutpela long strongim ol pikinini long putim ol gutpela mak olsem wok long Betel na wok misineri. Tasol taim yupela i mekim olsem, was gut, nogut yupela bagarapim bel bilong pikinini long ol mak yupela yet i laik em i mas winim, na yupela i mekim em i bel hevi. (Kl. 3:21) Oltaim yu mas tingim olsem bel bilong pikinini man o pikinini meri yet i mas kirapim em long laikim Jehova​—i no long laik bilong yu na em i mekim. (Mt. 22:37) Olsem na lukim samting em i mekim na tok amamas long em i mekim gut dispela wok, na no ken traim long tingim wok samting em i no mekim. Helpim em long kisim pasin bilong amamas long olgeta wok samting Jehova i bin mekim. Taim yu mekim pinis, orait larim bel bilong em yet i kirapim em long bihainim ol gutpela pasin bilong Jehova.

Amamas Long Mekim Famili Lotu

Namba tri samting bilong mekim Famili Lotu i kamap gutpela moa, em pasin bilong amamas long mekim. Olsem wanem yu inap mekim gut dispela samting? Ating wan wan taim yupela i ken harim wanpela kaset bilong drama bilong Baibel o lukim na stori long wanpela vidio em ol Witnes Bilong Jehova i bin wokim. O yupela i ken ritim wanpela stori bilong Baibel, na makim wan wan long famili long bihainim nek bilong ol narapela narapela man insait long dispela stori.

Long ol nius Wastaua na Kirap! i gat ol narapela narapela stori em ol i gutpela bilong famili i ken mekim stadi long en. Olsem: Yupela i ken toktok wantaim long stori i stap long pes 31 bilong ol Kirap!, nem bilong en “Bai Yu Bekim Olsem Wanem?” Long sampela Wastaua bilong pablik i gat dispela hap stori “Bilong Ol Yangpela Bilong Yumi,” em i olsem wanpela projek bilong ol yangpela i ken wok long en. Na yupela i ken senis na stadi long narapela hap stori bilong ol pikinini nem bilong en “Skulim Ol Pikinini Bilong Yu.”

Ol papamama i gat ol yangpela pikinini, ol bai laikim ol stori i stap long hap bilong “Ol Yangpela i Laik Save” long Kirap!, na tu, long buk Askim Bilong Ol Yangpela, Volium 1. Taim yupela i stadi long dispela buk, mekim tu blok “Toktok Wantaim Long Ol Dispela Askim,” long pinis bilong ol wan wan sapta. No ken mekim olsem riviu tasol. Yupela i ken mekim wok long ol askim long blok olsem autlain bilong famili i ken toktok wantaim.

Tasol was gut, no ken mekim famili stadi i kamap olsem taim bilong sutim kain kain askim long pikinini. Olsem: Papamama i ken kirapim ol yangpela long holim wanpela notbuk na raitim tingting bilong ol long ol i pilim olsem wanem long samting em famili i stadi long en, na olsem wanem ol i ken bihainim. Tasol no ken subim em long ritim strong ol samting em i raitim long notbuk. Dispela pasin bai mekim na em i no inap kamapim stret ol tingting tru bilong em. Sapos pikinini i no laik kamapim sampela samting, orait rispektim em na no ken subim em long kamapim.

Sapos yupela i mekim famili lotu long olgeta taim, na stadi long ol samting em inap helpim famili, na mekim long pasin em olgeta i amamas long en, orait Jehova bai blesim wok bilong yupela. Dispela spesel taim bilong mekim famili lotu bai helpim ol pikinini bilong yu long pas gut wantaim Jehova na stap strong long ol samting bilong spirit.

[Blok long pes 31]

Traim Narapela Narapela Pasin Bilong Mekim Stadi

“Taim mi na man bilong mi i stadi wantaim ol liklik pikinini meri bilong mitupela, mipela i save skelim ol tok bilong ol miting bilong kongrigesen em mipela bai redim, na bihain mipela i tokim ol pikinini long droim wanpela piksa i kamapim dispela tok. Sampela taim mipela i mekim pilai long wanpela stori bilong Baibel o mekim traim pasin bilong autim tok. Mipela i tingim krismas bilong ol na stadi inap long skel bilong ol, na mekim long pasin we ol i amamas long en, na olsem wanpela pilai.”​—J.M., Amerika.

“Bilong helpim pikinini man bilong Baibel sumatin bilong mi long kliagut long pasin bilong yusim skrol long taim bilong ol man i bin raitim Baibel, mipela i rausim namba bilong ol sapta na ol ves bilong Buk Aisaia long Baibel na prinim long pepa. Mipela i joinim ol pes i go wantaim na pasim tupela arere bilong en long tupela stik. Nau dispela mangi i traim long mekim samting Jisas i bin mekim long haus lotu bilong ol Juda long Nasaret. Stori i stap long Luk 4:​16-21 i tok, Jisas i ‘opim buk [bilong Aisaia], na em i painim’ dispela hap em i laik lukim. (Ais. 61:​1, 2) Tasol taim dispela mangi i laik mekim wankain pasin na painim dispela tok long dispela skrol i no gat namba bilong sapta na ves, em i hatwok tru long painim Aisaia 61. Em i kirap nogut long save bilong Jisas long yusim skrol, na em i tok: ‘Jisas i gat bikpela save stret, laka!’ ”​—Y.T., Japan.

[Piksa long pes 30]

Pasin bilong mekim traim bai helpim ol pikinini na ol inap bekim gut tok bilong ol wanlain i laik pulim ol

[Piksa long pes 31]

Mekim Famili Lotu long pasin em olgeta i ken amamas long en