Stori Nating 5: Maria Em i Mama Bilong God

Wanem as bilong dispela stori nating? “Pasin bilong adorim mama bilong God i kamap strong taim . . . planti haiden i wok long kam insait long lotu. . . . Bel bilong ol i strong tumas long lotu [em pasin bilong ol haiden i tanim bel na kamap Kristen] na ol i bin wok long kisim dispela pasin insait long planti tausen yia long rot bilong lotuim god meri ‘bikpela mama’ na ‘virgo olsem wanpela god.’ ”​—Buk The New Encyclopædia Britannica (1988), Volium 16, pes 326 na 327.

Baibel i tok wanem? “Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. . . . Olsem na dispela pikinini bihain bai yu karim, em bai i stap gutpela na stretpela man bilong God, na ol bai i kolim em Pikinini Bilong God.”​—Luk 1:​31-35.

Ol dispela ves bilong Baibel i kamapim klia olsem Maria em i mama bilong “Pikinini bilong God,” em i no mama bilong God yet. Dispela Man em ‘heven yet i no bikpela ples inap long em i stap long en,’ yu ting em inap i stap insait long bel bilong Maria? (1 King 8:27) Maria i no bin tok olsem. Dispela bilip bilong God Triwan yet i bin mekim na ol man i paul long Maria em i husat tru. Long yia 431 C.E., Kibung Bilong Efesus i bin tokaut olsem Maria em i Theotokos (em wanpela tok Grik i makim “meri i karim God”), o “Mama Bilong God,” na dispela i opim rot long lotuim Maria. Inap planti handet yia, biktaun Efesus we ol i bin mekim dispela kibung bilong lotu, em i as ples bilong lotuim imis bilong Artemis, em god meri bilong kamapim planti pikinini.

Olsem na planti pasin bilong lotuim imis bilong Artemis husat “i bin pundaun long heven” i kam insait long pasin bilong lotuim Maria, olsem pasin bilong ol manmeri long bung na mats wantaim long rot. (Aposel 19:35) Na narapela pasin i bin kam insait long ol bilip Kristen, em pasin bilong mekim wok long ol imis bilong Maria na imis bilong sampela narapela man bilong mekim lotu.

Skelim ol dispela ves bilong Baibel: Matyu 13:​53-56; Mak 3:​31-35; Luk 11:​27, 28

TOK TRU:

Maria em i mama bilong Pikinini Bilong God, na i no mama bilong God yet. Stori nating bilong God Triwan i kamapim pasin bilong lotuim Maria olsem Mama Bilong God