Ol Man i Askim
Yu Ting Tru Tru Tripela Saveman i Bin Kam Lukim Bebi Jisas?
Ol stori bilong Krismas long olgeta hap bilong graun i stori long 3-pela king, o saveman, i karim ol gutpela gutpela presen i kam bilong givim long bebi Jisas. Dispela stori i tru o nogat? Em i stret wantaim ol samting i bin kamap tru tru? Orait yumi ken skelim.
Tupela Gutnius, em Gutnius Matyu i Raitim na Gutnius Luk i Raitim, i kolim stori bilong taim Jisas i bon. Tupela stori hia i kamapim olsem ol wasman bilong sipsip i stap ausait long taun na was long ol sipsip, ol tasol i go lukim Jisas taim mama i karim em. Ol dispela king, o saveman, ol i man bilong lukluk long ol sta, na ol i no mekim wok olsem ol king, na Baibel i no kolim hamas ol i kam. Ol i no bin kam stret long wanpela nupela bebi i slip i stap long haus bulmakau, nogat. Ol i kamap long taim Jisas i winim pinis sampela mun na em i stap long wanpela haus. I kam bilong ol i mekim na bagarap inap painim Jisas!
Yumi ken skelim gut stori bilong taim Jisas i bon, em Luk i bin raitim long Baibel. Em i tok: “Long dispela hap sampela wasman bilong sipsip i stap ausait long taun, na ol i was long ol sipsip bilong ol long nait. Na ensel bilong Bikpela i kam long ol, na . . . i tokim ol olsem, ‘. . . Yupela bai i lukim wanpela pikinini ol i pasim em long laplap, na em i slip i stap long bokis kaikai bilong bulmakau.’ . . . Orait na ol i go hariap, na ol i lukim Maria tupela Josep i stap, na pikinini i slip i stap long bokis kaikai bilong bulmakau.”—Luk 2:8-16.
Josep, Maria, na ol wasman bilong sipsip, ol tasol i stap wantaim bebi Jisas. Luk i no kolim nem bilong ol narapela man.
Orait nau yumi ken skelim stori i stap long Matyu 2:1-11: “Maria i karim Jisas long taun Betlehem long distrik Judia long taim Herot i stap king. . . . Bihain sampela saveman bilong hap sankamap i kam long Jerusalem . . . Ol saveman i go insait long haus, na ol i lukim pikinini wantaim mama bilong en Maria.”
Em nau, stori i tok “sampela saveman”—i no “3-pela saveman,” na ol i bin lusim hap sankamap pastaim na bihain ol i go long Jerusalem—i no long Betlehem, em taun we Jisas i bin bon long en. Taim ol i go kamap long Betlehem, Jisas i winim pinis sampela mun—em i no nupela bebi moa, na em i no stap moa long haus bulmakau—em i stap pinis long wanpela haus.
Na tu, sampela Baibel i no kolim dispela tok “saveman” bilong makim ol man i bin kam lukim Jisas. Ol i kolim ol olsem “ol man bilong lukluk long ol sta.” Wanpela buk (A Handbook on the Gospel of Matthew) i tok olsem, ol i yusim dispela tok “saveman” bilong makim “wanpela tok Grik em pastaim ol i bin kolim long ol pris bilong Persia em ol i gat bikpela save long lukluk long ol sta bilong kisim save long ol samting bai kamap bihain.” Na wanpela dikseneri bilong Baibel (The Expanded Vine’s Expository Dictionary of New Testament Words) i tok, dispela tok “saveman” i makim “glasman, posinman, man i giaman na tok em i gat pawa bilong wokim majik, na man i gat save long wokim olkain marila na sanguma samting.”
Long nau planti man i save mekim yet ol pasin olsem lukluk long ol sta, na mekim olkain marila na sanguma samting, tasol Baibel i tambuim ol dispela pasin. (Aisaia 47:13-15) Em ol wok bilong ol spirit nogut, na God Jehova i no laikim tru ol dispela samting. (Lo 18:10-12) Long dispela as, i no gat wanpela ensel i bin tokaut long ol dispela saveman long Jisas i bin bon. Tasol long rot bilong driman, God i tok lukaut long ol dispela saveman long ol i no ken go bek na ripot long King Herot, em man nogut, long wanem, em i laik painim rot bilong kilim Jisas i dai. “Olsem na ol i bihainim narapela rot na ol i go bek long ples bilong ol.”—Matyu 2:11-16.
Orait yu ting ol trupela Kristen bai i laik helpim wanpela stori nating bilong bebi Jisas we i paulim tok i tru bilong ol samting i bin kamap long taim Jisas i bon? Nogat, a?