Taim Mama i Karim Jisas—Stori Tru Bilong En

TINGIM wanpela samting i bin kamap bipo long kantri bilong yu na planti man i save long en. Ol i bin raitim gut olgeta samting bilong dispela stori, na planti man i bin raitim stori bilong en. Orait, sapos wanpela man i tokim yu, dispela samting em i stori nating tasol? O sapos wanpela man i tok, planti hap bilong stori em famili bilong yu i mekim long bubu man bilong yu, olsem taim mama i bin karim em, na i stap bilong em taim em i liklik yet, em i stori giaman tasol? Sapos man i tok olsem, bai yu kros, a? Ating yu no inap bilip nating long ol dispela tok bilong em!

Tasol sampela man long nau ol i sakim stori bilong ol Gutnius long mama i bin karim Jisas, em Matyu na Luk i bin raitim. Ol i save tok, tupela stori i pait wantaim, na tupela stori wantaim i gat sampela bikpela tok giaman long en, na tupela i bin mekim planti popaia taim ol i stori long ol samting i bin kamap. Orait yu ting tok bilong ol dispela man i stret? Yumi no ken bilip nating long tok bilong ol. Pastaim yumi mas skelim stori bilong ol dispela Gutnius long Baibel na bai yumi ken kisim save long ol samting ol dispela stori inap skulim yumi long en long nau.

As na Ol i Raitim

Pastaim yumi mas tingim as na ol i bin raitim ol dispela stori long Baibel. Ol i no bilong stori long i stap bilong wanpela man, nogat. Em ol stori bilong Gutnius. Em i bikpela samting long yumi mas save, ol i narapela kain olsem wanem. Long stori bilong i stap bilong wanpela man, ating man bai raitim planti handet pes, na em bai kamapim ol samting dispela man i bin mekim na nau planti man i save long em. Olsem na long sampela stori olsem, i gat planti planti pes i stori long papamama bilong em, na taim mama i karim em, na i stap bilong em taim em i pikinini yet. Dispela i narapela kain long ol stori i stap long ol Gutnius. I gat 4-pela Gutnius long Baibel, tasol Gutnius em Matyu na Luk i raitim, ol tasol i stori long taim mama i bin karim Jisas na taim em i pikinini yet. Tasol taim tupela i raitim dispela stori, ol i no tingting long soim yumi olsem Jisas i wok long go bikpela olsem wanem na em i kamap wanpela man i gat nem. Ol disaipel bilong em ol i save pinis, taim em i no kam daun yet long graun em i bin i stap olsem wanpela spirit long heven. (Jon 8:​23, 58) Olsem na taim Matyu na Luk i stori long i stap bilong Jisas taim em i pikinini yet, ol i no mekim bambai ol i ken tokim yumi olsem Jisas i bin kamap wanem kain man, nogat. Ol i stori long ol samting i stret wantaim dispela as na ol i bin raitim ol Gutnius.

Orait, i gat wanem as na ol i bin raitim ol dispela Gutnius? Dispela tok “gutnius” i olsem “gutpela tok.” Tupela man i kamapim wankain tok​—⁠olsem Jisas em dispela Mesaia, o Krais, em God i tok promis long salim i kam, na em i bin dai bilong tekewe sin bilong ol man, na God i kirapim em bek na em i go antap long heven. Tasol i stap bilong Matyu na Luk bipo i narapela narapela kain, na ol i bin raitim bilong helpim ol narapela narapela lain. Pastaim Matyu em i man bilong kisim takis, na em i raitim Gutnius bilong helpim ol Juda. Luk, em wanpela dokta, em i raitim Gutnius i go long “bikman Tiofilus”​—⁠ating em i gat bikpela namba long wok​—⁠na tu, em i raitim bilong helpim ol Juda na ol narapela lain. (Luk 1:​1-3) Tupela i skelim gut na raitim ol stori i kamapim gut as bilong ol tok ol i laik bai ol man i save long en, na wanem ol tok inap helpim ol man long pilim gut na bilip long en. Olsem na stori bilong Matyu i kamapim ol tok profet bilong Ol Skripsa Hibru i makim stret Jisas na em i bin truim ol dispela tok. Tasol Luk i kolim ol tumbuna bilong Jisas na ol kain samting olsem, na bai ol narapela lain i kaunim dispela Gutnius, ol inap pilim gut.

Em nau, stori bilong tupela i narapela narapela, tasol tupela stori i no pait wantaim olsem sampela man i tok, nogat. Narapela i helpim narapela, na tupela stori i stret wantaim na bai yumi ken save gut long olgeta samting i bin kamap.

Mama i Karim Jisas Long Betlehem

Matyu na Luk, tupela wantaim i raitim stori bilong wanpela bikpela mirakel bilong taim mama i karim Jisas​—⁠wanpela nupela meri, i no bin slip yet wantaim man, em i karim Jisas. Matyu i soim yumi olsem dispela mirakel i truim tok profet Aisaia i bin mekim planti handet yia paslain long en. (Aisaia 7:​14; Matyu 1:​22, 23) Luk i tok mama i bin karim Jisas long Betlehem, long wanem, Sisar i bin putim wanpela lo long ol i mas kisim nem bilong olgeta manmeri, na dispela i mekim na Josep wantaim Maria i mas i go long dispela ples. (Lukim blok long pes 7.) Mama i bin karim Jisas long Betlehem, na dispela em i wanpela bikpela samting. Planti handet yia paslain long dispela, profet Maika i bin tok profet olsem Mesaia bai kamap long dispela liklik taun nating klostu long Jerusalem.​—⁠Maika 5:⁠2.

Dispela nait mama i bin karim Jisas, long nau planti man i save long en, long wanem, ol i save wokim ol piksa bilong en long taim bilong Krismas. Tasol stori tru tru bilong Jisas, em i narapela kain long planti stori ol dispela piksa i makim. Luk, em man bilong kamapim stori bilong dispela lo em gavman i putim na nau Josep wantaim Maria i kam long Betlehem, em i stori tu long ol wasman bilong sipsip ol i stap ausait long dispela nait na was long ol sipsip. Planti saveman bilong Baibel i tingim dispela tupela samting i bin kamap na ol i ting mama i no bin karim Jisas long mun Disemba. Ol i tok, Sisar i no inap putim wanpela lo i subim ol Juda long wokabaut i go long as ples bilong ol long taim bilong kol na ren; ol Juda i bikhet long gavman na dispela lo inap kirapim ol long belhat moa yet. Na tu, ol saveman i ting ol wasman i no inap i stap ausait na was long ol sipsip long taim bilong kol na ren.​—⁠Luk 2:​8-​14.

Tingim dispela samting: Taim Jehova i tokaut olsem wanpela meri i karim Jisas, em i no mekim dispela tokaut long ol hetman bilong lotu em ol i bin skul gut na ol i gat bikpela nem, nogat; em i tokaut long ol wokman nating i save wok ausait. Ol saveman bilong lo na ol Farisi i no save bung o toktok wantaim ol wasman bilong sipsip, em ol i mas mekim wok bilong ol long kain kain taim nabaut, na ating dispela i pasim ol long bihainim sampela lo ol Juda i bin kisim long maus bilong ol man. Tasol God i mekim gut tru long ol dispela gutpela man i gat pasin daun​—⁠wanpela lain ensel i toksave long ol olsem, long Betlehem wanpela meri i karim dispela Mesaia em lain bilong God ol i bin wet long en inap planti tausen yia. Em ol dispela wasman yet i go lukim Maria na Josep na nupela pikinini i slip long bokis kaikai bilong bulmakau​—⁠i no dispela “tripela saveman” i go lukim ol, olsem yumi save lukim long planti piksa bilong Krismas, nogat.​—⁠Luk 2:​15-​20.

Jehova i Laikim Man i Gat Pasin Daun na i Laik Painim Tok i Tru

God i save laikim ol man i gat pasin daun na ol i laikim em tru na ol i amamas long lukim ol laik bilong em i kamap tru. Dispela i kamap ples klia planti taim long ol samting i bin kamap long taim mama i karim Jisas. Inap wanpela mun samting bihain long taim Jisas i kamap, Josep wantaim Maria i bihainim Lo Bilong Moses na tupela i bringim em i go long tempel, na ol i mekim ofa long “tupela namba wan balus, o tupela yangpela namba 2 balus.” (Luk 2:​22-​24) Lo i tok long ol i mas ofaim wanpela sipsip man, tasol sapos man i rabis, em i ken kisim wanpela samting i no gat bikpela pe bilong en. (Wok Pris 12:​1-8) Tingim dispela: God Jehova, em King bilong heven na graun, i no makim wanpela famili i gat planti mani​—⁠em i makim wanpela famili i stap rabis, em gutpela Pikinini bilong em bai go bikpela insait long en. Sapos yu wanpela papa o mama, dispela i mas givim tingting long yu olsem: Nambawan gutpela presen yu inap givim long pikinini bilong yu em wanpela famili i save putim ol samting bilong spirit i go pas long ol narapela samting​—⁠dispela i winim tru planti mani na bikpela skul.

Long tempel Jehova i mekim gut long tupela narapela, em ol i gat pasin daun na i save lotuim em. Wanpela em Ana, em wanpela meri i gat 84 krismas, man bilong en i dai pinis. Ana “i no save lusim tempel.” (Luk 2:​36, 37) Narapela em wanpela gutpela lapun man, nem bilong em Simeon. Tupela wantaim i amamas tru long gutpela samting God i larim ol i mekim​—⁠taim tupela i no i dai yet ol i lukim dispela pikinini em bai kamap Mesaia. Simeon i mekim wanpela tok profet long dispela pikinini. Em i tok profet long gutpela samting tru ol man inap wet long en, tasol i gat wanpela samting bilong krai sori tu long dispela tok profet. Em i tok profet olsem bihain dispela yangpela mama, Maria, bai bel hevi nogut tru long dispela gutpela pikinini bilong em, i olsem bainat i sutim lewa bilong em.​—⁠Luk 2:​25-​35.

Bagarap i Laik Painim Pikinini

Tok profet bilong Simeon i givim save long ol olsem ol man bai bel nogut long dispela liklik pikinini i no gat asua. Taim em i liklik yet, dispela pasin birua i wok long kamap. Stori bilong Matyu i kamapim dispela. Sampela mun i go pinis na Josep, Maria, na Jisas ol i sindaun long wanpela haus long Betlehem. Em nau, sampela man bilong narapela kantri ol i kam lukim ol. Long ol piksa bilong Krismas, i gat 3-pela man ol i kam lukim pikinini, tasol Matyu i no stori long hamas man ol i kam, na em i no kolim ol olsem “tripela saveman” o “tripela king,” nogat tru. Em i kolim wanpela tok Grik olsem maʹgoi, insait bilong en i olsem ‘ol man bilong lukluk long ol sta bilong kisim save long ol samting i stap hait.’ Em nau, yumi save wanpela samting nogut i laik kamap, long wanem, Baibel i tambuim pasin bilong lukluk long ol sta bilong kisim save long ol samting i stap hait, na ol Juda i stap gut long God ol i abrusim tru dispela pasin.​—⁠Lo 18:​10-​12; Aisaia 47:​13, 14.

Ol dispela man i bin bihainim wanpela sta kirap long hap bilong is na i kam, na ol i karim sampela presen bilong dispela “nupela pikinini em king bilong ol Juda.” (Matyu 2:⁠2) Tasol dispela sta i no bringim ol long Betlehem. Em i bringim ol i go long Jerusalem, long King Herot. I no gat narapela man bilong graun i gat strong bilong bagarapim dispela pikinini Jisas olsem dispela king, na tu, i gat wanpela tingting i kirapim em strong long mekim olsem. Dispela man nogut i bin kilim i dai sampela long famili bilong em yet, nogut wanpela i laik daunim em na kamap king.a Taim king i harim olsem wanpela meri i karim pikinini na bihain dispela pikinini bai kamap “king bilong ol Juda,” em i tingting planti. Olsem na em i salim ol dispela man bilong painim dispela pikinini long Betlehem. Orait taim ol i wokabaut i go, narapela kain samting i kamap. Dispela “sta” i bin bringim ol i go long Jerusalem, i olsem em i wokabaut!​—⁠Matyu 2:​1-9.

Dispela em i wanpela lait tru long skai o ol i lukim long samting olsem driman, em yumi no save. Tasol yumi save, God i no bin salim dispela “sta.” Em nau, “sta” i bringim ol dispela man bilong lotu haiden i go stret long Jisas​—⁠em wanpela liklik pikinini i no inap helpim em yet, na wanpela kamda wantaim meri bilong em, em ol i stap rabis, tupela tasol i lukautim em. Ol dispela man bilong lukluk long ol sta, ol i no save olsem Herot i laik bagarapim pikinini, olsem na ating ol bai go bek na ripot long king, na em bai bagarapim pikinini. Tasol long rot bilong driman God i pasim ol, na em i salim ol i go bek long ples bilong ol long narapela rot. Olsem na yumi ken ting dispela “sta” em i wanpela samting bilong Satan, em bai wok strong tru bambai em i ken bagarapim Mesaia. Tasol long ol piksa bilong Krismas, ol i makim olsem God yet i salim dispela “sta” na ol man bilong lukluk long ol sta!​—⁠Matyu 2:​9-​12.

Tasol Satan i no les. Boi bilong em, em King Herot, i putim tok olsem ol i mas kilim i dai olgeta pikinini i no winim yet tupela krismas. Tasol Satan i no inap winim pait em i mekim long Jehova. Matyu i soim yumi olsem, long bipo yet God i save ol bai kilim i dai ol liklik pikinini. Jehova i pasim gen rot bilong Satan, na long rot bilong ensel em i tokim Josep long ranawe i go long Isip na bai ol i no ken bagarapim pikinini. Matyu i tok, bihain Josep i kisim meri pikinini na ol i go sindaun long Nasaret, na Jisas wantaim ol brata susa bilong em ol i go bikpela long dispela ples.​—⁠Matyu 2:​13-​23; 13:​55, 56.

Mama i Karim Krais​—⁠Dispela i Mekim Wanem Long Yu?

Ating yu kirap nogut long dispela stori bilong ol samting i bin kamap taim mama i karim Jisas na taim em i stap pikinini yet, a? Planti man i mekim olsem. Ol i kirap nogut taim ol i lukim olsem stori bilong Matyu na Luk i stret wantaim na i stret olgeta, maski sampela man i tok stori bilong tupela i pait wantaim. Na ol i kirap nogut long save olsem sampela samting i kamap, em Baibel i bin tok profet long en planti handet yia paslain long dispela taim. Na ol i kirap nogut long lukim olsem sampela bikpela samting ol Gutnius i stori long en i narapela kain tru long ol piksa bilong Krismas.

Tasol ating bikpela samting tru, em olsem: Ol bilaspasin na amamas ol i save mekim long Krismas, dispela i save haitim ol bikpela samting bilong ol stori bilong Gutnius. Olsem: Ol i no save tingting liklik long Papa bilong Jisas​—⁠em God Jehova. Yumi ken tingim samting Jehova i bin mekim, olsem em i pilim olsem wanem long taim em i putim Pikinini bilong em long han bilong Josep na Maria bambai tupela i ken mekim bikpela long em na lukautim em long kaikai na ol narapela samting. Na yumi ken tingim bikpela bel hevi em i bin kisim long larim Pikinini bilong em i go bikpela long dispela graun i gat wanpela king long en i bel nogut tru long dispela Pikinini na em i wok long painim rot bilong kilim em i dai taim em i stap pikinini yet! Jehova i laikim tumas ol manmeri bilong graun na dispela i kirapim em long larim ol dispela hevi i painim Pikinini bilong em.​—⁠Jon 3:⁠16.

Ol amamas samting long taim bilong Krismas ol i no kamapim stori tru bilong Jisas​—⁠em i lus olgeta insait long ol samting ol i mekim. Ating bai yu kirap nogut long save, i no gat wanpela tok long Baibel long Jisas i bin tokim ol disaipel long wanem de na mun mama i bin karim em; na i no gat wanpela tok i makim olsem ol disaipel i bin mekim pati bilong tingim de mama i karim em.

Jisas i no bin tokim ol disaipel bilong em long tingim de mama i bin karim em, nogat; em i tokim ol long tingim de em i dai​—⁠em wanpela bikpela de tru i bin mekim sampela samting long olgeta man bilong graun. (Luk 22:​19, 20) Jisas i no laik bai ol man i tingim taim em i bin stap olsem nupela pikinini i no gat strong na em i slip long bokis kaikai bilong bulmakau, long wanem, nau em i no stap olsem. Inap 60 yia samting bihain long taim ol i kilim em i dai, Jisas i kamapim em yet long aposel Jon long rot bilong driman, na Jon i lukim em i stap olsem wanpela strongpela King i sindaun long hos na em i go bilong mekim pait. (KTH 19:​11-​16) Nau Jisas i stap King long Kingdom bilong God long heven, na yumi mas kisim save long dispela bikpela namba na wok Jisas i holim long nau, long wanem, em i wanpela King em bai kamapim bikpela senis tru long dispela graun.

[Futnot]

[Blok/Ol Piksa long pes 7]

Luk i Popaia o Olsem Wanem?

JISAS i bin go bikpela long Nasaret, na ol man i save kolim em olsem man bilong Nasaret, orait olsem wanem na mama inap karim em long Betlehem, em i longwe long Nasaret inap 150 kilomita samting? Luk i tok klia long yumi olsem: “Long dispela taim Sisar Ogastus i putim wanpela lo long ol i mas kisim nem bilong olgeta manmeri. Dispela em i namba wan taim gavman i kisim nem bilong ol, na long dispela taim Kwirinius i stap namba wan gavman bilong provins Siria. Olsem na olgeta manmeri i go long as ples bilong ol, bai gavman i ken kisim nem bilong ol.”​—⁠Luk 1:1; 2:​1-3.

Planti man em ol i no bilip tumas long ol tok bilong Baibel, ol i tok dispela hap bilong Baibel em i wanpela bikpela popaia, o em i wanpela tok giaman. Ol i tok strong olsem dispela wok long gavman i mas kisim nem bilong ol manmeri, na wok bilong Kwirinius olsem namba wan gavman, ol i bin kamap long yia 6 o 7 C.E. Sapos ol dispela man i tok stret, orait i olsem stori bilong Luk i kranki, long wanem, ol samting long stori Luk i raitim i makim olsem mama i bin karim Jisas long yia 2 B.C.E. Tasol ol dispela man i sakim tupela bikpela samting. Namba wan, em Luk i tokaut olsem i no wanpela taim tasol em gavman i kisim nem bilong ol manmeri​—⁠em i tok olsem “dispela em i namba wan taim gavman i kisim nem bilong ol.” Em i save gut olsem i gat narapela taim dispela samting i bin kamap. (Aposel 5:​37) Saveman Josifas i bin stori long dispela narapela taim em gavman i kisim nem bilong ol manmeri​—⁠dispela i bin kamap long yia 6 C.E. Na namba tu samting i olsem: Wok bilong Kwirinius olsem namba wan gavman, dispela i no makim olsem Jisas i bin kamap long dispela yia 6 C.E., long wanem, i olsem Kwirinius i bin stap namba wan gavman inap tupela taim. Planti saveman i save, namba wan taim bilong em long holim dispela wok, em long yia 2 B.C.E samting.

Sampela man ol i tok, Luk yet i kamapim nating stori bilong taim ol manmeri i mas i go long as ples na bai gavman i ken kisim nem bilong ol. Ol i tok em i mekim olsem na bai i gat as na em i ken tok mama i bin karim Jisas long Betlehem, na dispela bai truim tok bilong Maika 5:⁠2. Dispela tok bilong ol i mekim olsem Luk em i man bilong giaman, tasol ol dispela tok ol man i sutim long Luk, em i no stret wantaim pasin bilong dispela saveman i bin raitim Gutnius na Buk Aposel, olsem em i bin skelim gut olgeta samting i bin kamap na bai em i ken raitim ol tok i stret.

Na i gat narapela samting tu ol dispela man i no inap sakim: Dispela lo gavman i putim bilong kisim nem bilong ol manmeri, dispela yet i truim wanpela tok profet! Inap 500 yia samting paslain long Krais, Daniel i tok profet long wanpela king bai kamap na em bai “salim wanpela man i go kisim takis long dispela gutpela ples tru i stap insait long ol kantri em i bosim.” Olsem wanem? Dispela tok i makim Ogastus na lo em i bin putim bilong kisim nem bilong ol manmeri long Israel? Dispela tok profet i tok moa olsem, ol bai i “daunim” Mesaia, olsem “hetpris bilong ol manmeri bilong God,” long taim bilong narapela king i kisim ples bilong dispela king. Tru tumas, ol i bin “daunim” Jisas​—⁠ol i kilim em i dai long taim bilong King Taiberius, em i bin kisim ples bilong Ogastus.​—⁠Daniel 11:​20-​22.

[Ol Piksa]

Sisar Ogastus (27 B.C.E.​–14 C.E.)

Sisar Taiberius (14-37 C.E.)

[Ol Kredit Lain]

Musée de Normandie, Kan, Frans

British Museum i orait long ol i kisim dispela piksa

[Piksa long pes 8]

Ensel bilong Jehova i mekim gut long ol wasman bilong sipsip i gat pasin daun na em i givim gutnius long ol olsem wanpela meri i bin karim Krais