Jehova Em Man Bilong Kisim Bek Ol Man
“God bilong yumi yet i save helpim yumi.”—SONG 68:20.
1, 2. (a) Olsem wanem yumi ken tok Jehova em Man bilong kisim bek ol man? (b) Wanem insait bilong tok bilong Sindaun 21:31?
JEHOVA em Man bilong kisim bek ol man i save laikim em tru. (Aisaia 43:11) Wanpela king bilong Israel i gat nem, em King Devit, em i bin kisim save long dispela long ol samting i painim em, na em i tok: “Bikpela, yu wanpela tasol yu save kisim bek mipela na mipela i no save bagarap.” (Song 3:8) Profet Jona i mekim wankain tok taim em i beten strong insait long bel bilong traipela pis.—Jona 2:9.
2 Pikinini man bilong Devit, em Solomon, em tu i save olsem Jehova em Man bilong kisim bek ol man, olsem na em i tok: “Ol soldia i save redim ol hos long taim bilong pait. Tasol Bikpela wanpela tasol em inap long mekim ol i win.” (Sindaun 21:31) Long Midel-Is bilong bipo, ol bulmakau i bin pulim hap ain bilong brukim graun, na ol donki i karim ol samting, na ol manmeri i sindaun long narapela kain donki ol i kolim miul, na ol i mekim wok long ol hos long taim bilong pait. Tasol paslain long ol Israel i go insait long Graun Bilong Promis, God i tok man i kamap king bilong ol long bihain em “i no ken kisim planti hos bilong ami bilong en.” (Lo 17:16) Em i no ken kisim ol hos bilong pait, long wanem, Jehova bai kisim bek lain bilong em.
3. Yumi mas tingim wanem ol askim?
3 Bikpela King Jehova em i “God bilong . . . helpim yumi.” (Song 68:20) Dispela save i strongim tru yumi, a? Tasol Jehova i mekim pinis wanem samting bilong “helpim yumi,” o kisim bek yumi? Na em i bin kisim bek husat?
Jehova i Save Kisim Bek Ol Stretpela Man
4. Olsem wanem yumi save Jehova i save kisim bek ol man i bihainim pasin bilong em?
4 Olgeta man i save bihainim stretpela pasin olsem wokboi bilong God i dediket pinis, ol i ken kisim strong long tok bilong aposel Pita, em i tok: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim. Na Bikpela i save pinis long pasin bilong ol man nogut, na em i save long rot bilong bekim pe nogut long ol, i go inap long De bilong bikpela kot bilong God.” Bilong strongim dispela tok, Pita i tok “ol manmeri bilong bipo tu, ol i bin givim baksait long God, na em i no larim ol. Nogat. Em i mekim bikpela tait i kamap long ol, na ol i lus. Tasol Noa em i man bilong tokaut long stretpela pasin. Na God i lukautim em wantaim 7-pela manmeri, na ol i stap gut.”—2 Pita 2:5, 9.
5. Ol samting i stap olsem wanem taim Noa i mekim wok olsem “man bilong tokaut long stretpela pasin”?
5 Tingim olsem yu stap long taim bilong Noa. Ol spirit nogut i bin tanim i kamap man ol i stap long graun. Ol pikinini bilong ol dispela ensel i sakim tok bilong God ol i mekim nogut tru long ol manmeri, na “long olgeta hap bilong graun ol i wok long pait na bikhet tasol.” (Stat 6:1-12) Tasol ol i no inap pulim Noa long lusim wok bilong Jehova, nogat. Em i wanpela “man bilong tokaut long stretpela pasin.” Em wantaim lain bilong em ol i wokim wanpela sip, na ol i bilip tru olsem God bai pinisim ol pasin nogut long taim bilong ol. Bilip bilong Noa i kamapim ples klia pasin nogut bilong ol narapela manmeri. (Hibru 11:7) Ol samting i kamap long nau i wankain olsem long taim bilong Noa, olsem na yumi save nau yumi stap long taim bilong las de bilong pasin nogut bilong dispela graun. (Matyu 24:37-39; 2 Timoti 3:1-5) Olsem Noa long dispela taim bipo, bai yu stap gut olsem man bilong tokaut long stretpela pasin na wok wantaim lain bilong God taim yu wetim Jehova i kisim bek ol man?
6. Olsem wanem 2 Pita 2:7, 8 i kamapim olsem Jehova i save kisim bek ol stretpela manmeri?
6 Aposel Pita i kamapim sampela tok moa i soim olsem Jehova i save kisim bek ol stretpela manmeri. Em i tok: “Dispela stretpela man Lot i bin i stap long Sodom, na em i lukim ol kain kain pasin pamuk samting bilong ol dispela man nogut na em i bel hevi tru. Na God i kisim bek Lot, na em i no bagarap. Yes, dispela stretpela man em i stap namel long ol Sodom, na em i lukim pasin nogut bilong ol, na long olgeta de em i harim tok nogut bilong ol. Bel bilong en i stap stret, na em i kirap nogut na bel bilong en i pen tru long pasin bilong sakim lo ol i mekim.” (2 Pita 2:7, 8; Stat 19:1-29) Nau long dispela taim bilong las de planti milion manmeri i save mekim olkain pasin pamuk, na em i olsem pasin ol i save bihainim oltaim. Olsem wanem? Yu man kain olsem Lot na yu save ‘bel hevi tru long kain kain pasin pamuk samting’ planti manmeri long nau i save mekim? Sapos yu bel hevi tru, na yu bihainim stretpela pasin, yu inap i stap namel long ol manmeri Jehova bai kisim bek ol long taim pasin nogut bilong dispela graun bai pinis.
Jehova i Save Kisim Bek Lain Bilong Em
7. Ol samting Jehova i bin mekim long ol Israel taim ol i stap long Isip, olsem wanem dispela i kamapim olsem em i save kisim bek lain bilong em long han bilong ol birua, em ol bin mekim nogut long ol?
7 Olpela pasin i stap yet long graun, olsem na ol birua bai mekim nogut yet long ol wokman bilong Jehova. Tasol ol i ken bilip tru olsem Jehova bai kisim bek ol, long wanem, long bipo em i bin kisim bek lain bilong em long han bilong ol birua, em ol i bin mekim nogut long ol. Tingim olsem yu wanpela bilong lain Israel i bin kisim nogut long han bilong ol Isip long taim bilong Moses. (Kisim Bek 1:1-14; 6:8) Jehova i kamapim planti bikpela hevi long ol Isip. (Kisim Bek 8:5–10:29) Taim namba 10 bikpela hevi i kilim i dai ol namba wan pikinini man bilong ol Isip, king bilong Isip i larim ol Israel i go, tasol bihain em i kirapim ami bilong em na ol i bihainim ol. Tasol i no longtaim na em wantaim ami bilong em ol i bagarap long solwara Retsi. (Kisim Bek 14:23-28) Yu bungim nek bilong yu wantaim nek bilong Moses na ol Israel long singsing olsem: “Bikpela em i strongpela soldia tru. Bikpela tasol, em i nem bilong en. Em i tromoi ol ami bilong Isip wantaim ol karis bilong pait i go long solwara. Na ol nambawan kepten bilong ami i dring wara na i dai long solwara Retsi. Bikpela wara i karamapim ol na ol i go daun daunbilo tru long wesan olsem ston.” (Kisim Bek 15:3-5) Wankain bikpela hevi bai painim ol man i daunim lain bilong God nau long taim bilong las de.
8, 9. Kamapim wanpela stori bilong Buk Hetman i kamapim ples klia olsem Jehova i save kisim bek lain bilong em long ol man i mekim nogut long ol?
8 Taim ol Israel i go insait pinis long Graun Bilong Promis, inap planti yia ol hetman i bosim lain Israel. Sampela taim ol narapela lain i bin bosim ol na mekim nogut long ol, tasol God i bin mekim wok long ol gutpela hetman bilong kisim bek ol. Ating yumi tu i save “krai long pen na hevi” ol birua i save givim long yumi, tasol Jehova bai kisim bek yumi ol gutpela wokboi bilong em. (Hetman 2:16-18; 3:9, 15) Buk Hetman long Baibel i tokim yumi long dispela samting, na i tokim yumi tu long pasin bilong God long kisim bek yumi long rot bilong Jas em i bin makim, Krais Jisas.
9 Orait nau yumi ken stori long taim bilong Jas Barak. Ol Israel i bin lotu long ol god giaman na God i no orait long ol, olsem na inap 20 yia King Jabin bilong lain Kenan i bin putim bikpela hevi long ol Israel. Sisera em kepten bilong bikpela ami bilong ol Kenan. Maski lain Israel i gat olsem 4 milion manmeri, tasol long ol ‘40,000 man bilong pait i no gat wanpela i karim hap plang bilong pait na i holim spia.’ (Hetman 5:6-8) Ol Israel i tanim bel na singaut long Jehova. Long rot bilong profet meri Debora God i tokim Barak long bungim 10,000 man long maunten Tabor, na Jehova i bringim ol birua i kam long ples daun bilong dispela bikpela maunten. Ami bilong Sisera na 900 karis bilong pait ol i pairap na spit i kam long ples stret na long hap bilong wara Kison i drai pinis. Tasol bikpela ren i pundaun na wara bilong Kison i tait. Bikpela ren i haitim Barak na ol soldia bilong em taim ol i lusim maunten Tabor na kam daun, na ol i lukim bikpela bagarap em belhat bilong Jehova i kamapim. Ol Kenan i pret nogut tru na ol i laik ranawe, tasol ol soldia bilong Barak i bagarapim ol, na i no gat wanpela i abrusim bagarap. Man! Em wanpela strongpela toksave long ol man i laik daunim yumi na pait long God!—Hetman 4:3-16; 5:19-22.
10. Bilong wanem yumi ken bilip tru olsem God bai kisim bek ol wokman bilong em long nau long han bilong ol man i mekim nogut long ol?
10 Jehova bai kisim bek ol wokman bilong em long nau long han bilong ol birua i mekim nogut long ol, olsem em i bin kisim bek ol Israel long taim bagarap i laik painim ol na ol i bin stap gut long em. (Aisaia 43:3; Jeremaia 14:8) God i bin kisim bek Devit “long han bilong olgeta . . . birua bilong en.” (2 Samuel 22:1-3) Olsem na maski ol man i daunim yumi na mekim nogut long yumi, long wanem, yumi lain bilong Jehova, yumi ken strongim bel—King Mesaia bai helpim yumi long kamap fri na bai ol man nogut i no ken daunim yumi moa. Tru tumas, “ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol.” (Song 72:13, 14) Dispela taim bilong kisim bek ol man i klostu pinis.
God i Kisim Bek Ol Man i Bilip Long Em
11. Olsem wanem long pasin bilong yangpela Devit long wetim Jehova i helpim em?
11 Bilong lukim Jehova i kisim bek ol man, yumi mas strongim bel na bilip long em. Devit i strongim bel na wetim God i helpim em taim em i go bilong bungim traipela man Goliat. Tingim dispela traipela man Filistia i sanap long ai bilong yangpela Devit, na Devit i singaut: “Yu holim bainat na ol spia na yu kam pait long mi. Tasol mi kam pait long yu long nem bilong Bikpela I Gat Olgeta Strong, em God i bosim ol ami bilong mipela Israel. Em dispela God yu bin bikhet na tok bilas long en. Harim. Nau long dispela de tasol bai Bikpela i givim yu long han bilong mi. Na bai mi kilim yu na katim het bilong yu. Na bai mipela i kilim ol soldia bilong yupela Filistia na givim bodi bilong ol long ol pisin na ol wel abus. Taim mi mekim olsem, ol manmeri bilong olgeta kantri bai i save olsem, God bilong mipela Israel, em i God tru. Na olgeta man i stap hia bai i lukim olsem, Bikpela i save kisim bek ol manmeri bilong en long strong bilong em yet. Em i no save wari long ol man i holim spia na bainat. Nogat. Bikpela yet bai i winim dispela pait.” I no longtaim na Goliat i dai, na ol i daunim tru ol Filistia. Tru tumas, Jehova i bin kisim bek lain bilong em.—1 Samuel 17:45-54.
12. Bilong wanem i gutpela yumi tingim Eleasar, em wanpela strongpela man bilong Devit?
12 Taim ol man i laik mekim nogut long yumi, yumi mas strongim bel na bilip tru long God bambai yumi “inap sanap strong.” (Aisaia 46:8-13; Sindaun 3:5, 6) Tingim samting i bin kamap long wanpela ples, nem bilong en Pasdamim. Ol Israel i bin ranawe long ami bilong ol Filistia. Tasol Eleasar i no pret long mekim wanpela samting—em i wanpela bilong ol tripela strongpela soldia bilong Devit. Em i sanap long wanpela gaden bali na em wanpela tasol i wok long kilim i dai ol Filistia long bainat. Olsem na long dispela pasin Jehova “i winim tru ol Filistia na ol Israel i stap gut.” (1 Stori 11:12-14; 2 Samuel 23:9, 10) I no gat man i ting yumi yet i mas daunim wanpela bikpela ami. Tasol ating sampela taim yumi stap wanpis na ol birua i laik mekim nogut long yumi. Olsem wanem? Bai yumi beten na wetim Jehova i helpim yumi, em dispela God bilong kisim bek ol man? Bai yumi beten askim em long helpim yumi bambai yumi no ken kamapim ol wanbilip bilong yumi long ol birua?
Jehova i Save Kisim Bek Ol Man i Sanap Strong
13. Bilong wanem i hatwok long stap gut long God long hap bilong 10-pela lain bilong Israel?
13 Bilong Jehova i ken kisim bek yumi, yumi mas sanap strong maski wanem ol hevi i painim yumi. Kain kain hevi i bin painim lain bilong God long bipo. Tingim ol samting inap painim yu sapos yu bin stap long hap bilong 10-pela lain bilong Israel. Rehoboam i bin mekim hatpela pasin, olsem na 10-pela lain i lusim em na ol i kamapim lain Israel i stap long hap bilong not. (2 Stori 10:16, 17; 11:13, 14) Long ol planti king bilong ol, Jehu i nambawan gutpela king, tasol em tu “i no strong long bihainim gut olgeta lo bilong God.” (2 King 10:30, 31) Tasol long 10-pela lain i gat sampela man i sanap strong na holimpas bilip. (1 King 19:18) Ol i bilip long God, na em i bin helpim ol. Ol hevi i traim bilip bilong yu, tasol olsem wanem? Yu save stap gut long Jehova?
14. Jehova i mekim wanem bilong kisim bek ol man long taim bilong King Hesekia? Na wanem samting i mekim na ol Babilon i daunim Juda?
14 Ol manmeri i no bihainim Lo bilong God na dispela i kamapim bikpela bagarap long kingdom bilong Israel. Taim ol Asiria i daunim ol long yia 740 B.C.E., ating sampela man bilong 10-pela lain ol i bin ranawe i go long 2-pela lain bilong Juda, na ol inap lotuim Jehova long haus lotu bilong em. Long ol 19 king bilong Juda, em ol i kam long lain bilong Devit, 4-pela king—em Asa, Jehosafat, Hesekia, na Josaia—ol i givim bel tru long God. Long taim bilong Hesekia, em wanpela man i bin stap gut long God, ol Asiria i kam wantaim traipela ami bilong pait long ol Juda. God i harim beten bilong Hesekia, na em i mekim wok long wanpela ensel tasol bilong kilim i dai 185,000 Asiria long wanpela nait. Long dispela rot em i kisim bek ol man i lotu long Em! (Aisaia 37:36-38) Bihain, ol manmeri i no bihainim Lo na ol i no tingim ol toksave bilong ol profet, olsem na long yia 607 B.C.E. ol Babilon i daunim Juda na bagarapim biktaun bilong en, Jerusalem.
15. Bilong wanem ol Juda i stap kalabus long Babilon ol i mas i gat pasin bilong sanap strong na karim hevi? Olsem wanem Jehova i kisim bek ol long bihain?
15 Inap 70 yia ol Juda i stap kalabus long Babilon, olsem na ol i mas i gat pasin bilong sanap strong na karim hevi bambai ol i ken stap gut long God. (Song 137:1-6) Wanpela man i bin stap gut long God em profet Daniel. (Daniel 1:1-7; 9:1-3) Tingim bikpela amamas tru em i bin kisim taim lo bilong King Sairus bilong Persia i kamap long 537 B.C.E., na ol Juda i ken go bek long kantri Juda bilong wokim gen tempel, a? (Esra 1:1-4) Daniel na ol narapela i bin sanap strong inap planti yia, tasol ol i lukim Babilon i bagarap na Jehova i kisim bek lain bilong em. Dispela i mas helpim yumi long kamapim pasin bilong sanap strong na karim hevi taim yumi wetim ‘Bikpela Babilon’ i bagarap, em olgeta lotu giaman bilong dispela graun.—KTH 18:1-5.
Oltaim Jehova i Kisim Bek Lain Bilong Em
16. Olsem wanem Jehova i kisim bek lain bilong em long taim bilong Kwin Esta?
16 Oltaim Jehova i save kisim bek lain bilong em taim ol i stap gut long nem bilong em. (1 Samuel 12:22; Aisaia 43:10-12) Tingim ol samting i bin kamap long taim bilong Kwin Esta—em long yia 500 B.C.E. samting. King Serksis i makim Haman olsem namba wan gavman. Haman i belhat nogut tru long Mordekai bilong lain Juda, long wanem, em i no brukim skru long em, olsem na Haman i pasim tok long kilim em i dai, na tu, long kilim i dai olgeta Juda i stap long Gavman Persia. Haman i tok ol Juda i man bilong brukim lo, na em i laik givim bikpela mani long king bilong grisim em, na king i larim em i mekim wok long ring bilong king bilong putim mak long pepa i tokaut long kilim i dai ol Juda. Esta i strongim bel na tokim king olsem em i bilong lain Juda na em i kamapim samting nogut tru Haman i laik mekim. I no longtaim na Haman i hangamap long dispela pos em i bin redim bilong kilim i dai Mordekai. Mordekai i kamap namba wan gavman, na em i kisim tok orait bambai ol Juda i ken mekim ol samting bilong lukautim laip bilong ol yet. Ol i winim tru pait na daunim ol birua bilong ol. (Esta 3:1–9:19) Dispela samting i bin kamap i mas strongim bilip bilong yumi olsem Jehova bai mekim ol samting bilong helpim ol wokman bilong em long nau.
17. Olsem wanem pasin bilong bihainim tok i helpim ol Juda Kristen i stap long Judia long taim bilong ol aposel?
17 Narapela as na God i save kisim bek lain bilong em i olsem: Ol i save bihainim tok bilong em na Pikinini bilong em. Tingim olsem yu wanpela bilong ol disaipel Juda bilong Jisas long taim bilong ol aposel. Em i bin tokim ol: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten.” (Luk 21:20-22) Sampela yia i lus na yu tingting, long wanem taim ol dispela tok bai kamap tru. Long yia 66 C.E. ol Juda i bikhet na pait long ol Rom. Ami bilong Rom aninit long Sestius Galus ol i banisim Jerusalem na ol i kam inap long banis bilong tempel. Tasol wantu ol Rom i lusim Jerusalem, maski i olsem i no gat as bilong mekim olsem. Orait, ol Juda Kristen bai mekim wanem? Long buk bilong em, Ecclesiastical History (Buk III, sapta V, 3), Yusibius i tok ol i bin ranawe long Jerusalem na Judia. Ol i bin abrusim bagarap, long wanem, ol i bin bihainim tok profet bilong Jisas. Olsem wanem? Yu save amamas long bihainim ol tok bilong Baibel i kam long “bosboi i gat gutpela tingting” em Jisas i bin makim bilong bosim “olgeta samting bilong en”?—Luk 12:42-44.
Kisim Laip i Stap Oltaim
18, 19. (a) Indai bilong Jisas i opim rot long wanem samting? Na em i opim rot long husat? (b) Aposel Pol i tingting strong long mekim wanem?
18 Ol Juda Kristen long Judia i bihainim tok bilong Jisas, olsem na ol i abrusim bagarap. Tasol indai bilong Jisas i mekim na “olgeta manmeri” inap abrusim bagarap na kisim laip i stap oltaim. (1 Timoti 4:10) Taim Adam i mekim sin, em i lus long kisim laip i stap oltaim, na em i mekim na olgeta manmeri bilong graun i kalabus long sin na indai, olsem na ol man i mas i gat wanpela ofa bilong baim bek ol. (Rom 5:12-19) Ol animal ol i givim olsem ofa aninit long Lo Bilong Moses ol i no inap rausim sin olgeta. (Hibru 10:1-4) Jisas i no gat wanpela papa bilong graun, na spirit holi bilong God i bin “karamapim” Maria kirap long taim em i kisim bel na i go inap long taim em i karim Jisas, olsem na em i no gat sin o rong long skin bilong em. (Luk 1:35; Jon 1:29; 1 Pita 1:18, 19) Taim Jisas i dai olsem wanpela man i bin holimpas pasin bilong i stap gut long God na em i no popaia liklik, em i givim laip bilong em i gutpela olgeta bilong baim bek ol man na ol i no ken kalabus moa. (Hibru 2:14, 15) Olsem na Krais “i bin givim laip bilong em yet bilong baim bek olgeta manmeri.” (1 Timoti 2:5, 6) I no olgeta man bai kisim dispela gutpela samting bilong kisim bek ol, tasol God i orait long dispela ofa bai helpim ol man i bilip long en.
19 Krais i givim pe bilong ofa bilong em long God long heven, na long dispela rot em i baim bek ol pikinini bilong Adam. (Hibru 9:24) Olsem na Jisas i kisim wanpela Meri, em ol 144,000 disaipel bilong em God i bin makim long spirit holi na ol i kirap bek na kisim laip long heven. (Efesus 5:25-27; KTH 14:3, 4; 21:9) Na tu, em i kamap “Papa bilong i stap oltaim oltaim” long ol man i bilip long ofa bilong em na ol bai kisim laip i stap oltaim long graun. (Aisaia 9:6, 7; 1 Jon 2:1, 2) Man! Dispela em i wanpela gutpela samting tru! Long namba tu pas aposel Pol i bin raitim long ol Kristen long Korin em i kamapim klia olsem em i bilip tru long dispela samting, olsem stori i kamap bihain long dispela bai kamapim. Tru tumas, Pol i strong bambai em i no ken larim wanpela samting i pasim em long helpim ol manmeri long kisim dispela gutpela samting tru Jehova i bin redim bilong kisim bek yumi na yumi ken kisim laip i stap oltaim.
Bai Yu Bekim Olsem Wanem?
◻ Wanem ol tok bilong Baibel i kamapim olsem God i save kisim bek stretpela lain bilong em?
◻ Olsem wanem yumi save olsem Jehova i save kisim bek ol man i bilip long em na sanap strong?
◻ God i bin mekim wanem bilong kisim bek yumi na yumi ken kisim laip oltaim?
[Piksa long pes 12]
Devit i bilip long Jehova, em “God bilong . . . helpim yumi.” Olsem wanem long yu?
[Piksa long pes 15]
Long olgeta taim Jehova i save kisim bek lain bilong em, olsem em i bin mekim long taim bilong Kwin Esta