Abrusim Bagarap Long De Bilong Jehova
“De bilong Bikpela em i nogut tru. Olsem na husat inap i stap gut na i no bagarap long dispela De?”—JOEL 2:11.
1. Olsem wanem na yumi mas amamas long taim bikpela “de bilong Jehova” i kamap?
“EM I nogut tru”! Profet bilong God, em Joel, em i tok olsem long dispela bikpela “de bilong Jehova.” (NW) Tasol yumi ol manmeri i laikim tru Jehova na yumi dediket pinis long em na bilip long ofa bilong Jisas bilong baim bek ol man, yumi no ken pret na guria long De bilong Jehova i kam klostu. Tru, ol narapela kain samting tru bai kamap long dispela de bilong mekim man i pret, tasol em i wanpela gutpela de bilong kisim bek lain bilong God, na em i de bilong God i kisim bek ol long dispela pasin nogut bilong graun i bin givim bikpela hevi long ol man inap planti tausen yia. Joel i tingim dispela de na em i tokim lain bilong God long “amamas na belgut, long wanem, [God bai] . . . mekim planti gutpela pasin long [ol],” na em i tok moa olsem: “Na samting bai kamap olsem, olgeta manmeri i singaut long nem bilong Jehova ol i no ken bagarap.” (NW) Orait aninit long Kingdom bilong God, “ol man i bin abrusim bagarap ol bai stap long maunten Saion na long Jerusalem, olsem Jehova i tok pinis, na ol man Jehova i bin singautim ol, ol i stap namel long ol man i winim bagarap.” (NW)—Joel 2:11, 21, 22, 32.
2. Bilong kamapim laik bilong God, wanem samting i mas kamap (a) insait long “de bilong Bikpela”? (b) long “de bilong Jehova”?
2 De bilong Jehova em i no dispela “de bilong Bikpela” em Kamapim Tok Hait 1:10 i toktok long en. Long dispela “de bilong Bikpela,” i gat truim bilong 16 samting olsem driman, em Kamapim Tok Hait sapta 1 i go inap 22 i stori long en. Na insait long dispela de i gat truim bilong olgeta samting Jisas i bin tok profet long en bilong bekim askim bilong ol aposel: “Yu tokim mipela, wanem taim ol dispela samting bai i kamap? Wanem mak bai i kamap pastaim, na mipela i ken save, yu [“kam i stap,” NW] na [pasin bilong] dispela graun i laik pinis?” Mak i kamap long graun bilong makim olsem Jisas i kam i stap pinis, dispela mak em ol bikpela ‘pait, bikpela hangre, bel nogut, bikpela sik, na pasin nogut.’ Ol dispela hevi i wok long go bikpela tru, tasol insait long dispela taim Jisas i bin mekim gut bel bilong ol manmeri i pret long God—em i salim ol disaipel bilong em bilong nau long autim “dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Orait nau bikpela samting tru bilong de bilong Bikpela em bai kamap—“las de” bilong dispela pasin i stap long graun, em bikpela De bilong Jehova, em bai kamap. (Matyu 24:3-14; Luk 21:11) Dispela em i De bilong Jehova bilong givim strafe long ol lain nogut bilong Satan ol i stap long graun. “Graun wantaim skai [bai] i guria. Tasol Bikpela bai i lukautim olgeta manmeri bilong en na ol i no inap bagarap.”—Joel 3:16.
Jehova i Kamapim Strafe Long Taim Bilong Noa
3. Olsem wanem ol pasin i stap long graun long nau i wankain olsem long taim bilong Noa?
3 Ol pasin nogut i stap long graun long nau i wankain olsem pasin i bin stap long “taim bilong Noa” inap 4,000 yia samting i go pinis. (Luk 17:26, 27) Long Stat 6:5 yumi kaunim tok olsem: “Bikpela i lukim pasin bilong ol manmeri long olgeta hap i nogut tru. Ol manmeri i tingting tasol long ol samting nogut.” Em i wankain stret long taim bilong yumi, a? Pasin nogut, mangal long mani samting, no gat pasin sori, ol dispela pasin i kamap bikpela long olgeta hap. Sampela taim yumi ting olsem pasin bilong ol man i go nogut olgeta na i no inap i go moa nogut. Tasol tok profet bilong aposel Pol long “taim bilong las de” i wok yet long kamap tru, olsem: “Ol man nogut na ol giaman profet ol bai i wok long giamanim ol manmeri. Na Satan bai i giamanim ol yet tu, na pasin bilong ol bai i kamap nogut tru.”—2 Timoti 3:1, 13.
4. Long bipo tru lotu giaman i bin mekim wanem?
4 Long taim bilong Noa, yu ting lotu inap daunim pasin nogut na givim malolo long ol man? Nogat tru. Ating lotu giaman i bin stap long dispela taim bipo i helpim moa yet ol dispela pasin nogut i bin kamap long dispela taim. Tupela tumbuna bilong pastaim tru ol i kirap bihainim tok giaman bilong ‘dispela snek bilong bipo yet, ol i kolim em Satan.’ Long taim bilong namba tu lain i bin kamap bihain long Adam, “ol man i stat long kolim nem bilong Bikpela”—i olsem ol i tok bilas long nem bilong Jehova. (KTH 12:9; Stat 3:3-6; 4:26) Bihain, ol bikhetlain ensel em ol i bin lusim pasin bilong lotuim God wanpela tasol, ol i kisim skin bilong man bambai ol i ken mekim maritpasin wantaim ol meri i gat naispela skin. Ol dispela meri i kamapim ol pikinini man i olsem hap ensel na hap man, na ol i traipela man tru, ol i kolim Nefilim, na ol i daunim ol man na mekim nogut long ol. Ol ensel nogut i mekim na “olgeta lain manmeri i wok long mekim ol pasin nogut tasol.”—Stat 6:1-12.
5. Taim Jisas i kolim ol samting i bin kamap long taim bilong Noa, em i givim wanem tok lukaut long yumi?
5 Tasol i gat wanpela famili i stap gut long Jehova. “Noa em i man bilong tokaut long stretpela pasin,” olsem na taim God i “mekim bikpela tait i kamap long ol [man i bin givim baksait long em], na ol i lus . . . God i lukautim em wantaim 7-pela manmeri, na ol i stap gut.” (2 Pita 2:5) Dispela bikpela Tait Wara i olsem piksa bilong bikpela De bilong Jehova, em i makim pinis tru bilong dispela pasin nau yumi stap long en, em Jisas i bin tok profet long en olsem: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save. Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap. Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri. Orait wankain pasin tasol bai i kamap long taim Pikinini Bilong Man i kamap.” (Matyu 24:36-39) Yumi stap long wankain taim long nau, olsem na Jisas i tok yumi mas ‘lukaut gut. Oltaim yumi mas was i stap, na yumi mas beten oltaim long God i givim strong long yumi. Olsem na bai yumi abrusim olgeta dispela samting i laik kamap.’—Luk 21:34-36.
Jehova i Givim Strafe Long Sodom na Gomora
6, 7. (a) Ol samting i kamap long taim bilong Lot, dispela i olsem piksa bilong wanem samting? (b) Dispela i givim wanem tok lukaut long yumi?
6 Planti handet yia bihain long Tait Wara, taim ol tumbuna pikinini bilong Noa i kamap planti long graun, gutpela man Abraham wantaim Lot, em pikinini bilong brata bilong em, ol i lukim narapela bikpela De bilong Jehova. Lot wantaim famili bilong em ol i sindaun long taun Sodom. Olkain pasin pamuk nogut tru i kamap long dispela taun wantaim narapela taun i stap klostu, em Gomora. Na ol dispela lain i strong tu long kisim mani kago samting, na bihain dispela tingting i kisim meri bilong Lot tu. Jehova i bin tokim Abraham: “I gat planti tok moa i kamap long ol kain kain pasin nogut tru i wok long kamap long Sodom na Gomora.” (Stat 18:20) Abraham i krai long Jehova long tingim ol stretpela man i stap long dispela tupela taun na em i no ken bagarapim. Tasol Jehova i tokaut olsem em i no inap painim tenpela stretpela man i stap long dispela tupela taun. God i salim tupela ensel i kam helpim Lot wantaim tupela pikinini meri bilong em long ranawe i go long Soar, em wanpela taun i stap klostu.
7 Orait wanem samting i kamap? Luk 17:28-30 i makim olsem “taim bilong las de” yumi stap long en i wankain olsem taim bilong Lot, na em i tok: “Ol manmeri i bin mekim wankain pasin long taim bilong Lot tu. Ol i wok long kaikai na dring i stap na ol i baim na salim ol samting na ol i planim ol gaden na ol i wokim ol haus. Tasol Lot i lusim Sodom na i go, na long dispela de yet paia wantaim ston salfa i pundaun long skai olsem ren, na i bagarapim olgeta manmeri. Orait wankain pasin tasol bai i kamap long de Pikinini Bilong Man i kamap ples klia.” Bagarap i painim Sodom na Gomora long dispela bikpela De bilong Jehova, em i olsem wanpela tok lukaut i go long yumi ol manmeri i stap long taim Jisas i kam i stap. Ol lain manmeri bilong nau ol tu “i bihainim ol pasin nogut na ol i mekim ol narakain pasin pamuk i nogut tru.” (Jut 7) Na tu, tingting bilong ol manmeri long mekim pasin pamuk, em i as bilong planti “bikpela sik” em Jisas i tok profet long ol bai kamap long taim bilong yumi.—Luk 21:11.
“Traipela Raunwin” i Painim Israel
8. Lain Israel i holim strong kontrak bilong Jehova o olsem wanem?
8 Bihain Jehova i makim Israel long ‘kamap lain manmeri bilong em, na bai ol i stap lain manmeri i save mekim wok bilong em olsem ol pris.’ Tasol bilong i stap olsem, ol ‘i mas holim strong kontrak bilong em na bihainim tok bilong em.’ (Kisim Bek 19:5, 6) Em wanpela gutpela samting tru God i mekim long ol, tasol yu ting ol i stap gut long dispela wok? Nogat tru! Tru, wan wan bilong dispela lain ol i stap gut long wok bilong God, olsem Moses, Samuel, Devit, Jehosafat, Hesekia, Josaia, na sampela profet man na profet meri, em ol i givim bel tru long God. Tasol klostu olgeta bilong lain Israel ol i no stap gut long God. Orait bihain ol i bruk i go long tupela lain—lain Israel na lain Juda. Tupela lain wantaim i kirap lotuim ol god bilong ol haiden na bihainim ol narapela pasin nogut bilong ol kantri i stap klostu.—Esekiel 23:49.
9. Jehova i mekim wanem bilong skelim long kot ol bikhetlain Israel long hap bilong not?
9 Orait Jehova i mekim wanem bilong skelim ol long kot? Em i givim toksave long ol, olsem em i save mekim long olgeta taim, na dispela i stret wantaim wanpela lo em Amos i kolim, olsem: “Olgeta samting God, Bikpela i laik mekim, em i save autim pastaim long ol wokman bilong en, em ol profet, na bihain em i save mekim olsem em i bin tok.” Amos yet i tokaut long taim nogut bai painim lain Israel long hap bilong not: “Wanem gutpela samting bai yupela i kisim long dispela de? Yupela i ting bai em i de bilong tulait, a? Nogat tru. Em i de bilong tudak tasol.” (Amos 3:7; 5:18) Na wanwok profet bilong Amos, em Hosea, em i tokaut olsem: “Pasin nogut bilong ol i olsem liklik win tasol, na samting i kamap long dispela pasin bai i bagarapim ol, olsem traipela raunwin bilong bagarapim man.” (Hosea 8:7) Long yia 740 B.C.E., Jehova i mekim wok long ami bilong Asiria bilong bagarapim Israel i stap long hap bilong not na daunim olgeta, inap long olgeta taim bihain.
Jehova i Mekim Kot Long Lain Juda i Bin Lusim Em
10, 11. (a) Bilong wanem Jehova i no laik lusim rong bilong ol Juda? (b) Wanem ol pasin nogut tru i bin bagarapim dispela lain?
10 Na Jehova i bin salim ol profet bilong em i go long lain Juda i stap long hap bilong saut. Tasol ol king bilong Juda olsem Manase na senis bilong em, Emon, ol i wok long mekim ol samting i no stret long ai bilong Jehova—ol i ‘kilim i dai planti stretpela manmeri i no gat rong, na lotu long ol god giaman.’ Tru, pikinini bilong Emon, em Josaia, em i bihainim pasin i stret long ai bilong Jehova, tasol ol king i kamap bihain long em, na ol manmeri tu, ol i kirap gen long mekim ol pasin nogut tru, olsem na Jehova “i no laik lusim dispela rong.”—2 King 21:16-21; 24:3, 4.
11 Long maus bilong profet Jeremaia, Jehova i tokaut olsem: “Samting nogut tru i kamap pinis long dispela graun. Ol profet i autim tok bilong ol yet na giamanim ol manmeri. Na taim ol pris i bosim ol manmeri, ol pris i save bihainim tok bilong ol dispela profet. Na ol manmeri bilong mi i save laikim tumas dispela pasin. Tasol bai mi mekim save long yupela . . . na long dispela taim bai yupela i mekim wanem?” Kantri Juda i gat asua long kilim i dai planti manmeri tru, na lain bilong en ol i mekim ol pasin nogut olsem stil, kilim man i dai, mekim pasin pamuk wantaim ol man na meri marit, mekim tok giaman taim ol i tok tru antap, lotuim ol narapela god, na ol narapela kain pasin nogut. Haus bilong God i kamap olsem “ples hait bilong ol stilman.”—Jeremaia 2:34; 5:30, 31; 7:8-12.
12. Jehova i mekim wanem bilong givim strafe long ol bikhetlain bilong Jerusalem?
12 Jehova i tokaut olsem: “Mi mekim ol birua i lusim hap not [Babilon] na i kam bilong bagarapim yupela nogut tru.” (Jeremaia 4:6) Olsem na Jehova i salim strongpela gavman bilong bosim graun, em Babilon, long dispela taim em i olsem “wanpela hama i bin brukim ol kantri nabaut,” bilong mekim save long ol bikhetlain bilong Jerusalem na haus lotu bilong en. (Jeremaia 50:23) Strongpela ami bilong Nebukatnesar i kam banisim Jerusalem, na long yia 607 B.C.E. em i kisim dispela taun. “Ol Babilon i bin kisim tu ol pikinini man bilong [King] Sedekaia na ol hetman bilong Juda, na ol i bringim ol i kam long Ripla. Na long dispela ples Nebukatnesar i tok na ol i kilim i dai ol pikinini man bilong Sedekaia long ai bilong Sedekaia. Na tu ol i kilim ol hetman bilong Juda. Na king i tok, na ol i kamautim tupela ai bilong Sedekaia na ol i pasim hanlek bilong en long sen, bilong ol i ken kisim em i go long Babilon. Na long Jerusalem ol soldia bilong Babilon i kukim haus king na ol haus bilong ol manmeri. Na ol i brukim ol banis bilong Jerusalem. Na Nebusaradan, em namba wan ofisa bilong ol soldia bilong Babilon i stap long Jerusalem, em i kisim olgeta manmeri i stap yet long Jerusalem na bringim ol i go kalabus long Babilon. Na em i kisim ol Juda i bin lusim Jerusalem na i ranawe i go long em bipo, na em i bringim ol tu i go kalabus long Babilon.”—Jeremaia 39:6-9.
13. Long De bilong Jehova i kamap long yia 607 B.C.E., Jehova i kisim bek husat na ol i stap gut? I gat wanem as na Jehova i kisim bek ol?
13 Tru tumas, em de bilong pret nogut tru long en! Tasol wan wan man i bin bihainim tok bilong Jehova ol i insait long dispela lain ol i abrusim bagarap na i stap gut long dispela taim nogut bilong kot. Sampela namel long ol em ol Rekap, ol i no bilong lain Israel, tasol ol i mekim pasin daun na pasin bilong bihainim tok—em i narapela kain long pasin bilong ol Juda. Na sampela moa i abrusim bagarap, em gutpela man Ebetmelek, em i bin pulim Jeremaia i kam antap long wanpela hul i gat graun malumalum long en, olsem na Jeremaia i no dai. Na gutpela man Baruk, em kuskus bilong Jeremaia, em tu i abrusim bagarap. (Jeremaia 35:18, 19; 38:7-13; 39:15-18; 45:1-5) Em ol kain man Jehova i tokaut long ol olsem: “Mi tingim pinis ol samting mi laik mekim bilong helpim yupela. Mi laik mekim gut long yupela. Mi no laik mekim nogut long yupela. Yupela i ken tingim ol dispela samting mi laik mekim, na yupela i ken wetim dispela taim i kamap.” Wanpela liklik truim bilong dispela tok promis i kamap long yia 539 B.C.E., taim King Sairus, em man i bin winim pait na kisim Babilon, em i orait long ol Juda i pret long God ol i ken lusim Babilon, na ol i go bek long Jerusalem bilong wokim gen taun na haus lotu bilong en. Ol manmeri bilong nau i lusim ol lotu i wankain olsem lotu bilong Babilon na ol i kam bek na lotu tru long Jehova, ol tu inap wetim gutpela taim tru i kamap bihain, na ol bai stap bel isi inap oltaim oltaim long Paradais Jehova bai kamapim bek.—Jeremaia 29:11; Song 37:34; KTH 18:2, 4.
“Bikpela Hevi Tru” i Kamap Long Taim Bilong Ol Aposel
14. Bilong wanem Jehova i rausim lain Israel inap long olgeta taim bihain?
14 Orait nau yumi ken tingim taim bilong ol aposel. Long dispela taim ol Juda em ol i bin kam bek long graun bilong ol, ol i lusim gen bilip tru na ol i givim baksait long God. Jehova i salim Pikinini bilong em i kam long graun bilong kamap olsem Man God i Makim, olsem Mesaia. Kirap long yia 29 i kam inap long yia 33 C.E., Jisas i raun long olgeta hap bilong Israel na em i autim tok olsem: “Yupela i mas tanim bel, long wanem, kingdom bilong heven em i kam klostu pinis.” (Matyu 4:17) Na tu, em i bungim sampela disaipel na skulim ol bambai ol i ken wok wantaim em long autim gutnius bilong Kingdom. Orait, ol hetman bilong lain Juda ol i mekim wanem? Ol i toknogutim em na bihain ol i mekim bikpela rong tru—ol i mekim na ol man i nilim em long pos na givim bikpela pen long em na kilim em i dai. Jehova i rausim ol Juda na em i no laik bai ol i stap olsem lain bilong em. Nau em i rausim ol olgeta na em i no kisim bek ol moa.
15. Ol Juda i tanim bel pinis ol inap mekim wanem?
15 Long de Pentikos bilong yia 33 C.E., taim Jisas i kirap bek pinis, em i kapsaitim spirit holi i kam daun, na dispela i strongim ol disaipel bilong em long autim tok long kain kain tok ples long ol Juda na ol narapela lain i bihainim lotu Juda, em kwiktaim ol i bin kam bung. Aposel Pita i tokaut long dispela bikpela lain olsem: “Dispela man Jisas, God i kirapim em pinis long matmat. Mipela olgeta i lukim em bihain long em i kirap bek, na mipela i save tokaut long ol samting mipela i lukim. . . . Olsem na yupela olgeta lain Israel, yupela i mas save gut olsem, dispela Jisas yupela i nilim em long diwai . . . , God i makim em i stap Bikpela, na man bilong kisim bek ol manmeri bilong en.” Ol Juda i gat gutpela bel ol i mekim wanem long taim ol i harim dispela tok? “Dispela tok i sutim tru bel bilong ol,” na ol i pilim tru ol sin bilong ol na ol i tanim bel na kisim baptais. (Aposel 2:32-41) Wok bilong autim tok bilong Kingdom i go bikpela hariap, na insait long 30 yia ol i autim long “olgeta manmeri i stap long graun.”—Kolosi 1:23.
16. Olsem wanem Jehova i stiaim ol samting i go na bihain em i givim strafe long lain Israel bilong skin?
16 Orait nau taim i kamap bilong Jehova i mas givim strafe long lain bilong em bipo em i bin rausim ol, em lain Israel bilong skin. Planti tausen manmeri, em ol i bilong ol lain bilong graun ol man i save long en long bipo, ol i bin kam insait long lain Kristen na God i bin makim ol long spirit holi olsem “Israel tru bilong God,” em ol Israel bilong spirit. (Galesia 6:16) Tasol long dispela taim bipo ol Juda i bihainim pasin olsem birua birua na ol i brukim lain na ol i pait. Ol i no bihainim tok Pol i bin raitim, olsem “olgeta man i mas i stap aninit long ol gavman,” nogat; ol i bikhet na pait long gavman bilong Rom ol i stap aninit long en. (Rom 13:1) Yumi ken ting Jehova yet i stiaim ol samting i kamap bihain long dispela. Long yia 66 C.E., Jeneral Galus i bringim bikpela lain ami bilong Rom i kam bilong banisim Jerusalem. Ol i pait long ol Juda na wokim hul aninit long banis bilong haus lotu bilong mekim banis i pundaun. Olsem stori bilong Josifas i tok, bikpela hevi tru i painim dispela taun na ol manmeri i stap long en.a Tasol wantu ol ami bilong Rom i kirap ranawe. Dispela i givim rot long ol disaipel bilong Jisas long “ranawe i go long ples maunten,” olsem Jisas i tokim ol long mekim long tok profet bilong em i stap long Matyu 24:15, 16.
17, 18. (a) Jehova i givim strafe long lain Juda long rot bilong wanem bikpela hevi? (b) Husat ol “i no ken bagarap”? Dispela i olsem piksa bilong wanem samting?
17 Tasol strafe tru bilong kot bilong Jehova long laspela hap bilong dispela bikpela hevi tru em i no kamap yet. Orait long yia 70 C.E., Jeneral Taitus i bringim ol ami bilong Rom i kam bek bilong mekim pait long Jerusalem. Nau ol Rom bai win tru! Ol Juda i bin pait namel long ol yet, na ol i no inap sakim ol Rom. Taun wantaim haus lotu bilong en, ol Rom i bagarapim olgeta. Ol Juda i bun nating na ol i no gat strong moa. Inap wan milion ol i kisim bikpela pen na ol i dai, na ol Rom i tromoi skin bilong 600,000 Juda i go ausait long banis bilong taun. Taim ol i kisim pinis taun, ol i kisim 97,000 Juda i go kalabus, na bihain planti ol i dai long ol pait ol i mas mekim insait long ol bikpela haus spot bilong ol Rom. Tru tumas, ol manmeri God i kisim bek ol long taim bilong dispela bikpela hevi tru, em ol Kristen i bihainim tok bilong Jisas na ol i bin ranawe i go brukim wara Jordan na i go long ples maunten.—Matyu 24:21, 22; Luk 21:20-22.
18 Em nau, namba wan truim bilong bikpela tok profet bilong Jisas long pinis bilong dispela pasin i stap long graun, em i kamap pinis taim De bilong Jehova bilong givim strafe long dispela bikhetlain Juda i kamap long yia 66 i go inap long yia 70 C.E. (Matyu 24:3-22) Tasol dispela i liklik piksa tasol bilong dispela bikpela “de bilong Jehova” i laik kamap, em laspela bikpela hevi tru klostu nau bai kamap long olgeta hap bilong graun. (Joel 2:31) Orait, olsem wanem yu inap i stap gut na ‘yu no ken bagarap’? Stori i kamap bihain long dispela em bai toktok long dispela samting.
[Futnot]
a Stori bilong Josifas i tok, ol Rom i banisim Jerusalem, na ol i wokim hul aninit long banis bilong mekim dispela hap banis i pundaun, na ol i redi long kirapim paia na kukim dua bilong banis bilong haus bilong Jehova. Dispela i mekim na planti Juda i kalabus insait long taun ol i pret nogut tru, long wanem, ol i lukim pinis olsem dai i laik painim ol.—Buk Wars of the Jews, Buk II, sapta 19.
Ol Askim Bilong Tingim Gen
◻ Olsem wanem “de bilong Bikpela” i poroman wantaim “de bilong Jehova”?
◻ Yumi stori pinis long taim bilong Noa, olsem na yumi mas putim gut yau long wanem tok lukaut?
◻ Olsem wanem Sodom na Gomora i olsem piksa bilong skulim yumi?
◻ Long “bikpela hevi tru” i bin kamap long taim bilong ol aposel, Jehova i kisim bek husat na ol i stap gut?
[Ol Piksa long pes 15]
Jehova i wokim rot bambai famili bilong Noa na Lot i ken abrusim bagarap, na em i mekim olsem tu long yia 607 B.C.E. na yia 70 C.E.