Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Yu ken traim bekim ol dispela askim i stap daunbilo:

• Long wanem rot God i ken mekim yu kamap maniman?

Long bipo, Jehova i bin blesim sampela man olsem Abraham na Solomon, na em i givim planti mani kago samting long ol. Tasol ol gutpela samting em ol Kristen i mas kisim na God inap helpim man long kisim, em ol samting olsem bilip, bel isi, pasin bilong stap belgut, na amamas.​​—9/1, pes 3-7.

• Yumi inap kisim wanem skul long Jisas long em i bin helpim Pita taim em i sink long solwara? (Mt. 14:​28-31)

Sapos wanpela brata i sot long bilip, orait yumi ken helpim em long strongim bilip.​​—9/15, pes 8.

• Jehova i givim wanem bikpela pe bilong kisim bek yumi?

Jehova i strongim bel na karim hevi taim ol man i givim pen long Pikinini bilong em na tok bilas long em. Na olsem Abraham i bin redi long givim pikinini bilong em olsem ofa, Jehova tu i bin redi long mekim olsem taim ol man i kilim i dai Pikinini bilong em olsem wanpela man nogut.​​—9/15, pes 28-29.

• Bilong wanem Kodeks Bilong Vatiken em i wanpela gutpela samting tru?

Em wanpela manuskrip bilong tok Grik, em i bin stap klostu 300 yia samting bihain long ol i bin pinisim wok bilong raitim Baibel olgeta. Em i gat klostu olgeta tok bilong Ol Skripsa Hibru na Ol Skripsa Grik. Em wanpela tul ol saveman i yusim bilong skelim wanem ol tok i bin stap long Baibel bilong bipo.​​—10/1, pes 18-20.

• Wanem insait bilong dispela tok “wokim haus” long Sindaun 24:27?

Man husat i tingting long marit, em i mas redi long mekim ol wok bilong marit. Dispela i makim olsem em i mas redi long lukautim famili bilong em long ol samting bilong skin, na go pas long ol samting bilong spirit insait long famili.​​—10/15, pes 12.

• Bilong wanem i no stret long tok olsem ol Witnes Bilong Jehova ol i wanpela lotu Protestan?

Ol man i bin kirapim lotu Protestan long ol yia bihain long 1500 long Yurop, long wanem, ol i laik kamapim sampela nupela senis insait long Misin Katolik. Dispela tok “Protestan” i makim olgeta lain husat i bihainim ol stiatok na ol nupela senis em dispela nupela lotu i kamapim. Ol Witnes Bilong Jehova i no tingim pop olsem man i gat namba long bosim olgeta man, na ol i givim bel tru long sapotim Baibel olsem em i nambawan buk tru, tasol ol i sakim ol bilip i pait wantaim tok bilong Baibel na ol pasin bilong lotu em ol lotu Protestan i save bihainim.​​—11/1, pes 19.

• Yu ting yu mas lain long tok Hibru na tok Grik bilong kliagut long Baibel?

Nogat. Maski man i gat save long tok Hibru o tok Grik, dispela yet i no inap helpim em long kisimgut ol tok bilong Baibel. Man husat i skul long ol dispela tokples, em i gat wok long skelim ol dikseneri na ol buk i kamapim ol lo bilong ol dispela tokples bilong helpim em. God i mekim na ol tok em nambawan Wokman bilong em i mekim i no ken lus, na ol dispela tok i stap long Baibel ol i bin tanim long tokples em planti manmeri i save long en, na dispela i makim olsem man inap yusim na lainim tok i tru bilong Baibel em ol i bin tanim tok bilong en long ol tokples bilong nau.​​—11/1, pes 20-23.

• Olsem wanem Jehova na Jisas i stap gutpela piksa long yumi ken bihainim gutpela pasin?

Maski Jehova em i King bilong heven na graun, em i mekim gutpela pasin na pasin rispek long ol man. Taim em i toktok long Abraham na Moses, em i yusim wanpela tok Hibru ol i save tanim planti taim olsem “plis.” (Stt. 13:​14, NW; Kis. 4:​6, NW) God i save putim yau tu long tok bilong ol man. (Stt. 18:​23-32) Jisas tu i mekim olsem, em i amamas na redi long helpim ol man, na tu, Jisas i soim rispek long ol man long rot bilong kolim nem bilong ol.​​—11/15, pes 25.

• Bilong wanem ol Kristen i no insait long selebretim Nuyia Bilong Ol Saina?

Nuyia Bilong Ol Saina em namba wan bikpela de long kalenda bilong ol Esia. Ol samting i insait long dispela bung em pasin bilong soim rispek long ol spirit, na tu, ol i laik bai gutpela samting i ken painim ol famili, ol pren na ol wanblut. Ol Kristen i save givim ona na rispek long papamama bilong ol, tasol ol i no save insait long ol kain bung olsem we astingting bilong en i bilong mekim samting bilong pas gut wantaim ol tumbuna i dai pinis, o askim ol long lukautim ol.​​—12/1, pes 20-23.