Sakim Ol Tok Bilong Satan Long Giamanim Yu

‘NO KEN larim ol i giamanim yupela. God bilong yupela bai i no inap helpim yupela. Larim mi i kisim taun bilong yupela na bai yupela i no dai!’ Rabsake, wanpela ofisa bilong King Senakerip bilong Asiria, i givim dispela kain tok long ol lain bilong Jerusalem. Ami bilong king i bin kam insait long graun bilong Juda. Tok bilong dispela ofisa i bilong pretim na bagarapim bel bilong ol manmeri bilong Jerusalem na bai ol i larim ol Asiria i kisim taun bilong ol.​—2 Kin. 18:​28-35.

Ol Asiria i gat nem long mekim nogut tru long ol man. Bilong mekim ol birua i pret nogut tru long ol, ol i save tokaut long olgeta samting nogut tru ol i save mekim long ol man ol i bin kisim na kalabusim ol. Saveman Philip Taylor i tok, “ol i save mekim ol tok bilong pretim tru ol man na mekim ol tok giaman, bambai ol lain ol i daunim pinis ol bai stap aninit long ol. Na ol i laik pretim ol lain husat inap kamap birua bilong ol, na stori long ol samting nogut tru ol i bin mekim long ol narapela lain na ol i mekim ol tok bilong bagarapim tru tingting bilong ol.” Ol tok giaman i gat bikpela strong. Taylor i tok, ol kain tok olsem i save “bagarapim tru tingting.”

Ol Kristen tru ‘i no save pait long ol manmeri, nogat, ol i pait long ol strongpela spirit,’ em ol spirit husat i bin bikhet long God. (Ef. 6:12) Nambawan bilong ol em Satan. Em tu i save pretim ol man na kamapim ol tok giaman bilong bagarapim tingting.

Satan i tok em inap mekim yumi olgeta wan wan i lusim Jehova. Long taim bilong Jop em i bin tokim God Jehova: “Sapos wanpela man i laik i stap gut, em inap givim olgeta samting bilong en bilong baim bek laip bilong en.” Satan i laik tok, sapos em i putim presa long man, bihain man bai i no stap gut moa long God. (Jop 2:4) Yu ting tok bilong Satan i tru? Yu ting yumi olgeta i gat mak bilong karim ol pen na hevi na sapos yumi kisim sampela hevi moa antap long dispela mak, bai yumi lusim ol lo bilong God bambai yumi ken i stap laip? Satan i laik bai yumi ting olsem. Olsem na em i save mekim wok long olkain tok giaman bilong putim dispela tingting long bel bilong yumi. Orait nau yumi ken stori long sampela rot bilong Satan long mekim olsem, na olsem wanem yumi ken sakim em.

“God i Bin Kisim Graun na Wokim Bodi Bilong Ol Man”

Satan i yusim Elifas, em wanpela bilong 3-pela poroman bilong Jop i bin kam lukim em na tok pait long em olsem ol man i no gat strong long sakim Satan. Elifas i tokim Jop olsem “ol man i samting bilong graun tasol,” na “God i bin kisim graun na wokim bodi bilong ol man, na ol i save dai kwiktaim tru olsem ol bataplai man i krungutim. Wanpela man inap i stap gut long moning, na long apinun em inap i dai na ol arapela manmeri i no tingim em moa.”​—Jop 4:​19, 20.

Sampela narapela ves bilong Baibel i tok yumi i olsem “ol sospen graun”​—em ol sospen i save bruk hariap. (2 Ko. 4:7) Yumi no gat strong, long wanem, yumi bin kisim sin long papamama. (Ro. 5:12) Sapos yumi no gat helpim, bai ol spia bilong Satan inap sutim yumi. Tasol yumi ol Kristen i gat helpim i stap. Maski yumi no gat strong, God i laikim tru yumi. (Ais. 43:4) Na Jehova i save givim holi spirit long ol man i askim em. (Lu. 11:13) Spirit bilong em inap givim yumi “bikpela strong . . . em i strong bilong God,” bambai yumi inap karim olgeta kain hevi Satan i givim long yumi. (2 Ko. 4:7; Fl. 4:13) Sapos yumi sakim Satan na “stap strong long bilip,” God bai mekim yumi i sanap strong. (1 Pi. 5:​8-10) Olsem na yumi no ken pret long Satan.

Man i “Laikim Tumas Long Mekim Pasin Nogut”

Elifas i tok: “I no gat wanpela man o meri i stretpela na i klin long ai bilong God.” Na em i tok moa: “God i save lukim sampela pasin bilong ol [ensel] i no stret. Na ol samting bilong heven tu i no klin long ai bilong en. Tasol yumi man bilong graun, yumi no gutpela liklik. Pasin bilong yumi i sting olgeta. Yumi save laikim tumas long mekim pasin nogut, olsem man i dai long dring wara taim nek bilong en i drai.” (Jop 15:​14-16) Elifas i tokim Jop olsem Jehova i no save tingim wanpela man i stretpela man. Na Satan tu i laik bagarapim tingting bilong yumi olsem. Em i laik bai yumi tingting planti long ol popaia yumi bin mekim bipo, na bel i kotim yumi tumas na yumi ting God i no inap tru long kisim bek yumi. Na Satan i laik bai yumi ting Jehova i putim mak i antap tumas long yumi mas winim, na long ting Jehova i no gat bikpela pasin sori na pasin bilong lusim rong na pasin bilong helpim ol man.

Tru, yumi olgeta man ‘i bin mekim sin na i sot long kamapim ol gutpela pasin bilong God.’ I no gat wanpela sinman long graun inap bihainim tru ol lo bilong Jehova em ol i stret olgeta. (Ro. 3:​23, NW; 7:​21-23) Tasol dispela i no makim olsem yumi samting nating long ai bilong em, nogat. Jehova i save, “dispela snek bilong bipo yet . . . ol i kolim em Satan,” em i laik paulim yumi long rot bilong sin i stap long skin bilong yumi. (KTH 12:​9, 10) God i tingim “yumi i olsem das tasol,” olsem na em i no save “kros nating long yumi.”​—Sng. 103:​8, 9, 14.

Sapos yumi lusim ol pasin nogut yumi bin mekim na yumi bel hevi long ol rong yumi bin mekim na beten long Jehova, orait ‘em bai lusim sin bilong yumi.’ (Ais. 55:7; Sng. 51:17) Baibel i tok, maski ol sin bilong yumi i mekim na yumi “stap olsem waitpela laplap em retpela pen i bagarapim pinis,” bai yumi “inap kamap waitpela gen olsem ais.” (Ais. 1:18) Olsem na yumi mas pasim tok long bel olsem yumi no ken givap long mekim laik bilong God.

Yumi ol sinman, olsem na yumi no inap kamap stretpela man long ai bilong God long rot bilong ol wok yumi mekim, nogat. Adam na Iv i no stap moa olsem gutpela olgeta, na ol i no inap kisim laip i stap gut oltaim, na dispela hevi i painim yumi olgeta. (Ro. 6:23) Tasol Jehova i laikim tru ol manmeri bilong graun, olsem na em i wokim rot bilong lusim ol sin bilong yumi sapos yumi bilip long ofa bilong Pikinini bilong em, Jisas Krais. (Mt. 20:28; Jo. 3:16) Tru tumas, “marimari bilong God” i bikpela tru! (Ta. 2:11) God inap tru long kisim bek yumi long ol sin bilong yumi! Olsem na yumi no ken larim Satan i kirapim yumi long ting God bai i no mekim olsem.

“Bagarapim Bodi Bilong En”

Satan i tok Jop bai lusim bilip bilong em sapos bikpela sik i painim em. Satan i tokim Jehova: “Mi laik bai yu bagarapim bodi bilong en, na bai yu lukim em i tok nogut tru long yu.” (Jop 2:5) Birua bilong God bai amamas sapos em inap mekim yumi i ting yumi no inap mekim wanpela gutpela wok, long wanem, yumi gat sik o sampela bagarap long bodi.

Tasol Jehova i no save givim baksait long yumi taim yumi no inap mekim moa ol wok bilong em olsem bipo yumi bin mekim. Olsem wanem sapos ol raskol i paitim pren bilong yumi na bagarapim skin bilong em? Bai yumi tingim em i olsem samting nating, long wanem, nau em i no inap mekim ol wok olsem bipo em i bin mekim? Nogat tru! Bai yumi laikim em yet na lukautim em​—na moa yet sapos em i bin kisim bagarap long taim em i mekim ol samting bilong helpim yumi. Orait yu ting Jehova i no inap mekim gutpela pasin olsem long yumi? Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat.”​—Hi. 6:10.

Baibel i stori long “wanpela rabismeri, man bilong en i dai pinis,” ating em i bin helpim wok lotu bilong God inap planti yia. Taim Jisas i lukim em i tromoi “tupela liklik mani” i go long bokis, yu ting Jisas i ting meri hia wantaim liklik mani em i bin tromoi i olsem samting nating? Nogat. Em i litimapim nem bilong meri, long em i bin mekim olgeta samting em inap mekim bilong helpim lotu i tru.​—Lu. 21:​1-4.

Sapos yumi stap gut long Jehova, yumi ken bilip tru olsem bai yumi pas gut wantaim em, maski sin i mekim na yumi go lapun o bikpela sik i painim yumi. God i no inap tru long lusim ol manmeri i stap gut long em, maski sik samting i mekim na ol i no inap mekim bikpela wok bilong God.​—Sng. 71:​9, 17, 18.

Tingting Long God Bai Kisim Bek Yumi

Olsem wanem yumi inap lukautim yumi yet na bai ol tok bilong Satan i no inap giamanim yumi? Aposel Pol i tok: “Yupela i pas wantaim Bikpela, olsem na yupela i mas tingting long olgeta bikpela strong bilong en, na yupela i mas sanap strong. Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.” Wanpela hap klos pait bilong spirit, em “hat kapa,” olsem yumi tingting long God bai kisim bek yumi. (Ef. 6:​10, 11, 17) Bilong sakim ol tok bilong Satan long giamanim yumi, yumi mas kisim dispela hat kapa na putim long het na no ken rausim. Hat kapa bilong soldia i save lukautim het bilong em. Pasin bilong “wetim God i kisim bek yumi”​—olsem yumi bilip strong long God bai truim ol tok promis bilong em long kamapim nupela taim​—dispela bai lukautim tingting bilong yumi na ol tok giaman bilong Satan i no ken bagarapim tingting. (1 Te. 5:8) Oltaim yumi mas tingting long gutpela samting yumi wetim, na yumi mas stadi gut oltaim long Baibel.

Satan i bin biruaim Jop na mekim nogut tru long em, tasol Jop i stap strong na karim dispela hevi. Jop i bilip strong long kirap bek, na maski i luk olsem em bai i dai, em i no lusim Jehova, nogat. Em i tokim Jehova: “Bai yu ting long yu yet yu bin wokim mi, na . . . bai yu singautim mi na bai mi lusim dispela ples.” (Jop 14:15) Maski Jop i mas i dai bilong stap gut long God, em i bilip olsem pasin bilong God long laikim tru ol gutpela wokman bilong em bai kirapim Em long singautim ol long lusim matmat na kirap bek.

Yumi tu i mas i gat wankain bilip olsem long dispela God tru. Jehova inap stretim olgeta samting nogut em Satan na lain bilong em i mekim long yumi. Na tingim tu dispela tok bilong Pol: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. . . . God bai i wokim rot bilong helpim yupela. . . . Em bai i mekim yupela i sanap strong, na dispela traim bai i no inap daunim yupela.”​—1 Ko. 10:13.

[Piksa long pes 20]

Jehova i save tingim tru ol wok yu mekim

[Piksa long pes 21]

Kisim hat kapa, olsem tingting long God i laik kisim bek yumi, na no ken rausim