Askim

Wanem samting i mekim na man inap tingting long kisim baptais gen?

Long sampela kain taim, wanpela man o meri i baptais pinis em inap tingting olsem baptais bilong em i no bin winim mak tru bilong en, na ating em i tingting long kisim baptais gen. Olsem: Long taim em i kisim baptais, ating sampela samting long i stap bilong en i bin stap hait, o em i mekim sampela samting em kongrigesen inap rausim em long en sapos em i baptais pinis. Yu ting em inap dediket long God long kain taim olsem? Kain man olsem em inap dediket tru long Jehova sapos em i bin lusim pinis ol pasin i no stret wantaim ol tok bilong Baibel. Olsem na sapos man o meri i bin kisim baptais taim em i mekim yet sampela rong, ating i stret em i ken tingting long em i mas kisim baptais gen.

Orait olsem wanem sapos man o meri i no bin wok long mekim rong long taim em i kisim baptais, tasol bihain em i bin mekim sampela rong na ol i mas wokim wanpela komiti bilong harim kot? Ating em i tok em i no bin kliagut long samting em i bin mekim long taim em i kisim baptais, na em i tok em i bin baptais nating. Taim ol elda i bung wantaim dispela man i bin mekim rong, ol i no ken mekim sampela tok i makim olsem ating em i bin baptais nating, na ol i no ken askim em olsem em i ting dediket na baptais bilong em i stret o nogat. Em i bin harim wanpela tok bilong Baibel i stori long ol bikpela samting baptais i makim. Em i bin bekim tok “yes” long ol askim ol i mekim long dediket na baptais. Em i bin senisim klos bilong em na ol i bin putim em i go insait olgeta long wara. Olsem na i stret yumi ken ting olsem em i bin kliagut long samting em i mekim, em i bikpela samting tru. Ol elda bai tingim em olsem man i baptais pinis.

Sapos dispela man o meri i kamapim tingting bilong em olsem em i ting em i bin baptais nating, ol elda i ken tokim em long lukim The Watchtower bilong Mas 1, 1960, pes 159 na 160, na The Watchtower bilong Februeri 15, 1964, pes 123 i go 126, i toktok gut long pasin bilong kisim baptais gen. Long sampela kain taim​—olsem man i no bin i gat gutpela save long Baibel long taim em i kisim baptais​—na bihain em i kisim baptais gen, dispela em i samting bilong em yet.

Ol Kristen i mas tingim gut wanem ol samting taim ol i laik kisim ples slip wantaim ol narapela?

Olgeta man i mas i gat ples slip. Tasol long nau planti manmeri i no gat haus bilong ol yet. Sampela i sot long mani, o ol i gat bikpela sik, o ol i gat sampela narapela hevi i mekim na ol i mas sindaun wantaim sampela wanblut o famili long wanpela haus. Long sampela hap bilong graun, planti wanblut i save slip long wanpela rum tasol.

Em i no wok bilong oganaisesen bilong Jehova long wokim lista bilong ol lo i makim wanem kain ples slip i stret long olgeta bratasista long olgeta hap bilong graun. Oganaisesen i laik kirapim ol Kristen long skelim ol stiatok bilong Baibel bambai ol i ken save, sindaun bilong ol long ples slip bilong ol i stret long ai bilong God o nogat. Wanem sampela stiatok ol i ken tingim?

Wanpela bikpela samting yumi mas tingim i olsem: Sapos yumi kisim ples slip wantaim sampela lain, dispela bai mekim wanem long pasin bilong yumi na long pasin bilong yumi long tingim ol samting bilong spirit? Ol i wanem kain lain? Ol i save lotuim Jehova? Ol i save bihainim ol lo bilong Baibel? Aposel Pol i tok: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ ”​—1 Ko. 15:33.

Baibel i tok, Jehova i nolaik tru long pasin pamuk na pasin adaltri. (Hi. 13:4) Olsem na sapos long ples slip i gat ol man na meri singel i stap wantaim olsem man na meri marit, yumi save, God i no orait liklik long dispela. Wanpela Kristen i no ken sindaun wantaim ol lain i save mekim pasin pamuk.

Na tu, Baibel i tokim olgeta man husat i laik bai God i orait long ol, long ol i mas “stap longwe long pasin pamuk.” (1 Ko. 6:18) Olsem na em i savetingting sapos Kristen i abrusim olkain ples slip we inap pulim ol long mekim pasin pamuk. Olsem: Sapos sampela Kristen i slip long wanpela haus, yu ting i gat sampela samting inap pulim ol long mekim pasin i no stret? Olsem wanem sapos man na meri singel tupela tasol i stap long haus, long wanem, inap sotpela taim tasol ol narapela lain bilong haus ol i no stap? Na i wankain tu sapos wanpela man singel i gat laik long wanpela meri na meri tu i gat laik long em na tupela i sindaun wantaim long wanpela haus, sampela traim inap kamap na pulim tupela long mekim pasin pamuk. Em i savetingting long abrusim ol kain ples slip olsem.

Na tu, tupela marit husat i katim marit pinis, i no stret long ol i sindaun yet long wanpela haus. Bipo tupela i bin slip wantaim, olsem na nogut dispela i pulim ol long mekim pasin pamuk.​—Snd. 22:3.

Narapela samting yumi mas tingim na em tu i bikpela samting, i olsem: Komiuniti yumi stap long en i ting olsem wanem long ples slip na sindaun bilong yumi? Sapos Kristen i ting sindaun bilong em long ples slip i orait, tasol sampela long komiuniti i gat tok long en, orait Kristen i mas tingim gut dispela samting. Yumi no laik bai pasin bilong yumi i bagarapim nem bilong Jehova. Pol i tok: “Yupela i mas ting long ol Juda na ol Grik na ol manmeri bilong sios bilong God, na yupela i no ken mekim olkain pasin inap long mekim ol i pundaun long sin. Mi tu, mi save mekim olgeta samting inap long olgeta man i ken laikim olgeta pasin mi mekim. Mi no save wok long helpim mi yet. Mi wok long helpim ol arapela manmeri, bai God i ken kisim bek ol.”​—1 Ko. 10:​32, 33.

Tru, ol man husat i laik bihainim ol stretpela lo bilong Jehova, sampela taim i hatwok tru long ol i painim ples slip na sindaun i stret long ol Kristen. Tasol ol Kristen i mas wok long “kisim save long ol pasin Bikpela i save laikim.” Ol i mas save tru olsem i no gat wanpela pasin nogut i kamap long haus bilong ol. (Ef. 5:​5, 10) Bilong mekim olsem, ol Kristen i mas beten askim God long soim rot long ol, na ol i mas mekim olgeta samting bambai ol i ken lukautim narapela narapela long skin na bihainim pasin i stret na lukautim gutnem bilong Jehova.