Yumi Ken Bilip Tru Olsem Baibel Em i Tok Bilong God
WANEM mining bilong tok bilong aposel Pol olsem “Spirit bilong God yet i bin kamapim olgeta tok” i stap long Baibel? (2 Timoti 3:16) Pol i raitim dispela tok long tok Grik, na em i yusim wanpela hap tok, mining bilong en “God i winim win.” Dispela i makim olsem long rot bilong holi spirit, God i stiaim ol man bilong raitim Baibel long raitim tasol ol tok em God i laik ol i mas raitim.
Aposel Pita i tok, “Holi Spirit yet i kirapim ol man [bilong raitim Baibel] na ol i autim tok God i givim long ol.” (2 Pita 1:21) Olsem na aposel Pol i kolim ol buk bilong Baibel olsem “ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.”—2 Timoti 3:15.
Planti man i tok God i no as bilong ol tok bilong Baibel. Sampela man bilong skelim ol tok bilong Baibel—em Bikman Charles Marston i tok long pasin bilong ol olsem ol i man “i no laikim tru ol tok bilong Baibel”—ol i bin sutim tok long Baibel na tok ol tok bilong en i no tru. Sampela i tok em “ol stori tumbuna tasol.”
Skelim Gut
Orait olsem wanem? Yu inap trastim ol tok bilong Baibel o nogat? Em i bikpela samting yu skelim gut. Bilong wanem? Long wanem, sapos Baibel i gat ol tok bilong God long en, em bai longlong pasin sapos yu givim baksait long en—na laip tu bilong yu inap lus sapos yu sakim. Sapos yu tingim ol tok bilong Baibel olsem bilong man tasol na i no bilong God, dispela inap daunim strong bilong Baibel long stiaim ol samting yu mekim na bilip long en.—1 Tesalonaika 2:13.
Olsem wanem yu ken save olsem yu inap trastim Baibel o nogat? Orait, olsem wanem yu save olsem yu inap trastim wanpela man yu bungim? Yumi save olsem em hatwok tru long trastim man em yu no save gut long em. Tasol sapos insait long sampela hap taim yu wok long kisim gut save long em, orait nau bai yu inap save olsem em i man bilong bihainim stretpela pasin na yu inap trastim em o nogat. Long wankain pasin yu inap save long Baibel. No ken bilipim nating ol tok i daunim bilip long Baibel. Lusim sampela hap taim long skelim ol samting i sapotim ol tok em Baibel yet i mekim olsem “Spirit bilong God yet i bin kamapim olgeta tok” i stap long en.
Ol Tisa Bilong Lotu i Sutim Tok Long Baibel
Sampela tisa bilong lotu ol i sutim tok long Baibel, tasol no ken larim dispela i pasim yu. Buk New Dictionary of Theology i tok, long nau, planti man bilong skelim ol tok bilong Baibel, em ol i tok ol i Kristen, ol i “stori long Baibel olsem em i tok bilong man tasol.”
Planti tisa bilong lotu ol i tok pait long husat tru i bin raitim ol buk bilong Baibel. Olsem: Sampela i tok olsem profet Aisaia i no bin raitim Buk Aisaia. Ol i tok ol narapela i bin raitim dispela buk planti yia bihain long taim bilong Aisaia. Buk Concise Bible Commentary, bilong Lowther Clarke, i tok Buk Aisaia “em i wanpela buk em planti man i bin raitim insait long wanpela bikpela haptaim.” Tasol ol i no tingim ol tok bilong Jisas Krais na ol disaipel bilong em, em planti taim ol i tok, Aisaia i bin raitim dispela buk.—Matyu 3:3; 15:7; Luk 4:17; Jon 12:38-41; Rom 9:27, 29.
Na samting i nogut moa em olsem: Sampela man bilong skelim ol tok bilong Baibel, olsem J. R. Dummelow, ol i tok, ol tok profet i stap long Buk Daniel “i stori long ol samting i bin kamap pinis na man i raitim dispela buk i mekim olsem em wanpela tok profet.” Tasol taim ol i mekim dispela tok, ol i no tingim tok bilong Jisas Krais yet. Jisas i tok long “dispela samting nogut tru bipo profet Daniel i bin tok long en, na dispela samting bai i sanap i stap long haus bilong God yet.” (Matyu 24:15) Yu ting i stret long Kristen i ken bilip olsem Jisas Krais yet i bin insait long wok bilong giamanim ol man na bai ol i ting olsem samting i kamap pinis em wanpela tok profet? Nogat tru.
Em Bikpela Samting o Nogat?
Ating yu laik save: “Em i bikpela samting long save husat tru i bin raitim ol buk bilong Baibel?” Yes, em i bikpela samting tru. Yumi ken tok piksa olsem: Sapos ol i tok wanpela pren bilong yu i bin raitim tingting na laik bilong em long wanpela pepa, tasol bihain yu painimaut olsem em i no bin raitim, bai yu bilip long ol tok i stap long dispela pepa? Sapos ol saveman i tok olsem sampela lain i bin raitim ol dispela tok na ol i raitim ol samting ol yet i ting em laik bilong pren bilong yu, ating dispela bai daunim strong bilong ol tok i stap long dispela pepa na yu no inap bilip olsem tru tru em tingting na laik bilong pren bilong yu, a?
Na i wankain tu long Baibel. Planti man—na ol man i tok ol i Kristen—ol i ting i no bikpela samting sapos ol i sakim ol tok Baibel i mekim long stretpela pasin, ol samting long sait bilong maritpasin, na kain samting olsem. Ating planti taim yu bin harim ol man i tok: “Em ol tok bilong Olpela Testamen tasol!”—olsem ol tok bilong en i no bikpela samting. Na ol i mekim olsem, maski aposel Pol i kolim Olpela Testamen olsem “ol buk i gat tok bilong God” long en em “Spirit bilong God yet i bin kamapim.”
Tasol olsem wanem long ol tok em ol narapela saveman i bin mekim long Baibel? Yumi mas sakim ol dispela tok tu? Nogat! Yumi tenkyu tru long ol saveman husat i bin helpim yumi long save long ol tok bilong Baibel ol i bin raitim long pastaim. Tru, sampela liklik popaia i bin kam insait long Baibel long ol planti kopi ol i bin wokim insait long planti handet yia. Tasol tingim: Pasin bilong luksave olsem sampela liklik popaia i bin kam insait long ol kopi bilong Baibel, dispela i no wankain long pasin bilong tingim Baibel olsem wanpela buk nating bilong ol man tasol na yu sakim olgeta.
Holimpas Bilip Long “Ol Buk i Gat Tok Bilong God”
Paslain liklik long Pol i tok holi spirit bilong God i bin kamapim ol tok bilong Baibel, em i tokim Timoti long as na dispela buk bilong God em i bikpela samting. Em i tok: “Long taim bilong las de . . . , ol man nogut na ol giaman profet ol bai i wok long giamanim ol manmeri . . . na pasin bilong ol bai i kamap nogut tru.” (2 Timoti 3:1, 13) Long taim bilong Pol tu, ol man i olsem “man i gat gutpela tingting” na olsem man i gat “save bilong ol saveman,” ol i yusim ol “tok gris” bilong giamanim ol man na daunim bilip bilong ol long Jisas Krais. (1 Korin 1:18, 19; Kolosi 2:4, 8) Bilong ol i no ken pulim Timoti, aposel Pol i tokim em long em i mas ‘holim strong dispela tok em i bin kisim long ol buk i gat tok bilong God stat long taim em i bin i stap liklik pikinini yet.’—2 Timoti 3:14, 15.
Em i bikpela samting long yu tu i mas mekim wankain samting long dispela “taim bilong las de.” No ken ting olsem ol saveman i no inap giamanim yu long “tok gris” bilong ol, nogat. Ol inap giamanim yu. Olsem ol Kristen bilong pastaim, lukautim yu yet long rot bilong holim strong ol tok yu bin kisim save long en long rot bilong Baibel—em Tok Bilong God em holi spirit bilong God yet i bin kamapim.
Ol Witnes Bilong Jehova bai amamas long helpim yu long strongim bilip bilong yu long Baibel. Olsem: Ol inap helpim yu long save olsem wanem ol stiatok bilong Baibel i bin helpim ol man kirap long bipo yet na i kam inap long nau; Baibel i stret wantaim saiens taim em i stori long ol samting bilong saiens; long kirap bilong Baibel i go inap long pinis bilong en, olgeta tok bilong en i stret wantaim; ol tok profet bilong en i bin kamap tru—na i gat planti samting moa ol inap soim yu. Sapos yu laik, yu ken raitim pas long ol lain bilong wokim dispela nius bilong kisim sampela save moa, em dispela save i bin helpim planti milion manmeri i gat gutpela bel long save olsem, tru tumas Baibel em i Tok Bilong God.
[Rait long pes 5]
Olsem wanem yu inap save olsem yu inap trastim ol man yu bungim?
[Rait long pes 6]
Yumi tenkyu tru long ol saveman husat i bin helpim yumi long save long ol tok bilong Baibel ol man i bin raitim long pastaim