Tru Baibel Em i Tok Bilong God?
“Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.”—2 TIMOTI 3:16, 17.
DISPELA tok bilong aposel Pol i kamapim klia olsem ol tok bilong Baibel i gutpela tru long helpim man! Tru, taim Pol i mekim dispela tok, em i tingim ol buk bilong Baibel i stap pinis long taim bilong em—em sampela man i kolim Olpela Testamen. Tasol tok bilong Pol i no makim ol dispela buk tasol, nogat; tok bilong em i stret long olgeta 66 buk bilong Baibel, sampela bilong ol em ol buk ol gutpela disaipel bilong Jisas i bin raitim.
Olsem wanem? Yu gat wankain tingting olsem Pol long ol tok bilong Baibel? Yu ting spirit bilong God i bin kirapim ol man long raitim? Ol Kristen long taim bilong ol aposel i bilip olsem. Ol Kristen tru i kamap bihain long ol, ol tu i gat wankain tingting. John Wycliffe, wanpela pris bilong Inglan i bin stap 13 handet yia bihain long taim bilong ol aposel, em i ting ol tok bilong Baibel “i tru tasol na i no popaia liklik.” Buk The New Bible Dictionary i tok, taim Pol i tok spirit bilong God i kamapim olgeta tok bilong Baibel, “dispela i makim olsem olgeta tok bilong Baibel i mas tru tasol.”
Tingting Bilong Ol Man Long Baibel i Senis
Tasol long nau, planti man i no bilip moa long Baibel. Buk The World’s Religions i tok: “Ol man i save ting olsem olgeta Kristen i bilip [yet] long ol tok bilong Baibel bilong stiaim ol long ol samting ol i mas mekim na bilip long en.” Tasol planti manmeri long nau i no bilip moa long Baibel—ol i tingim Baibel olsem wanpela buk “bilong ol man tasol na em inap popaia.” Tru, ol i ting ol man i raitim Baibel ol i gat strongpela bilip, tasol ol i ting tu olsem ol i man bilong popaia na maski ol i bin wok strong long eksplenim ol strongpela tok bilong God, ol i sot long ol save em yumi long nau i gat.
Tru tumas, i no planti man long nau i larim Baibel i stiaim tingting na pasin bilong ol. Planti man i tok ol lo bilong stretpela pasin em Baibel i as bilong en, ol i samting bilong ol lain bilong bipo tasol na i no stret long taim bilong yumi. Planti ol i daunim strong bilong ol lo na ol stiatok bilong Baibel o givim baksait olgeta long en taim ol i ting i no gutpela long bihainim. Sampela man husat i tok ol i Kristen ol i givim baksait olgeta long ol tok em Baibel i mekim long pasin pamuk, adaltri, pasin giaman, na spak.—1 Korin 6:9, 10.
Bilong wanem i olsem? Inap olsem 100 yia i go pinis, long buk The Bible Is True, Bikman Charles Marston i kamapim wanpela as bilong dispela samting. Em i tok, ol manmeri i hariap tumas long “bilipim ol tingting nating bilong ol man bilong raitim buk long nau,” em ol dispela man i save daunim tok bilong Baibel. Yu ting em wankain tu long nau? Yu mas i gat wanem tingting long ol tok bilong ol saveman em ol i daunim bilip bilong ol man long Baibel? Bilong save long dispela, lukim stori i kamap bihain long dispela.