Yu Save Long Dispela?

Baibel tasol i stori long Jisas i bin stap tru o i gat sampela narapela buk tu i stori long em?

▪ Sampela man bilong raitim ol buk husat i bin stap bihain liklik long taim bilong Jisas, ol i stori long Jisas. Wanpela bilong ol dispela man em Kornilius Tasitus. Em i kamapim stori long ol samting i bin painim Rom long taim bilong ol empera. Long paia i bin bagarapim Rom long 64 C.E., Tasitus i stori olsem tok win i bin raun olsem Empera Niro i bin kamapim dispela bagarap. Tasitus i tok, Niro i putim asua bilong dispela samting long wanpela lain em ol i kolim Kristen. Tasitus i tok: “Krais, em man ol i kisim nem Kristen long en, em i dai long han bilong Gavena Pontius Pailat long taim Taiberius i stap king.”​​—Annals, XV, 44.

Flavius Josifas, em wanpela man Juda husat i bin raitim stori bilong ol samting i kamap bipo, em tu i bin stori long Jisas. Josifas i stori long ol samting i bin kamap long haptaim namel long taim Festus​—em gavena bilong Rom i bosim Judia​—i dai long yia 62 C.E. na long taim Albinus i kamap senis bilong em. Josifas i tok, Hetpris Ananaias “i mekim bung wantaim ol jas bilong Kaunsil na em i bringim wanpela man nem bilong em Jems, brata bilong Jisas em ol i save kolim Krais, na sampela narapela man.”​​—Jewish Antiquities, XX, 200 (ix, 1).

Bilong wanem ol i kolim Jisas olsem Krais?

▪ Stori bilong ol Gutnius i tok, taim ensel Gebriel i kamap long Maria bilong tokim em olsem em bai i gat bel, ensel i tokim em olsem em i mas kolim nem bilong pikinini, Jisas. (Luk 1:31) Long taim bilong ol man bilong raitim Baibel, planti man Juda i gat dispela nem. Josifas, em wanpela man Juda husat i bin raitim stori bilong ol samting i kamap bipo, em i stori long 12-pela man moa i gat dispela nem, em stori bilong ol i no stap long Baibel. Pikinini bilong Maria, ol i save kolim em olsem “Jisas bilong Nasaret.” Dispela i helpim ol man long save olsem Jisas em i man bilong Nasaret. (Mak 10:47) Ol man i save long em olsem “man God i bin makim,” olsem Krais o Jisas Krais. (Matyu 16:16) Wanem mining bilong dispela nem?

Dispela tok “Krais” long Tok Pisin i kam long tok Grik Khri·stosʹ, na em i wankain long dispela tok Hibru Ma·shiʹach (Mesaia). Mining bilong dispela tupela tok em “Man God i Makim.” Dispela tok i makim tu sampela man i bin stap paslain long Jisas. Olsem, Moses, Aron, na King Devit, ol i man God i bin makim. Dispela i makim olsem God i bin makim ol bilong mekim sampela wok i gat namba na ol i mekim wok bos. (Wok Pris 4:3; 8:12; 2 Samuel 22:51; Hibru 11:​24-26) Jisas, em dispela Mesaia Baibel i bin tok profet long em, em i nambawan gutpela mausman bilong Jehova. Olsem na i stret Jisas i kisim nem olsem “man God i bin makim,” na “Pikinini Bilong God i gat laip.”​—Matyu 16:16; Daniel 9:25.

[Piksa long pes 15]

Piksa bilong Flavius Josifas em atis i droim