Go Klostu Long God
“Yu Ken Kisim Pikinini Bilong Yu”
TAIM wanpela pikinini i dai, dispela em wanpela bikpela bel hevi ol man i save karim. God Jehova i gat strong long pinisim dispela hevi. Yumi save dispela em i tru, long wanem, long taim bilong ol man i bin raitim Baibel em i bin givim strong long sampela man long kirapim bek man i dai pinis. Wanpela stori i stap long 2 King 4:8-37, i stori long profet Elisa i bin kirapim bek wanpela mangi.
Dispela samting i bin kamap long taun Sunem. Wanpela meri i no save karim pikinini na man bilong em, tupela i save mekim gutpela pasin long Elisa, na planti taim ol i save givim kaikai na ples slip long em. Wanpela taim, dispela profet i tokim meri olsem: “Long yia bihain, long dispela mun stret bai yu gat pikinini man na bai yu holim long han bilong yu.” Nau dispela samting meri i ting i no inap kamap em i kamap tru—em i holim wanpela pikinini man long han bilong em, olsem Elisa i bin tok. Tasol sori tru, amamas bilong em i no stap longpela taim. Sampela yia bihain, mangi i kisim strongpela het pen taim em i stap long gaden, na ol i karim em i go long haus, na em i dai “long lek bilong mama” bilong em. (Ves 16, 19, 20) Mama i krai sori na i karim bodi bilong mangi i dai pinis na putim antap long bet em profet i save slip long en.
Meri i kisim tok orait long man bilong em na kwiktaim em i go long maunten Kamel bilong lukim Elisa, dispela ples i stap longwe inap 30 kilomita. Taim em i bungim Elisa, em i no krai sori o bikmaus samting bilong kamapim bikpela bel sori bilong em, nogat. Ating em i mekim olsem, long wanem, em i harim stori long Elaija—em man Elisa i kisim ples bilong em—i bin kirapim bek pikinini bilong wanpela meri wanpis. (1 King 17:17-23) Yu ting meri Sunem i bilip olsem Elisa inap mekim wankain samting long pikinini man bilong em? Tasol maski wanem samting i kamap, meri i no laik go bek long ples bilong em, em i laik Elisa i mas orait long go wantaim em.
Taim ol i kamap long Sunem, Elisa i go insait long rum em i save slip long en na em i lukim bodi bilong mangi “i slip i stap long bet.” (Ves 32) Elisa i beten strong long Jehova. Orait nau Elisa i holim bodi bilong mangi, na isi isi “bodi bilong mangi i kamap hat liklik.” Pastaim klok bilong mangi i dai, tasol nau em i wok gen! Elisa i singautim mama na i mekim wanpela tok i pinisim tru bel hevi bilong em na i mekim em i amamas, Elisa i tok: “Yu ken kisim pikinini bilong yu.”—Ves 34, 36.
Dispela stori long kirap bek bilong pikinini man bilong meri Sunem, i ken strongim yumi long wetim gutpela samting bai kamap bihain na i mekim isi bel bilong yumi. Jehova i pilim tru hevi bilong ol papamama em pikinini bilong ol i dai pinis. Na bikpela samting moa, em i gat strongpela laik tru long pinisim kain hevi olsem. (Jop 14:13-15) Wok Elisa i bin mekim bilong kirapim bek pikinini na ol narapela kirap bek em Baibel i stori long en, ol i olsem piksa bilong samting Jehova bai mekim long nupela taim i gat stretpela pasin long en bai kamap bihain.a
Tok promis bilong Baibel long kirap bek i no inap pinisim tru bel hevi bilong yumi taim wanpela long famili i dai. Wanpela papa Kristen husat i gat wanpela pikinini tasol na dispela pikinini i dai, em i tok: “Bel hevi bilong mi bai i no inap pinis olgeta inap long taim mi holim gen pikinini man bilong mi.” Tingim taim we yu bai bung gen wantaim ol famili yu laikim tumas em ol i bin dai. Taim yu tingim olsem yu inap holim ol gen, em bai inap helpim yu long karim dispela hevi. Olsem wanem? Yu laik kisim sampela save moa long dispela God husat i as bilong dispela gutpela bilip?
[Ol Futnot]
a Bilong kisim sampela save moa long tok promis bilong Baibel long kirap bek, lukim sapta 7 bilong buk Tru Tru Baibel i Tok Wanem?, em ol Witnes Bilong Jehova i wokim.