Sindaun Bilong Ol Kristen Bilong Pastaim

“Em i Wanpela Kamda”

“Yumi save, dispela man em i pikinini bilong wanpela kamda.”​—MATYU 13:55.

PLANTI man i save long Jisas olsem “pikinini bilong wanpela kamda,” tasol tu, ol i save long em olsem em yet i “wanpela kamda.” (Mak 6:3) Ating em i lainim dispela wok long waspapa bilong em, Josep.

Jisas i mas i gat wanem ol save na wanem ol tul bilong mekim wok kamda? Em i bin mekim wanem ol wok na salim wanem ol samting long ol man i sindaun long Nasaret? Na save em i bin kisim bilong mekim wok long ol diwai samting taim em i yangpela yet, dispela i mekim wanem long i stap bilong em long bihain?

Bisnis Bilong Famili Piksa i stap daunbilo i soim wanpela papa i skulim bikpela pikinini man bilong em long pasin bilong mekim gut wok long wanpela kain tul bilong wokim hul long diwai. Yangpela pikinini man bilong em i putim gut yau na lukluk gut long pasin bilong mekim wok long dispela tul.

Ol pikinini man i kirap long lain long mekim kain wok olsem taim ol i gat 12 i go 15 krismas. Planti taim ol i kisim save bilong mekim kain wok olsem long papa bilong ol. Ating ol i mas lain inap planti yia long mekim gut dispela wok, na ol mangi i mas wok strong tru sapos ol i laik lain long kamap gutpela kamda. Tingim planti aua em Josep i lusim wantaim Jisas​—tupela i wok wantaim, toktok wantaim, na Josep i lainim Jisas long mekim gut wok kamda. Ating Josep i amamas tru long lukim Jisas i mekim gut wok kamda!

Save, Strong, na Pasin Bilong Mekim Gut Wok Wanpela kamda i mas save gut long diwai em i save mekim wok long en. Em inap yusim ol diwai i save kamap long ples bilong em olsem diwai saipres, ok, sida, na oliv. Tasol kamda long dispela taim bipo i no gat ol hadwe stua bilong kisim ol diwai em ol i katim pinis long sais em i laikim. Nogat. Em i mas i go long bikbus, makim wanem diwai i stret, katim diwai, na pulim dispela hevipela diwai i kam bek long hap em i save mekim wok long en.

Orait, kamda bai wokim wanem ol samting long diwai em i bin katim? Ating em i lusim planti aua long helpim wok bilong wokim ol haus. Em bai katim ol plang bilong wokim rup, lata insait long haus, ol dua, windo, na ol bun bilong banis bilong haus.

Kamda i save wokim tu ol sia na tebol samting. Piksa long dispela pes i soim sampela bilong ol dispela samting​—ol kabot i gat ol dua (1); ol fom (2), ol sia (3), na ol tebol (4) i gat kain kain sais na stail bilong ol na ol bet bilong ol bebi. Kamda i save yusim ol narapela diwai em i katim long kain kain stail bilong bilasim ol sia na tebol samting. Bilong lukautim na mekim sia samting i luk nais, em i save mekim wok long gris kandel, vanis, na wel.

Kamda i save wokim tu ol samting bilong ol fama​—ol plang ol i save pasim long nek bilong bulmakau (5) em i wokim long ol strongpela diwai, na tu, em i wokim ol fok, ol rek, na ol savol (6). Ol tul bilong brukim graun (7) i mas strong na bai ain bilong en i ken digim gut graun long hap i gat ol ston long en. Na em i wokim ol karis long diwai (8) na ol wil bilong en. Na tu, em i gat wok long stretim na lukautim olgeta dispela samting em i wokim.

Yu inap piksaim long tingting samting wok kamda i mekim long lukluk bilong Jisas? San bilong Midel Is i boinim em na skin bilong em i kamap braunpela, inap planti yia em i wok na ol masol bilong em i kamap strongpela, na han bilong em i kamap strong, long wanem, em i save holim ol diwai na ol tamiok, ol hama, na ol so.

As Bilong Ol Tok Piksa Jisas i save mekim wok long ol samting ol man i save gut long en bilong skulim ol long ol strongpela tok i tru bilong Baibel. Olsem wanem? Em i yusim save bilong em olsem kamda bilong mekim sampela tok piksa bilong em? Tingim sampela tok piksa olsem. Em i tokim wanpela lain manmeri olsem: “Bilong wanem yu lukim liklik hap pipia i stap long ai bilong brata bilong yu, tasol yu no tingim bikpela plang i stap long ai bilong yu yet?” Wanpela kamda i save gut long bikpela bilong wanpela plang. (Matyu 7:3) Bihain, Jisas i tokim narapela lain: “Man i putim han long tul bilong brukim graun na lukluk i go long ol samting i stap baksait, dispela man i no fit long i go insait long Kingdom bilong God.” Ating em yet i bin wokim planti tul bilong brukim graun. (Luk 9:​62, NW) Long wanpela gutpela singaut bilong Jisas, em i mekim tok piksa long wanpela tul em kamda i save wokim. Jisas i tok: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. . . . Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” (Matyu 11:​29, 30) Jisas i save gut long wokim plang i no save skrapim nek bilong bulmakau, em plang i “isi long karim,” na i sindaun gut long nek.

Ol man i birua long Jisas, ol i tok long em olsem em i “pikinini bilong wanpela kamda.” Maski i olsem, ol Kristen long nau i amamas long bihainim dispela kamda i gat pasin daun, wankain olsem ol man long taim bilong Jisas i bin mekim.

[Blok/Piksa long pes 26]

Tul Boks Bilong Kamda

Long taim bilong ol Kristen bilong pastaim, wanpela kamda olsem Jisas i mas save gut long yusim ol tul i stap long dispela piksa. So (1) i gat diwai handel na ain tit, na ol i save pulim i go i kam bilong katim diwai. Em i save yusim wanpela kain rula (2) bilong metaim ol samting, na em i save yusim wanpela string i gat liklik ain long en (3) bilong skelim olsem samting i sanap stret o nogat. Na tu, insait long tul boks i gat level (4), wanpela rula (5), wanpela plen i gat naip aninit long en bilong stretim gut antap bilong diwai (6), na wanpela tamiok (7) bilong katim diwai.

Kamda i yusim bow lathe (8) na gouge (9) bilong katim na stailim ol diwai. Antap long ai bilong tul boks yu inap lukim wanpela hama ol i wokim long diwai (10) em i save yusim bilong joinim ol diwai wantaim o paitim het bilong sisel. Na tu, yu ken lukim wanpela liklik han so (11), naip (12) bilong sapim ol diwai, na sampela nil (13). Long fran bilong tul boks i gat wanpela hama ol i wokim long ain (14) na samting olsem tamiok (15) bilong katim sait sait bilong diwai. Long ai bilong tul boks i gat wanpela naip (16) na ol sisel (17) i gat kain kain sais. Wanpela bow drill (18) i stap long sait bilong tul boks.