Bilip Strong Long Jehova Em Bai Helpim Yu Tru

Stori bilong Edmund Schmidt

Mi tingim dispela tok i stap antap taim mi laik kamap long kot long New York, long Oktoba 1943. Taim mi gat 25 krismas, mi lusim pinis klostu 4-pela yia long kalabus, long wanem, mi no laik insait long pait. Olsem ol disaipel bilong Jisas bilong pastaim, mi tingting strong long ‘bihainim tok bilong God tasol na no ken bihainim tok bilong ol man.’ (Aposel 5:29) Tasol paslain long mi tokim yupela long dispela samting, mi laik stori long olsem wanem mi bin kisim pasin bilong bilip strong long God.

MAMA i karim mi long Epril 23, 1922, long Cleveland, Ohio, Amerika, long flet antap long haus bret bilong papa bilong mi. Inap 4-pela mun bihain, papa bilong mi, Edmund, i go long wanpela kibung bilong ol Sumatin Bilong Baibel (em nem bilong ol Witnes Bilong Jehova long dispela taim) long Cedar Point, klostu long Sandusky, em i stap longwe inap 160 kilomita long ples bilong mipela.

Long dispela kibung, ol i kirapim ol man i kam bung long “autim tok, autim tok, autim tok long King [bilong God] na kingdom bilong em.” Long Sande long wik bihain, Papa i kirap mekim dispela wok. Em i mekim olsem insait long 66 yia, i go inap long taim em i dai long Julai 4, 1988. Mama bilong mi, Mary, em i stap gut yet long God i go inap long taim em i dai long 1981.

Mi Go Long Lotu Wantaim Papamama Bilong Mi

Famili bilong mipela i save bung wantaim kongrigesen bilong tok Polan, long Cleveland. Long ol Sarere apinun, mipela planti pikinini wantaim ol bikpela manmeri, mipela i save go long ol haus bilong ol man na autim gutnius. Na long olgeta Sande, ol papamama bilong mipela i save bung long bikpela ples bung long harim wanpela tok bilong Baibel. Na long wankain taim wanpela Baibel tisa i save yusim buk The Harp of Goda bilong stadi wantaim mipela 30 pikinini. I no longtaim na mi yet i save mekim Baibel stadi na gutpela samting i kamap.

Long Julai 1931, famili bilong mipela, em liklik brata bilong mi, Frank, tu i insait long en, mipela go long wanpela kibung bilong ol Sumatin Bilong Baibel, long Kolambas, em i stap longwe inap 160 kilomita long hap saut. Em long dispela kibung ol Sumatin Bilong Baibel i kisim nem ol Witnes Bilong Jehova, em nem Baibel i as bilong en. (Aisaia 43:​10-​12) Long dispela taim, mi kirap autim tok na singautim ol manmeri long kam harim wanpela tok em J. F. Rutherford i mekim. Em i bin go pas long wok bilong ol Witnes Bilong Jehova long dispela taim. Nambawan samting long laip bilong mi insait long 79 yia em pasin bilong mekim wok bilong God Jehova wantaim lain bilong em.

Wok Autim Tok i Kamapim Gutpela Samting Long Taim Nogut

Long 1933, taim bilong bikpela hevi bilong mani i stap long olgeta hap bilong graun. Long Amerika, winim 15 milion manmeri i no gat wok mani. Olgeta siti i no gat mani, na gavman i no lukautim ol man i stap rabis. Tasol ol bratasista Kristen bilong mipela i helpim narapela narapela. Long ol Sande, famili bilong mipela i save kisim bret na skon samting long haus bret bilong mipela i go long ples bilong miting na kaikai wantaim ol narapela. Long pinis bilong mun, Papa i save baim ol bil samting na mani i stap yet em i save salim i go long hetkota bilong ol Witnes Bilong Jehova long Brooklyn, New York. Em i save olsem ol bai yusim dispela mani bilong helpim wok bilong prinim ol buk na nius samting bilong Baibel.

Long ol dispela yia, ol redio program i helpim tru wok autim tok bilong mipela. Olsem 400 redio stesin i kamapim ol tok i bin kamap long ol kibung bilong mipela. Long 1930 samting, ol Witnes i wokim ol pikap na ol rekoding long faktori long Brooklyn. Mipela i save yusim ol dispela samting long wok autim tok bilong mipela na mipela i putim ripot long hamas taim mipela i pilaim ol tok bilong Baibel long ol man husat i no Witnes na hamas manmeri i bung bilong harim ol dispela tok.

Long 1933, Adolf Hitler na gavman Natsi i kirap bosim Jemani. Na ol i mekim nogut tru long ol Witnes Bilong Jehova long Jemani, long wanem, ol i no laik insait long pait. (Jon 15:19; 17:14) Na tu, ol i no laik insait long ol wok politik o salut long Hitler, olsem na ol i salim planti tru i go long ol kalabus na ol banis kalabus nogut. Ol i bin kilim i dai planti bilong ol na sampela i wok kalabus i go inap long ol i dai. Na planti i dai bihain tasol long ol i lusim kalabus, long wanem, ol i bin mekim nogut tru long ol. Planti i no save long samting nogut i painim ol Witnes Bilong Jehova long ol narapela kantri na long Amerika tu.

Long 1940, mipela i go long wanpela kibung long Detroit, Michigan. Long dispela kibung, long Julai 28, mi kisim baptais bilong makim olsem mi dediket pinis long God Jehova. Wanpela mun paslain long dispela kibung, Suprim Kot Bilong Amerika i putim lo olsem sapos ol pikinini i no salut long fleg, ol i sakim lo bilong gavman na ol i mas rausim ol long skul. Ol Witnes i mekim wanem long dispela samting? Planti bilong ol i kamapim ol skul bilong ol yet na bai ol pikinini i ken skul long en. Ol i kolim ol Skul Bilong Kingdom.

Wol Woa 2 i kirap long Septemba 1939 long Yurop, na planti man long Amerika i givim bel tru long helpim pait. Ol yangpela i no gat stretpela tingting na ol bikpela man tu, ol i paitim na mekim nogut long ol yangpela Witnes. Ripot i tok, long 1940 i go long 1944, inap olsem 2,500 taim ol Witnes i kisim hevi long han bilong ol lain man i belhat na paitim ol. Pasin bilong mekim nogut long ol Witnes, dispela i go bikpela moa taim Japan i bomim Pearl Harbor long Disemba 7, 1941. Sampela wik paslain long dispela, mi bin kirap mekim wok painia, em nem bilong ol Witnes Bilong Jehova husat i save autim tok fultaim. Mi bungim sampela mani na baim wanpela haus ka longpela bilong en inap 7 mita, na mi wantaim sampela narapela i go mekim wok painia long Louisiana.

Ol Man i Mekim Nogut Long Mipela Long Hap Saut

Ol man i sindaun long wanpela fam bilong ol diwai galip klostu long taun Jeanerette, ol i givim tok orait long mipela i ken putim haus ka bilong mipela long dispela hap. Long wanpela Sarere, mipela i laik autim tok long rot, tasol bikman bilong polis i tokim ol polisman na ol i kisim mipela olsem kalabusman i go long haus kaunsil. Wanpela lain inap olsem 200 man i bung i stap ausait bilong mekim nogut long mipela, na ol polis i salim mipela i go long han bilong ol na ol polis i no mekim wanpela samting bilong lukautim mipela. Mipela i kirap nogut olsem ol dispela lain man i surik i go sait sait na larim mipela i wokabaut i go. Long de bihain, mipela i go long Baton Rouge, em wanpela taun i stap klostu, bilong tokim ol wanbilip Witnes long samting i bin kamap.

Taim mipela i kam bek long Jeanerette, mipela i lukim wanpela pepa i stap ausait long dua bilong mipela i gat tok olsem: “Plis kam lukim mi long hap we ol man bilong kisim oil i save stap long en.” Na i gat nem “E. M. Vaughn” long en. Mipela i go lukim Mista Vaughn, na em i singautim mipela i go kaikai wantaim em na meri bilong em. Em i tok, em wantaim ol wanlain bilong em, ol i bin stap namel long dispela lain i bin bung long Sarere, na em i tok sapos i gat sampela samting i bin kamap, em i bin redi long helpim mipela na bai ol man i no ken mekim nogut long mipela. Mipela i amamas long tok em i mekim bilong strongim na sapotim mipela.

Long de bihain, ol nambatu polisman i save holim gan, ol i kam arestim mipela na kisim ol buk na nius bilong mipela. Ol i kisim ki bilong haus ka bilong mi na putim mi i stap wanpis long kalabus inap 17 de na ol i givim mi liklik kaikai tru. Mista Vaughn i mekim ol samting bilong helpim mipela, tasol i no gat gutpela samting i kamap. Taim mi kalabus i stap, dispela lain i birua long mipela, ol i stilim olgeta samting bilong mipela na kukim haus ka tu. Long dispela taim, mi no luksave olsem Jehova i redim mi long samting bai painim mi bihain.

Kalabus Long Hap Not

Mi go i stap long hap not inap wanpela mun na ol i makim mi long mekim wok painia salim long Olean, New York, wantaim sampela narapela Witnes. Taim mi stap long hap, gavman i laik bai mi mas putim nem bilong mi bilong insait long ami, na ol i makim mi olsem man i bihainim maus bilong bel na i no laik insait long ami. Taim ol i wokim medikal tes long bodi na tingting bilong mi, olgeta samting i orait na long pepa bilong mi ol i raitim tok olsem “Man Bai Go Long Trening Bilong Kamap Soldia.”

Mi mekim yet wok painia inap wanpela yia samting. Long 1943, mi no orait long lusim wok autim tok na kisim trening bilong kamap soldia, olsem na lain The Federal Bureau of Investigation (FBI) i arestim mi na askim mi long kamap long federal kot long Syracuse, New York, long wik bihain bilong sanap long kot. Ol i tok mi gat asua, na mi mas kamap long kot tupela de bihain.

Mi no gat loya bilong helpim mi na mi yet i sanap long kot. Long ol miting Kristen, mipela ol yangpela Witnes i kisim tok long wanem pasin mipela i mas mekim bilong strongim sait bilong mipela long ol samting bilong lo, na pasin mipela i mas bihainim taim mipela i sanap long kot. Mi tingim gut dispela tok mi kamapim long kirap bilong dispela stori. Sampela ofisa bilong kot i komplein olsem ol Witnes i save gut moa long lo, winim ol! Tasol kot i tok mi gat asua. Taim jas i askim sapos mi gat sampela tok mi laik mekim, mi tok: “Tude, kantri i sanap long kot long ai bilong God long pasin em i mekim long ol manmeri husat i mekim wok bilong God.”

Ol i makim 4-pela yia bilong mi long kalabus long wanpela haus kalabus long Chilllicothe, long Ohio. Long dispela hap, ol i givim mi wok olsem sekreteri bilong wanpela ofisa bilong dipatmen bilong makim ol man bilong insait long ami. Sampela wik bihain, wanpela man bilong mekim wok painimaut long Washington, D.C., i kam long ofis bilong mipela, na em i tok em i kam bilong mekim wok painimaut long Hayden Covington. Dispela man em wanpela loya bilong ol Witnes Bilong Jehova na planti man i save long em olsem wanpela bilong ol nambawan loya bilong Amerika.

Dispela man bilong mekim wok painimaut i askim long kisim ol pepa na ripot samting bilong tupela kalabusman​—em Danny Hurtado na Edmund Schmidt. Supavaisa bilong mi i tok: “Em hia Mista Schmidt.” Dispela man i bin kam bilong mekim wanpela wok hait, tasol nau em i luksave olsem mipela i save pinis long as na em i kam. I no longtaim na ol i senisim wok bilong mi na putim mi long wok long haus kuk.

Wok Painia, Betel, na Marit

Long Septemba 26, 1946, mi pinis long kalabus na mi kirap mekim gen wok painia, na mi bung wantaim Highland Park Kongrigesen, long Kalifonia. Bihain, long Septemba 1948, mi kisim wok em inap longtaim pinis mi gat laik long mekim. Ol i singautim mi long wokim bret long hetkota (Betel) long Brooklyn​—em hap we ol i save wokim ol buk na nius bilong yusim long wok autim tok bilong mipela long olgeta hap bilong graun. Mi lusim wok bilong mi olsem man bilong wokim ol kek na bret long wanpela haus kaikai long Glendale, na mi go wok long Betel.

Sevenpela yia bihain, long 1955, i gat sampela kibung intenesenel bai kamap long Yurop. Famili bilong mi i givim mani long mi long i go. Mi amamas long go long ol kibung long London, Paris, Rom, na moa yet long kibung i kamap long Nuremberg, long Jemani, we 107,000 manmeri i bung long traipela stediam em hap we Hitler i bin mekim bikpela bung bilong ami bilong em. Sampela manmeri i stap long kibung em ol manmeri we Hitler i bin tok long kilim ol i dai. Man! Em gutpela samting tru long bung wantaim ol!

Long kibung long Nuremberg, mi bungim wanpela yangpela meri Witnes bilong Jemani na mi laikim em tru, nem bilong em Brigitte Gerwien. Wanpela yia i no pinis yet na mipela i marit na i go bek sindaun long Glendale klostu long papamama bilong mi. Namba wan pikinini man bilong mipela, Tom, i bon long 1957, na namba 2, Don, i bon long 1958, na pikinini meri bilong mipela Sabena i bon long 1960.

Wanpela Laip i Gutpela Tru

Sampela i askim sapos mi bel hevi long ol man i bin mekim nogut long mi na long mi bin kalabus bilong mekim wok bilong God. Tasol mi no bel hevi, nogat, mi tenkyu long Jehova olsem mi inap long mekim wok bilong em namel long planti manmeri i stap gut long em. Na mi laik bai stori bilong mi i ken strongim ol narapela long i go klostu long God na no ken tru lusim em.

Planti wokman bilong God i bin karim planti hevi nogut tru bilong mekim wok bilong em. Tasol em samting Baibel i tok bai painim yumi. Baibel i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Maski i olsem, tok bilong Song 34:19 i tru olgeta, em i tok: “Planti hevi i save kamap long stretpela man, tasol Bikpela i save helpim em na ol dispela hevi i no daunim em”!

[Futnot]

[Piksa long pes 27]

Autim tok long Louisiana long 1943 samting

[Piksa long pes 29]

Wokim bret bilong ol manmeri i wok long hetkota

[Piksa long pes 29]

Wantaim meri bilong mi, Brigitte