Beten

1 Bilong Wanem?

BETEN em i wanpela tok long Baibel i save kirapim tru tingting bilong planti man na ol i laik kisim save long en. Tingim 7-pela askim long beten em planti man i save kamapim; orait nau yumi ken skelim bekim bilong Baibel long ol dispela askim. Ol stori i kamap nau bai helpim yu long beten​—olsem kirapim yu long beten o mekim beten bilong yu i kamap gutpela moa.

LONG olgeta hap bilong graun, ol lain man bilong kain kain sindaun na lotu ol i save beten. Ol i beten taim ol i stap wanpis, o taim ol i bung. Ol i save beten insait long ol haus lotu, ol tempel, na ol sinagog samting. Ol i save yusim ol prea mat, ol bis rosari, ol prea wil, ol imis, ol prea buk, na ol prea ol i raitim long ol hap plang samting em ol i ken hangamapim.

Beten em wanpela pasin i mekim na ol man i narapela kain long ol animal. Tru, i gat planti samting bilong yumi na ol animal i wankain. Olsem ol animal, yumi save kaikai, pulim win, na dring wara. Na tu, mama i karim yumi, yumi stap laip, na yumi dai. (Saveman 3:19) Tasol yumi ol man tasol i save beten. Bilong wanem?

Long wanem, yumi pilim olsem yumi mas mekim. Olsem na yumi ken tok, beten em wanpela samting planti man i save tingim olsem em i rot bilong toktok wantaim God na em samting i holi. Baibel i kamapim klia olsem taim God i wokim yumi, em i putim long bel bilong yumi dispela laik bilong kisim save long em. (Saveman 3:11) Jisas Krais i tok: “Ol manmeri i save, ol i stap rabis tru long ol samting bilong God, em ol i ken amamas.”​—Matyu 5:3.

Pasin bilong i “stap rabis tru long ol samting bilong God,” dispela em i as na ol man i gat ol haus lotu na kain kain imis, na ol i lusim planti aua long beten. Tru, sampela man i save ting ol yet o sampela narapela i ken inapim laik bilong ol long kisim save long God. Tasol olsem wanem? Yu pilim olsem ol man yet i gat strong na save bilong helpim ol narapela long mekim olsem? Yumi ol man i no gat strong, yumi stap sotpela taim tasol, na yumi save tingim ol samting i kamap nau tasol. Wanpela husat i gat gutpela tingting tru, bikpela strong, na stap longpela taim winim yumi, em tasol inap givim yumi samting yumi nidim. Olsem na wanem ol dispela samting bilong God em yumi stap rabis long en na dispela i kirapim yumi long beten?

Tingim: Sampela taim yu pilim olsem yu mas kisim ol tok bilong stiaim yu, savetingting, o bekim bilong ol askim em ol man i no inap bekim? Olsem wanem? I gat wanpela taim we yu mas kisim ol tok bilong mekim gut bel bilong yu taim wanpela long famili i dai, o tok bilong stiaim yu long mekim wanpela disisen, o yu laik bai wanpela i lusim rong bilong yu taim bel i kotim yu?

Baibel i tok ol dispela samting i as na ol man i beten. Baibel em i nambawan gutpela buk i kamapim ol tok long beten, na em i stori long beten bilong planti gutpela man na meri. Ol i beten bilong kisim bel isi, ol tok bilong stiaim ol, askim God long lusim rong bilong ol, na kisim bekim bilong ol askim i hatwok long painim bekim bilong en.​—Song 23:3; 71:21; Daniel 9:​4, 5, 19; Habakuk 1:3.

Ol dispela beten i narapela narapela, tasol i gat wanpela samting i wankain. Olgeta manmeri husat i beten ol i gat wanpela samting bilong mekim beten bilong ol i kamap gutpela, em samting planti man long nau i no save mekim o i no save tingim. Ol i save long ol i mas beten long husat.