Beten

3 Olsem Wanem?

LONG ol samting bilong beten, planti lotu i tingim tasol ol pasin man i mas bihainim, olsem sanap, sindaun, brukim skru, tok man i mas kolim, na ol kain samting olsem. Tasol Baibel i tok yumi no ken tingim tumas ol dispela samting, nogat, yumi mas tingim ol bikpela samting bilong dispela askim: “Yumi mas beten olsem wanem?”

Baibel i stori long ol gutpela wokman bilong God olsem ol i bin beten long kain kain ples o ol i sindaun o sanap samting. Sampela taim ol i beten long tingting o ol i kolim strong beten. Ol i lukluk i go antap long skai o ol i brukim skru na beten. Ol i no mekim wok long ol imis, bis rosari, o prea buk bilong helpim ol, nogat, ol i beten na kamapim ol tok i stap long bel bilong ol. Wanem samting i mekim na God i harim beten bilong ol?

Olsem yumi toktok pinis long stori i kamap paslain long dispela, ol i beten long God wanpela tasol​—em Jehova. Na i gat narapela bikpela samting tu. Namba 1 Jon 5:​14, i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God. Nogat. Yumi save go klostu long em.” Ol beten bilong yumi i mas stret wantaim laik bilong God. Wanem mining bilong dispela tok?

Bilong beten i ken stret wantaim laik bilong God, yumi mas save long laik bilong em. Olsem na pasin bilong stadi long Baibel em i bikpela samting long beten. Olsem wanem? Dispela i makim olsem yumi mas i stap olsem saveman bilong Baibel bambai God i ken harim beten bilong yumi? Nogat. Tasol God i laik yumi mas kisim save long laik bilong em, kliagut long en, na bihainim. (Matyu 7:​21-23) Ol beten bilong yumi i mas stret wantaim ol samting yumi kisim save long en.

Taim yumi kisim save long Jehova na laik bilong em, bilip bilong yumi bai kamap strong​—em narapela bikpela samting long beten. Jisas i tok: “Sapos yupela i bilip na mekim prea, orait olgeta samting yupela i beten long kisim, em bai yupela i kisim.” (Matyu 21:22) Pasin bilong bilip tru i no makim olsem man i bilip nating tasol, nogat. Bilip tru i makim olsem man i bilip long samting em i no lukim, tasol i gat planti samting i kamapim klia olsem samting em i bilip long en i stap tru. (Hibru 11:1) Baibel i gat planti stori long Jehova em Man yumi no inap lukim, em i stap tru na em i amamas long harim ol beten bilong ol man i bilip long em. Na tu, oltaim yumi ken askim em long mekim bilip bilong yumi i kamap bikpela moa, na Jehova i amamas tru long givim yumi ol samting yumi nidim.​—Luk 17:5; Jems 1:17.

I gat narapela bikpela samting long beten. Jisas i tok: “I no gat wanpela man inap i kam long Papa long narapela rot. Nogat. Long mi tasol.” (Jon 14:6) Olsem na Jisas em i rot bilong i go long Papa, Jehova. Na Jisas i tokim ol disaipel bilong em long beten long nem bilong em. (Jon 14:13; 15:16) Dispela i no makim olsem yumi mas beten long Jisas, nogat. Yumi beten long nem bilong Jisas, na tingim olsem Jisas tasol em i rot bilong i go long Papa bilong yumi husat i holi na gutpela olgeta.

Ol gutpela disaipel bilong Jisas i askim em olsem: “Bikpela, yu skulim mipela long mekim prea.” (Luk 11:1) Yumi ken luksave olsem ol i no askim Jisas long ol samting em nau tasol yumi stori long en, nogat. Ol i laik save long ol samting ol i ken beten long en, i olsem ol i askim: ‘Mipela i mas beten long wanem samting?’

[Rait long pes 6]

Bilong God i ken harim beten bilong yumi, beten i mas stret wantaim laik bilong God, na yumi mas bilip na beten long nem bilong Jisas