“Husat i Save Long Tingting Bilong Bikpela?”
“‘Husat i save long tingting bilong Bikpela, bai em inap long skulim Bikpela?’ Tasol tingting bilong Krais i stap long yumi.”—1 KO. 2:16.
1, 2. (a) Planti man i gat wanem hatwok? (b) Olsem wanem long tingting bilong yumi ol man na bilong Jehova?
OLSEM WANEM? Sampela taim yu bin hatwok long kliagut long tingting bilong narapela man? Ating nau tasol yu marit, na yu pilim olsem yu no kliagut tumas long tingting bilong poroman marit bilong yu. Tru tumas, pasin bilong ol man na meri long tingting na toktok i no wankain. Long sampela ples, ol man na meri i mekim wankain tokples, tasol krai bilong nek bilong tokples i no wankain! Na tu, pasin bilong ples na tokples inap mekim na ol man i gat narapela narapela pasin na wei bilong tingting. Tasol taim yu save gut moa long ol narapela, bai yu inap kliagut moa long tingting bilong ol.
2 Olsem na yumi no ken kirap nogut olsem tingting bilong yumi i narapela kain tru long tingting bilong Jehova. Long rot bilong profet Aisaia, Jehova i tokim lain Israel: “Ol tingting bilong mi i no olsem tingting bilong yupela ol manmeri. Na ol pasin bilong mi i narakain tru long ol pasin bilong yupela.” Jehova i mekim tok piksa long dispela samting na i tok: “Skai i stap antap tru long graun, olsem tasol ol pasin bilong mi na tingting bilong mi i winim tru ol pasin bilong yupela na tingting bilong yupela.”—Ais. 55:8, 9.
3. Long wanem tupela rot yumi inap kamap “pren tru” bilong Jehova?
3 Tasol olsem wanem? Dispela i makim olsem bai yumi no mekim sampela samting bilong kliagut long tingting bilong Jehova? Nogat, i no olsem. Maski yumi no inap kliagut olgeta long tingting bilong Jehova, Baibel i kirapim yumi long kamap “pren tru” bilong em. (Ritim Song 25:14; Sindaun 3:32.) Wanpela rot bilong i go klostu moa long Jehova, em yumi mas tingim tru ol wok na pasin bilong em olsem Baibel i stori long en. (Sng. 28:5) Narapela rot bilong i go klostu long Jehova, em yumi mas kisim save long “tingting bilong Krais,” husat i “wankain olsem God.” (1 Ko. 2:16; Kl. 1:15) Taim yumi lusim hap taim bilong stadi long ol tok bilong Baibel na tingim tingim long bel ol dispela tok, yumi inap kliagut long ol tingting na pasin bilong Jehova.
Abrusim Tingting Kranki
4, 5. (a) Yumi no ken tru bihainim wanem kain tingting? Stori long dispela. (b) Lain Israel i kisim wanem kain tingting kranki?
4 Taim yumi tingim tingim long bel ol wok na pasin bilong Jehova, yumi no ken tru bihainim ol lo ol man i putim bilong skelim God. Tok Jehova i mekim long Song 50:21 i stori long dispela kain pasin. Em i tok: “Yupela i ting mi wankain olsem yupela yet.” Wanpela saveman bilong Baibel i bin mekim kain tok olsem winim 175 yia i go pinis, olsem: “Ol man i save bihainim tingting bilong ol yet long skelim God, na ol i ting God i mas bihainim ol wankain lo olsem ol i ting ol man i mas bihainim.”
5 Yumi mas was gut, nogut yumi larim ol lo yumi yet i putim na laik bilong yumi yet i stiaim tingting yumi gat long Jehova. Bilong wanem dispela em i bikpela samting? Taim yumi stadi long Baibel, long tingting bilong yumi ol man i gat sin, yumi inap ting olsem sampela pasin bilong Jehova i no stret. Lain Israel bilong bipo i bin i gat kain tingting olsem na ol i kisim tingting kranki long ol pasin Jehova i mekim long ol. Lukim tok Jehova i mekim: “Yupela i save tok olsem, ‘Dispela pasin Bikpela i save mekim, em i no stret.’ Orait yupela Israel, harim gut tok bilong mi. Yupela i ting pasin bilong mi i no stret, a? Nogat. Pasin bilong yupela tasol i no stret.”—Ese. 18:25.
6. Jop i kisim skul long wanem samting? Olsem wanem stori bilong em inap helpim yumi?
6 Wanpela rot bilong abrusim pasin bilong skelim Jehova long ol lo yumi yet i putim, em yumi mas save olsem tingting bilong yumi i sot na sampela taim i kranki. Jop i mas kisim skul long dispela samting. Taim Jop i karim bikpela hevi, bel bilong em i bagarap stret na em i tingting long em yet tasol. Em i no tingim moa ol bikpela tok i bin kamap. Tasol long gutpela pasin Jehova i helpim em long kisim stretpela tingting. Jehova i tromoi 70 narapela narapela askim long Jop em Jop i no inap bekim wanpela bilong ol, na long dispela rot, Jehova i kamapim klia olsem tingting bilong Jop i sot. Jop i mekim pasin daun, na i stretim tingting bilong em.—Ritim Jop 42:1-6.
Kisim “Tingting Bilong Krais”
7. Sapos yumi skelim ol wok na pasin bilong Jisas, bilong wanem dispela bai helpim yumi long kliagut long tingting bilong Jehova?
7 Long olgeta samting Jisas i mekim na toktok long en, em i bihainim stret pasin bilong Papa bilong em. (Jo. 14:9) Olsem na pasin bilong skelim ol wok na pasin bilong Jisas, bai helpim yumi long kliagut long tingting bilong Jehova. (Ro. 15:5; Fl. 2:5) Orait yumi ken skelim stori bilong tupela Gutnius.
8, 9. Olsem Jon 6:1-5 i kamapim, wanem samting i kirapim Jisas long tromoi askim long Filip? Bilong wanem Jisas i mekim olsem?
8 Piksaim ol samting i kamap. Taim bilong Pasova bilong yia 32 C.E. i kam klostu pinis. Nau tasol ol aposel bilong Jisas i kam bek long bikpela raun bilong ol long autim tok long ol hap bilong Galili. Bihain long dispela bikpela wok, skin bilong ol i les, olsem na Jisas i kisim ol i go long wanpela ples i no gat man long hap bilong not is long nambis bilong raunwara Galili. Tasol planti tausen man i bihainim ol i go long dispela hap. Bihain long Jisas i oraitim sik bilong planti man na skulim ol long planti samting, wanpela hevi i kamap. Olsem wanem olgeta dispela manmeri inap kisim kaikai long dispela ples i no gat man? Jisas i luksave long dispela samting, olsem na em i askim Filip husat i bilong dispela hap, olsem: “Bai yumi baim bret we bilong ol dispela manmeri i ken kaikai?”—Jo. 6:1-5.
9 Bilong wanem Jisas i tromoi dispela askim long Filip? Yu ting Jisas i tingting planti long ol bai mekim wanem? Nogat, i no olsem. Orait em i tingting long wanem samting stret? Aposel Jon tu i bin stap long dispela hap, na em i tok: “[Jisas] i mekim dispela tok bilong traim Filip tasol. Em yet i save pinis long samting em i laik mekim.” (Jo. 6:6) Jisas i traim ol disaipel bambai em i ken save ol i gat strongpela bilip o nogat. Long rot bilong mekim dispela askim, Jisas i kirapim tingting bilong ol na i givim rot long ol long kamapim bilip bilong ol long samting em inap mekim. Tasol ol i no mekim olsem; ol i soim olsem tingting bilong ol i sot tru. (Ritim Jon 6:7-9.) Orait nau Jisas i soim olsem em inap mekim samting ol i no ting em bai mekim. Em i wokim mirakel na givim kaikai long planti tausen manmeri i hangre.—Jo. 6:10-13.
10-12. (a) Ating bilong wanem Jisas i no givim hariap samting em meri Grik i askim em long en? Stori long dispela. (b) Nau bai yumi skelim wanem samting?
10 Dispela stori inap helpim yumi long kliagut long tingting bilong Jisas long samting i bin kamap long narapela taim. I no longtaim bihain long em i bin givim kaikai long bikpela lain manmeri, Jisas na ol aposel bilong em i go long hap not, abrusim boda bilong Israel na i go klostu long Tair na Saidon. Taim ol i stap long hap, ol i bungim wanpela meri Grik husat i askim Jisas long oraitim pikinini meri bilong em. Pastaim Jisas i no mekim wanpela samting. Tasol taim meri i wok long askim askim, Jisas i tokim em: “Yumi mas givim kaikai long ol pikinini pastaim. Nogut yumi kisim kaikai bilong ol pikinini na tromoi i go long ol dok.”—Mk. 7:24-27.
11 Bilong wanem pastaim Jisas i no laik helpim dispela meri? Yu ting Jisas i traim em, olsem em i bin traim Filip, bilong save meri bai mekim wanem, na bilong givim rot long meri long kamapim bilip bilong em? Krai bilong nek bilong Jisas i no pretim meri, maski Baibel i no stori long dispela. Taim Jisas i mekim dispela tok, em i yusim wanpela tok Hibru i makim “dok” em dispela tok i no daunim man. Ating Jisas i bihainim pasin olsem bilong wanpela papa husat i laik givim samting pikinini i askim em long en, tasol em i no laik soim olsem em bai givim dispela samting, na long dispela rot em i traim pikinini bambai em i ken save pikinini i laik tru long kisim dispela samting o nogat. Tasol maski i gat wanem as na Jisas i mekim olsem, taim meri i kamapim bilip bilong em, Jisas i amamas long givim samting meri i askim em long en.—Ritim Mak 7:28-30.
12 Ol dispela stori bilong tupela Gutnius i helpim yumi long kliagut long “tingting bilong Krais.” Orait nau yumi ken skelim olsem wanem ol dispela stori inap helpim yumi long kliagut moa long tingting bilong Jehova.
Pasin Jehova i Mekim Long Moses
13. Taim yumi kisim save long tingting bilong Jisas, olsem wanem dispela bai helpim yumi?
13 Taim yumi kisim save long tingting bilong Jisas, dispela bai helpim yumi long kliagut long sampela tok bilong Baibel i hatwok long kliagut long en. Olsem: Tingim tok Jehova i mekim long Moses bihain long lain Israel i bin wokim wanpela bulmakau gol bilong lotu long en. God i tok: “Mi save long ol dispela manmeri. Ol i manmeri bilong bikhet tru. Mi belhat tru long ol na bai mi bagarapim ol. Na yu no ken pasim mi, nogat tru. Na bihain bai mi mekim yu wantaim ol lain pikinini bilong yu yet i senisim ol na i kamap bikpela lain manmeri.”—Kis. 32:9, 10.
14. Tok bilong Jehova i kirapim Moses long mekim wanem?
14 Baibel i stori moa olsem: “Moses i beten strong long God, Bikpela bilong en olsem, ‘Bikpela, nogut yu larim belhat bilong yu i bagarapim ol manmeri bilong yu. Yu bin kisim bek dispela ol manmeri long Isip long bikpela strong bilong yu. Sapos yu mekim olsem long ol, bai ol Isip i tok, “God i tingting nogut long ol manmeri bilong en. Olsem na em i kisim ol long Isip na bringim ol i kam bilong bagarapim ol nogut tru long ples maunten na kilim olgeta i dai.” Tasol Bikpela, maski. Mobeta yu lusim belhat bilong yu na senisim tingting bilong yu, na bai yu no ken bagarapim ol manmeri bilong yu. Yu mas tingting long ol wokman bilong yu, Abraham na Aisak na Jekop. Na tingting long dispela promis yu mekim long ol. Yu bin mekim strongpela promis olsem, “Mi tok tru olgeta, bai mi givim yupela planti tumbuna pikinini inap olsem ol sta. Na dispela graun mi promis pinis long givim yupela, bai mi givim long dispela ol tumbuna bilong yupela. Na bai ol i stap long dispela graun oltaim.”’ Moses i prea olsem, na Bikpela i senisim tingting bilong en na i no salim bikpela bagarap i kam long ol manmeri bilong en.”—Kis. 32:11-14.a
15, 16. (a) Tok Jehova i mekim i opim rot long Moses long mekim wanem? (b) Olsem wanem Jehova i “senisim tingting bilong em”?
15 Yu ting Moses i mas stretim tingting bilong Jehova? Nogat tru! Maski Jehova i tokaut long samting em i laik mekim, dispela i no laspela disisen bilong em long samting em bai mekim. Jehova i traim Moses, olsem bihain Jisas i bin traim Filip na meri Grik. Jehova i givim rot long Moses long kamapim tingting bilong em.b Jehova i bin makim Moses long stap olsem namelman bilong lain Israel na Em yet, na Jehova i rispektim dispela namba em i bin givim long Moses. Yu ting Moses bai larim pasin bilong bel kros i stiaim ol samting em i mekim? Yu ting Moses bai kirapim Jehova long lusim tingting long lain Israel na mekim lain famili bilong Moses yet i kamap bikpela lain manmeri?
16 Tok bilong Moses i kamapim olsem em i bilip na trastim Jehova olsem Jehova bai mekim pasin i stret. Tok bilong Moses i soim olsem em i tingim nem bilong Jehova, na i no tingim em yet. Em i no laik bai nem bilong Jehova i bagarap. Long dispela rot Moses i soim olsem em i kliagut long “tingting bilong [“Jehova,” NW]” long dispela samting. (1 Ko. 2:16) Wanem samting i kamap? Jehova i no strong long bihainim wanpela rot tasol, olsem na Baibel i tok em i “senisim tingting bilong em.” Long tok Hibru, dispela tok inap makim olsem Jehova i no kamapim dispela bagarap olsem em i bin tok em i laik kamapim long lain Israel olgeta.
Pasin Jehova i Mekim Long Abraham
17. Olsem wanem Jehova i kamapim pasin bilong i no les kwik taim em i toktok wantaim Abraham?
17 Narapela eksampel i kamapim pasin bilong Jehova long larim ol wokboi bilong em long kamapim pasin bilong ol long bilip na trastim em, em taim Abraham i askim Jehova long em i no ken bagarapim Sodom. Long dispela stori, Jehova i kamapim pasin bilong i no les kwik na i larim Abraham i mekim askim inap 8-pela taim. Orait nau, Abraham i mekim dispela tok em i pilim tru: “Yu laik kilim ol gutpela man wantaim ol man nogut. Em i no gutpela pasin. Yu no ken mekim wankain pasin long ol gutpela man na long ol man nogut. Jas bilong olgeta graun, em i mas bihainim stretpela pasin.”—Stt. 18:22-33.
18. Yumi kisim wanem skul long pasin Jehova i mekim long Abraham?
18 Long dispela stori, yumi kisim wanem skul long tingting bilong Jehova? Yu ting Jehova i mas toktok wantaim Abraham bambai Em i ken wokim rait disisen? Nogat, i no olsem. Tru, pastaim Jehova inap kamapim ol as bilong disisen bilong em, tasol em i no mekim olsem. Long rot bilong ol dispela askim, Jehova i givim taim long Abraham long kliagut long disisen na tingting bilong Em. Na tu, dispela i givim rot long Abraham long kliagut long bikpela pasin sori na stretpela pasin bilong Jehova. Tru tumas, pasin Jehova i mekim long Abraham i soim olsem Abraham em i pren bilong em.—Ais. 41:8; Jem. 2:23.
Skul Yumi Kisim
19. Olsem wanem yumi inap bihainim pasin bilong Jop?
19 Yumi bin kisim wanem skul long “tingting bilong [“Jehova,” NW]”? Yumi mas larim Tok Bilong God i givim stretpela save long yumi long tingting bilong Jehova. Yumi no ken tru kirapim Jehova long bihainim tingting bilong yumi long mekim ol samting, na yumi no ken skelim em long ol lo yumi yet i putim. Jop i tok: “Sapos God em i man tasol, orait mitupela inap i go long kot na stretim tok bilong mitupela.” (Jop 9:32) Olsem Jop, taim yumi kirap long kliagut long tingting bilong Jehova, bel bilong yumi tu bai kirapim yumi long tok: “Olgeta samting God i mekim ol i kamap, na yumi save lukim na pilim long en, em i soim yumi liklik hap tasol bilong bikpela strong bilong God. Na dispela i winim save bilong yumi. Olsem na sapos God i kamapim olgeta strong bilong en long yumi, bai yumi no inap tru long mekim wanpela tok. Nogat tru.”—Jop 26:14.
20. Yumi mas mekim wanem sapos yumi hatwok long kliagut long sampela tok bilong Baibel yumi ritim?
20 Taim yumi ritim Baibel, yumi mas mekim wanem sapos yumi hatwok long kliagut long sampela tok bilong en, na moa yet sapos ves i toktok long tingting bilong Jehova? Sapos yumi bin mekim wok painimaut long dispela, tasol yumi no kisim gutpela bekim, orait yumi ken ting olsem dispela i traim pasin bilong yumi long trastim Jehova. Tingim, long sampela taim sampela tok i givim rot long yumi long kamapim bilip bilong yumi long ol pasin bilong Jehova. Long pasin daun yumi mas tokaut olsem yumi no inap kliagut long olgeta samting em i save mekim. (Sav. 11:5) Olsem na yumi bai wanbel long tok aposel Pol i mekim, olsem: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en. Olsem tok i stap long buk bilong God, ‘Husat i save pinis long tingting bilong Bikpela? Husat i bin givim tingting long em?’ Na ‘husat i bin givim samting long God pastaim na bai God i mas bekim samting long em?’ Nogat tru. God yet i mekim kamap olgeta samting, na em i as bilong olgeta samting. Na olgeta samting i bilong em wanpela tasol. Yumi mas litimapim nem bilong em oltaim oltaim. I tru.”—Ro. 11:33-36.
[Ol Futnot]
a Wanpela stori i wankain olsem dispela, i stap long Namba 14:11-20.
b Long Kisim Bek 32:10, i gat wanpela kain tok Hibru i olsem “no ken pasim mi.” Sampela saveman i tok, dispela tok inap makim olsem man i singautim narapela man long mekim samting, olsem Moses inap stap namelman, olsem “sanap” namel long Jehova na lain Israel. (Sng. 106:23; Ese. 22:30) Tasol maski dispela i makim wanem samting, i klia tru olsem Moses i no pret long kamapim tingting bilong em long Jehova.
Yu Tingim Yet?
• Wanem samting bai helpim yumi long abrusim pasin bilong skelim Jehova long ol lo yumi yet i putim?
• Olsem wanem pasin bilong kliagut long ol wok na pasin bilong Jisas i helpim yumi long kamap “pren tru” bilong Jehova?
• Yu kisim wanem skul long toktok i kamap namel long Jehova wantaim Moses na Abraham?
[Ol Piksa long pes 5]
Yumi kisim wanem skul long tingting bilong Jehova long pasin em i mekim long Moses na Abraham?