Singsing Long Jehova!

“Bai mi mekim song bilong litimapim nem bilong God bilong mi inap long taim mi dai.”​—SNG. 146:2.

1. Wanem samting i kirapim yangpela man Devit long raitim ol song?

TAIM Devit i yangpela, em i bin lusim planti aua long lukautim ol sipsip bilong papa bilong em long hap klostu long Betlehem. Taim em i was long ol sipsip, Devit inap lukim ol gutpela samting Jehova i bin wokim: ol sta long ples antap, ol “abus i stap long bus,” na ol “pisin i flai antap.” Ol samting em i lukim i kirapim tru bel bilong em, olsem na em i raitim sampela song bilong litimapim nem bilong Man Bilong Wokim ol dispela gutpela samting. Planti song Devit i raitim i stap long Buk Song.a​—Ritim Song 8:​3, 4, 7-9.

2. (a) Musik inap mekim wanem long man? Kamapim wanpela eksampel. (b) Long Song 34:​7, 8 na Song 139:​2-8 yumi kisim wanem save long pasin i stap namel long Devit na Jehova?

² Ating long dispela taim long laip bilong Devit, save bilong em long pilaim musik i wok long kamap gutpela. Em i mekim gut tru, olsem na King Sol i singautim em long pilaim gita long em. (Snd. 22:29) Musik bilong Devit i mekim gut bel bilong dispela king husat i tingting planti i stap, olsem gutpela musik inap mekim long ol manmeri long nau tu. Taim Devit i save paitim gita, ‘tingting bilong Sol i kamap gutpela na em i kamap orait gen.’ (1 Sml. 16:23) Ol song Devit i bin raitim i helpim ol man i kam inap long nau. Tingim! Long nau, winim 3,000 yia bihain long taim Devit i bon, planti milion manmeri bilong kain kain sindaun em ol i stap long ol narapela narapela hap bilong graun, ol i save ritim ol song bilong Devit bambai ol tok bilong en i ken mekim gut bel bilong ol na ol i inap wetim gutpela samting i kamap bihain.​—2 Sto. 7:6; ritim Song 34:​7, 8; 139:​2-8; Amo. 6:5.

Wok Bilong Musik Insait Long Lotu i Tru

3, 4. Olsem wanem ol i bin stretim rot bilong musik i ken insait long lotu i tru long taim bilong Devit?

³ Devit i gat save long pilaim musik, na em i yusim dispela save long litimapim nem bilong Jehova. Taim em i kamap king bilong Israel, Devit i stretim rot bilong musik i ken insait long pasin bilong lotuim Jehova long haus lotu sel. Ol i bin makim wanpela long olgeta 10-pela 10-pela Livai​—inap olsem 4,000​—long mekim musik “bilong litimapim nem bilong Bikpela,” na inap 288 man ‘i bin skul gut long singim ol song bilong litimapim nem bilong Bikpela, na olgeta dispela man i save gut tru long mekim musik.’​—1 Sto. 23:​3, 5; 25:7.

⁴ Devit i bin raitim planti bilong ol dispela song em ol Livai i singim na mekim musik long en. Husat man Israel i bin stap long taim ol singim ol dispela song bilong Devit, ating bel bilong em i pilim tru samting em i harim. Bihain, taim ol i bringim bokis kontrak i kam long Jerusalem, “Devit i tokim ol dispela hetman bilong ol lain bilong Livai long ol i mas makim ol sampela Livai bilong singim song na mekim musik . . . Ol i mas paitim ol gita na ol plet bras na mekim krai bilong musik i kamap bikpela moa, bilong soim amamas bilong ol.”​—1 Sto. 15:16.

5, 6. (a) Bilong wanem musik i bikpela samting long taim bilong King Devit? (b) Olsem wanem yumi inap save olsem musik i bikpela samting insait long lotu bilong ol Israel bilong bipo?

⁵ Bilong wanem musik i bikpela samting long taim bilong Devit? Yu ting em long wanem King Devit yet i man bilong pilai musik? Nogat. I gat narapela as bilong dispela, na dispela as i bin kamap ples klia sampela handet yia bihain, taim gutpela King Hesekia i kirapim gen ol wok long tempel. Namba 2 Stori 29:25 i tok: “King Hesekia i bihainim tok bipo Bikpela i bin givim long King Devit long maus bilong profet Gat na Natan, na em i tokim ol Livai na ol i kisim olkain gita samting bilong mekim musik na ol i go sanap insait long haus bilong Bikpela.”

⁶ Yes, long rot bilong ol profet, Jehova i bin tokim ol man i lotuim em long singim ol song bilong litimapim nem bilong em. Ol man bilong singsing, em ol i bilong lain pris, ol i no save mekim ol wok em ol narapela Livai i mas mekim​—long dispela rot ol inap lusim bikpela haptaim moa long raitim ol song na mekim prektis tu.​—1 Sto. 9:33.

7, 8. Long sait bilong mekim ol singsing bilong Kingdom, wanem samting i bikpela samting moa long pasin bilong mekim gut tru singsing?

⁷ Ating yu bai tok, “Long sait bilong singsing, mi no ting mi inap insait long dispela lain 288 man husat i save gut tru long singim ol song long haus lotu sel!” Tasol namel long ol Livai husat i mekim musik, i no olgeta bilong ol i saveman tru long mekim olsem, nogat. Namba 1 Stori 25:8 i tok, i gat ol man i “skul yet” long mekim musik. Ating namel long ol arapela lain Israel i gat ol man i saveman tru long mekim musik na mekim singsing, tasol Jehova i bin makim ol Livai long lukautim sait bilong musik. Yumi ken bilip tru olsem maski ol i “saveman tru long mekim musik” o ol i “skul yet,” olgeta dispela Livai ol i givim bel olgeta long mekim dispela wok.

⁸ Devit i laikim tru musik na em i save gut tru long mekim. Tasol yu ting pasin bilong mekim gut tru singsing, em dispela samting tasol i bikpela samting long God? Long Song 33:​3, Devit i tok: “[“Traim bes,” NW] long paitim gita na mekim gutpela musik tru, na singaut strong wantaim.” Olsem na bikpela samting i olsem: Yumi mas “traim bes” long litimapim nem bilong Jehova.

Musik Bihain Long Taim Bilong Devit

9. Stori long samting yu inap lukim na harim sapos yu bin go long bung bilong dediketim tempel long taim Solomon i stap king.

⁹ Long taim Solomon i stap king, musik i bikpela samting insait long lotu i tru. Long taim ol i dediketim tempel, lain bilong pilaim musik ol i mekim wok long kain kain samting, na 120 pris i holim ol biugel. (Ritim 2 Stori 5:​11, 12.) Baibel i tok: “Ol man bilong singim song na ol man bilong winim biugel [em ol pris] i save mekim naispela song tru, na i kamap olsem wanpela nek stret. . . . Ol i kirapim song bilong litimapim nem bilong Bikpela. Song bilong ol i olsem, ‘Yumi mas tenkyu long Bikpela, long wanem, em i gutpela tru long yumi. Oltaim oltaim em i save laikim yumi tru.’” Taim ol i kirapim pinis dispela song, “wantu klaut i pulapim haus bilong Bikpela,” bilong makim olsem Jehova i amamas long samting i bin kamap. Ating ol lain i amamas tru taim ol i harim planti man i winim ol biugel na planti tausen man i mekim singsing na i kamap olsem wanpela nek stret!​—2 Sto. 5:13.

10, 11. Wanem samting i soim olsem ol Kristen bilong pastaim i bin mekim musik taim ol i mekim lotu?

¹⁰ Ol Kristen bilong pastaim ol tu i bin mekim musik taim ol i bung na mekim lotu. Tru, ol i no bung long ol haus lotu sel o long tempel, ol i save bung long haus bilong ol man. Maski ol man i birua long ol o ol i gat planti hevi, ol i wok yet long singim ol song bilong litimapim nem bilong God.

¹¹ Aposel Pol i strongim ol brata Kristen long Kolosi olsem: “Yupela i mas tenkyu long God long bel bilong yupela, na yupela i mas singim ol song bilong Buk Song na ol arapela song bilong lotu na ol song Holi Spirit i kamapim long bel bilong yupela.” (Kl. 3:16) Taim ol man i kalabusim Pol na Sailas, tupela i kirap “beten na mekim song long God,” maski ol i no gat buk singsing long lukim. (Ap. 16:25) Sapos ol man i putim yu long kalabus, hamas singsing bilong Kingdom bai yu inap tingim na singim?

12. Olsem wanem yumi ken soim olsem yumi laikim tru ol singsing bilong Kingdom?

¹² Musik em i bikpela samting insait long lotu yumi mekim, olsem na i gutpela yumi askim yumi yet: ‘Mi save tingim musik insait long lotu i bikpela samting? Mi save traim bes long kamap long ol miting na kibung long taim stret na bai mi inap insait long namba wan singsing wantaim ol bratasista? Taim mi singsing, mi save pilim singsing long bel? Mi save tokim ol pikinini bilong mi long ol i no ken tingim ol singsing i kamap namel long Skul Tiokratik na Miting Bilong Wok, na pablik tok na Stadi Wastaua, olsem taim bilong lusim sia na kirap raun na stretim lek?’ Singsing em hap lotu bilong yumi. Yes, maski yumi “saveman tru” long mekim singsing o yumi “skul yet,” yumi olgeta inap​—na yumi mas​—bungim nek wantaim long litimapim nem bilong Jehova.​—Skelim 2 Korin 8:​12.

Ol Senis

13, 14. Bilong wanem i bikpela samting long givim bel long singsing strong long ol miting bilong kongrigesen? Stori long dispela.

¹³ Winim 100 yia i go pinis, Zion’s Watch Tower i stori long wanpela as na ol singsing bilong Kingdom i bikpela samting. Em i tok: “Pasin bilong mekim singsing i gutpela rot bilong putim tok i tru i go daun long tingting na bel bilong lain bilong God.” Planti tok bilong ol singsing bilong yumi ol i kam long Baibel, olsem na taim yumi lainim ol tok bilong sampela singsing, dispela em i gutpela rot bilong putim tok i tru i go daun long bel bilong yumi. Planti husat i bin kam namba wan taim long ol miting, bel bilong ol i kirap tru taim ol i harim ol bratasista i givim bel tru long mekim singsing.

¹⁴ Wanpela nait long 1869, C. T. Russell i pinis wok na i laik wokabaut i go bek long haus na em i harim singsing i kam long wanpela haus. Long dispela taim, em i ting em i no inap painim stretpela save long God. Olsem na em i ting long wok strong long wok bisnis bilong em, na sapos em i kisim bikpela mani, em inap helpim ol man long ol samting bilong skin, maski em i no inap helpim ol long kisim save long God. Brata Russell i go insait long dispela haus em singsing i kam long en, na em i lukim ol man i toktok long Baibel. Em i sindaun na harim tok. Bihain em i tok olsem ol tok em i harim long dispela nait “em inap tasol . . . long kirapim em long bilip gen olsem God i as bilong Baibel.” Tingim, em ol singsing tasol i bin kirapim Brata Russell long kam long dispela miting.

15. Save bilong yumi long tok bilong Baibel i wok long kamap klia moa, olsem na i gat wok long mekim wanem senis long buk singsing bilong yumi?

¹⁵ Taim ol yia i kamap na i go pinis, tingting bilong yumi long sampela tok bilong Baibel i senis liklik. Sindaun 4:18 i tok: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” Ol nupela save yumi kisim i mekim na yumi mas senisim sampela tok long ol singsing bilong yumi. Inap 25 yia, ol Witnes Bilong Jehova long planti kantri i bin yusim dispela buk singsing, Mekim Singsing Long Jehova.b Kirap long taim ol i wokim dispela buk na i kam, save bilong yumi long sampela tok bilong Baibel i bin kamap klia moa, na nau yumi mekim wok long kain tok olsem pasin laikim, stiatok, na savetingting. Olsem na i gat wok long stretim ol singsing bilong yumi na bai i stret long nupela save nau yumi kisim.

16. Olsem wanem nupela buk singsing bai helpim yumi long bihainim tok bilong Pol long Efesus 5:19?

¹⁶ Long dispela as, na i gat ol narapela as tu, lain Gavening Bodi i tok orait long wokim nupela buk singsing nem bilong en Sing to Jehovah. Namba bilong ol singsing long nupela buk singsing em 135 tasol. I no gat planti singsing bilong lainim, olsem na bai yumi inap tingim gut ol tok bilong sampela bilong ol nupela singsing. Dispela i stret wantaim tok bilong Pol long Efesus 5:19.​—Ritim.

Soim Olsem Yu Laikim Ol Singsing

17. Wanem samting bai helpim yumi na yumi no pret na sem long singsing long ol miting bilong kongrigesen?

¹⁷ Olsem wanem? Bai yumi larim pasin bilong pret na sem i pasim yumi long singsing strong long ol miting Kristen? Tingim: Taim yumi toktok, planti taim toktok bilong ‘yumi i save popaia.’ (Jem. 3:2) Tasol yumi no save larim dispela i pasim yumi long litimapim nem bilong Jehova taim yumi autim tok long ol haus. Olsem na sapos yumi no gat gutpela nek long singsing, yumi no ken larim dispela i pasim yumi long litimapim nem bilong God long rot bilong singsing. Jehova, em man i “givim maus long ol manmeri,” em i amamas long harim yumi yusim nek bilong yumi long mekim singsing i givim biknem long em.​—Kis. 4:11.

18. Wanem samting i helpim planti bratasista long lainim ol nupela singsing?

¹⁸ I gat ol CD, nem bilong en Sing to Jehovah​—Piano Accompaniment, i bin helpim planti bratasista long lainim ol nupela singsing. Musik i stap long ol dispela CD i gutpela tru long harim. Sapos yu harim dispela musik planti taim long haus, em bai helpim yu long lainim nek bilong ol nupela singsing.

19. Stori long olsem wanem ol i bin redim ol musik bilong yumi bilong Kingdom.

¹⁹ Ating sampela taim yumi no tingim tumas ol musik em yumi save harim long ol bikpela de kibung, kibung sekit, na kibung distrik. Tasol bikpela wok tru i insait long wok bilong redim. Taim ol i makim pinis sampela musik, ol i mas raitim gut bambai 64 manmeri bilong Wastaua em ol i insait long lain bilong mekim musik ol i ken pilaim. Dispela lain bai lusim planti aua tru bilong skelim skelim planti taim ol dispela musik em ol bai prektis long en, na bihain rekodim long haus bilong rekodim musik long Patterson, New York. Tenpela bilong ol dispela brata na sista ol i no stap long Amerika. Tasol olgeta i amamas long insait long dispela wok bilong redim ol gutpela musik bilong ol bung tiokratik bilong yumi. Yumi ken soim olsem yumi tenkyu long bikpela hatwok bilong ol. Olsem na taim siaman bilong kibung i singautim yumi long kisim ples sindaun, yumi sindaun isi na harim musik em ol i bin amamas long redim.

20. Yu tingting strong long mekim wanem long taim bilong ol miting?

²⁰ Jehova i save putim yau taim yumi mekim ol singsing bilong litimapim nem bilong em. Ol i bikpela samting long em. Yumi inap mekim bel bilong em i amamas long rot bilong givim bel olgeta long singsing strong long taim yumi bung bilong lotu. Yes, maski yumi saveman tru bilong singsing o yumi skul yet, yumi mas “singim ol song long Bikpela”!​—Sng. 104:33.

[Ol Futnot]

Wanem Tingting Bilong Yu?

• Wanem ol eksampel long taim bilong ol man i bin raitim Baibel, i soim olsem musik i gat bikpela wok insait long lotu bilong yumi?

• Olsem wanem pasin bilong bihainim tok bilong Jisas long Matyu 22:37 i poroman wantaim pasin bilong givim bel olgeta long mekim ol singsing bilong Kingdom?

• Wanem sampela rot bilong kamapim tenkyu bilong yumi long ol singsing bilong Kingdom?

[Piksa long pes 23]

Yu save tokim ol pikinini bilong yu long ol i no ken lusim sia na raun nating long taim bilong singsing?

[Piksa long pes 24]

Yu save lainim ol singsing bilong Kingdom long haus bilong yu?