Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Traim bekim ol dispela askim i stap daunbilo:
• Dispela bilip olsem God i makim pinis ol samting bai painim yumi long bihain, em bilip bilong lain i bihainim husat?
Lain bilong Kalvin i bilip olsem God i makim pinis ol samting bai painim yumi bihain. Ol tingting na tok bilong Jean Cauvin (John Calvin) i stap long sampela lotu olsem Presbitirian, Kongrigesenel, na Puritan.—9/1, pes 18-21.
• Kein i kisim we meri bilong em?
Meri bilong Kein em i wanpela pikinini bilong Iv. Iv i karim “ol arapela pikinini man na meri tu.” (Stt. 5:4)—9/1, pes 25.
• God i salim wanem ensel i go pas long ol Israel taim em i kisim bek ol long Isip? (Kis. 23:20, 21, NW)
Ating dispela ensel em ‘nem bilong Jehova i stap long em,’ em namba wan Pikinini Bilong God, bihain em i holim nem Jisas.—9/15, pes 21.
• I gat wanem as na Namba 1 Korin i stori long mit em ol i bin ofaim long ol giaman god?
Ol Grik na Rom i save ofaim ol animal long ol tempel bilong ol, tasol hap mit ol i no kaikai, ol i save salim long ol maket. Ol Kristen i no save insait long pasin bilong lotuim ol giaman god, tasol ol i no ken ting olsem mit ol man i bin kisim long tempel na salim long maket em i doti, nogat. Aposel Pol i tok: “Olgeta mit samting ol i save salim long maket, em yupela i ken kaikai. Yupela i no ken tingting planti na askim nabaut. Nogat. Yumi save, ‘Dispela graun, wantaim olgeta samting i stap long en, em olgeta i bilong Bikpela tasol.’” (1 Ko. 10:25, 26)—10/1, pes 12.
• Long ol samting bilong lotu i tru, wanem sampela eskius em God i no orait long en?
‘Em hatwok tumas. Mi no laik mekim. Mi bisi tru. Mi no fit long mekim. Wanpela i bagarapim bel bilong mi.’ Ol dispela eskius i no ken givim rot long man long ting em i no gat wok long bihainim ol tok bilong God, nogat.—10/15, pes 12-15.
• Wanem sampela samting yu ken mekim na bai ol miting Kristen i ken strongim yu yet na ol narapela?
Redi gut pastaim. Go oltaim. No ken kam leit. Bringim i kam ol samting bilong miting. Abrusim ol samting i pulim tingting. Insait long ol miting. Mekim ol sotpela bekim. Inapim ol asainmen. Mekim tok amamas. Toktok gut wantaim, paslain na bihain long ol miting.—10/15, pes 22.
• Sik lepra i bin insait long wanem stori bilong Baibel bilong wanpela yangpela meri?
Namba 2 King sapta 5 i stori long wanpela yangpela meri Israel, em wokmeri bilong wanpela kepten bilong ami bilong Siria, nem bilong em Naman. Dispela man i gat sik lepra, olsem na meri i tokim em long go lukim profet Elisa na bai em i ken kamap orait.—11/1, pes 22.
• Yumi kisim wanem skul long pasin bilong Aron long larim ol wanlain i pulim em?
Taim Moses i no stap, ol Israel i strong long Aron i wokim wanpela god bilong ol, na em i mekim olsem. Dispela i soim olsem pasin we ol wanlain i pulim yumi, em samting i no painim tasol ol yangpela. Dispela pasin inap painim tu ol man i gat bikpela krismas em ol i gat laik long mekim pasin i stret. Yumi no ken larim ol wanlain i pulim yumi.—11/15, pes 8.
• Wanem tok em i tru, na wanem tok em i giaman?
Tok tru: Satan em i wanpela man i stap tru. (2 Ko. 11:14) Tok giaman: Taim ol man i dai ol i go long ples spirit. (Sav. 9:5) Tok tru: Ol gutpela ensel i save tingim yumi. (Sng. 34:7) Tok giaman: Jisas i wankain olsem God. (1 Ko. 11:3)—12/1, pes 8-9.