Yu Save Long Dispela?
I gat wanem as na Buk 1 Korin long Baibel i stori long mit em ol i bin ofaim long ol giaman god?
▪ Aposel Pol i tok: “Olgeta mit samting ol i save salim long maket, em yupela i ken kaikai. Yupela i no ken tingting planti na askim nabaut. Nogat.” (1 Korin 10:25) Ol i kisim we ol dispela mit?
Pasin bilong ofaim ol animal em i nambawan pasin ol Grik na Rom i save mekim long ol tempel bilong ol, tasol ol i no save kaikai olgeta mit bilong ol animal ol i kilim olsem ofa. Mit i stap yet long ol tempel bilong ol haiden, ol i kisim na go salim long ol maket. Buk Idol Meat in Corinth i tok: “Ol man bilong lotu . . . em sampela taim ol i save kolim ol olsem man bilong kuk o katim abus. Hap abus ol i kisim olsem pe bilong kilim ol animal bilong mekim ofa, ol i salim long maket.”
Olsem na i no olgeta mit ol i salim long maket, em mit ol i bin ofaim long tempel. Taim ol i digim graun long maket bilong salim mit long Pompeii (Tok Latin, macellum) ol i painim ol bun olgeta bilong sampela sipsip. Saveman Henry J. Cadbury i tok, dispela i kamapim olsem “ol i bin salim ol animal i stap laip yet o ol i bin kilim long macellum, na tu, ol i bin salim ol animal ol i bin kilim pinis o hap bilong ol animal ol i bin ofaim long tempel.”
Pol i laik kamapim olsem, tru ol Kristen i no laik insait long pasin bilong lotuim ol god giaman, tasol mit ol i bin ofaim long tempel i no doti olgeta.
Bilong wanem pasin bilong bel nogut i stap namel long ol Juda na ol Samaria long taim bilong Jisas?
▪ Jon 4:9 i tok: “Ol Juda i no save poromanim ol Samaria.” As bilong dispela pasin bilong bel nogut i bin kirap long taim Jeroboam i bin kamapim pasin bilong lotuim ol imis long kingdom bilong 10-pela lain Israel long hap not. (1 King 12:26-30) Lain Samaria ol i asples bilong Samaria, em biktaun bilong kingdom long hap not. Taim lain Asiria i daunim ol long pait long yia 740 B.C.E., ol Asiria i bringim ol man bilong ol narapela lain em ol i save lotuim ol giaman god, i kam sindaun long Samaria. Ol Samaria i maritim ol dispela lain i kam sindaun long hap bilong ol, na dispela i mekim na lotu bilong ol Samaria i go nogut moa yet.
Inap sampela handet yia bihain, ol Samaria i birua long wok bilong ol Juda, taim ol i kam bek long kalabus long Babilon na ol i laik wokim gen tempel bilong Jehova na banis bilong Jerusalem. (Esra 4:1-23; Nehemia 4:1-8) Pasin birua bilong lotu i kamap bikpela moa taim ol Samaria i wokim tempel bilong ol yet long maunten Gerisim long yia 400-301 B.C.E. samting.
Long taim bilong Jisas, taim ol man i harim dispela tok “Samaria,” ol i no tingim tumas ples Samaria, nogat, ol i tingim ol manmeri husat i bihainim lotu bilong ol Samaria. Ol Samaria i save lotu yet antap long maunten Gerisim, na ol Juda i save bel nogut na i nolaik tru long ol.—Jon 4:20-22; 8:48.
[Piksa long pes 12]
Plet simen i soim ofa bilong animal, 550 B.C.E. samting
[Kredit Lain long pes 12]
Musée du Louvre, Paris
[Piksa long pes 12]
Jeroboam i kamapim pasin bilong lotuim ol imis