Beten

7 God Bai Harim na Bekim?

ASKIM i stap antap i save kirapim tru tingting bilong planti man na ol i gat laik long save moa long en. Baibel i soim olsem Jehova i save harim ol beten long nau. Samting yumi mekim inap makim olsem God i save harim ol beten bilong yumi o nogat.

Jisas i givim strongpela tok long ol hetman bilong lotu long taim bilong em, em ol i bin mekim ol beten bilong ol man i ken lukim ol na ting ol i stretpela man tru. Em i tok ol dispela man i “kisim pinis pe bilong ol.” Dispela i makim olsem ol i kisim pinis ol samting ol i gat laik tru long kisim​—em ol man i mas lukim ol na givim biknem long ol, tasol ol i no kisim samting ol i mas kisim, em God i mas harim beten bilong ol. (Matyu 6:5) Na long nau tu, planti man i bihainim laik bilong ol yet na beten na ol i no bihainim laik bilong God. Ol i no tingim ol stiatok bilong Baibel em yumi stori pinis long en, olsem na God i no save harim beten bilong ol.

Tasol olsem wanem long yu? Yu ting God bai harim na bekim ol beten bilong yu? Maski yu bilong wanem lain, kantri, o sindaun, dispela i no inap pasim God long harim ol beten bilong yu. Baibel i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:​34, 35) Yu ting ol dispela tok i makim yu? Sapos yu aninit long God, orait yu bai tingim em tru na yu no laik mekim wanpela samting bilong bagarapim bel bilong em. Sapos yu bihainim stretpela pasin, yu wok strong long bihainim laik bilong God na i no laik bilong yu yet o bilong ol narapela man. Yu laik bai God i harim ol beten bilong yu? Baibel i soim yu long rot bilong mekim olsem.a

Tru planti i laik bai God i bekim beten bilong ol long rot bilong wanpela mirakel. Long taim bilong ol man i bin raitim Baibel, wan wan taim tasol God i bin wokim ol mirakel. Em i wokim wanpela mirakel na sampela handet yia bihain em i wokim narapela mirakel. Na tu, Baibel i soim olsem haptaim bilong wokim ol mirakel i pinis long taim bilong aposel. (1 Korin 13:​8-10) Olsem wanem? Dispela i makim olsem long nau God i no save bekim ol beten? Nogat tru! Tingim sampela beten em i bin bekim.

God i save givim savetingting. Jehova em i As bilong olgeta savetingting. Em i save givim savetingting long ol manmeri i save askim em long stiaim ol na i laik bihainim ol tok bilong em.​—Jems 1:5.

God i save givim holi spirit na ol gutpela samting holi spirit i kamapim. Holi spirit em strong bilong God. I no gat narapela strong i winim strong bilong holi spirit. Em inap helpim yumi long winim ol hevi. Em inap givim bel isi long yumi taim yumi bel hevi. Na em inap helpim yumi long kisim ol gutpela pasin. (Galesia 5:​22, 23) Jisas i tokim ol disaipel bilong em olsem God i save amamas long givim dispela presen.​—Luk 11:13.

God i givim save long ol man i wok long painim em. (Aposel 17:​26, 27) Long graun olgeta, i gat ol manmeri i gat laik tru long painim tok i tru. Ol i laik save long God​—nem bilong em, ol samting em i tingting pinis long mekim long graun na ol manmeri, na olsem wanem ol i ken go klostu long em. (Jems 4:8) Planti taim ol Witnes Bilong Jehova i save bungim ol kain man olsem na ol i amamas long toktok wantaim ol na bekim ol askim bilong ol long rot bilong Baibel.

Olsem wanem? Dispela i as na yu bin kisim dispela nius? Yu laik save moa long God? Ating dispela em i rot bilong God long bekim beten bilong yu.

[Futnot]