Beten

6 Em Inap Helpim Yumi?

TRU beten i save helpim yumi? Yes! Baibel i soim yumi olsem ol beten bilong ol gutpela wokman bilong God i save helpim ol. (Luk 22:40; Jems 5:13) Tru tumas, beten inap helpim yumi long pas gut wantaim God, helpim bel na tingting, na skin bilong yumi. Em inap helpim yumi long wanem rot?

Yumi ken tok piksa olsem, pikinini bilong yu i kisim wanpela presen. Bai yu skulim em olsem em inap tasol long pilim amamas long bel? O bai yu skulim em long tok tenkyu? Taim yumi tokaut long samting yumi pilim long bel, yumi kamapim klia tingting i stap long bel bilong yumi na strongim dispela tingting. Yu ting dispela i wankain taim yumi toktok wantaim God? Yes! Tingim sampela beten olsem.

Beten bilong tok tenkyu. Taim yumi tenkyu long Papa bilong yumi long ol gutpela samting i painim yumi, yumi save tingim ol blesing bilong yumi. Long dispela rot, yumi tenkyu, amamas, na yumi holim stretpela tingting long ol samting.​—Filipai 4:6.

Olsem: Jisas i tok tenkyu long Papa i bin harim beten bilong em na i mekim samting em i askim long en.​—Jon 11:41.

Beten bilong lusim rong. Taim yumi askim God long lusim rong bilong yumi, yumi strongim maus bilong bel bilong yumi, tanim bel tru, na soim olsem yumi pilim tru sin yumi bin mekim. Na tu, dispela i helpim yumi na yumi no bel hevi tumas long sin bilong yumi.

Olsem: Devit i beten bilong soim olsem em i tanim bel tru na em i sori long rong em i mekim.​—Song 51.

Beten bilong kisim savetingting na ol tok bilong stiaim yumi. Pasin bilong beten askim Jehova long stiaim yumi na givim savetingting long yumi bilong wokim ol gutpela disisen, dispela inap helpim yumi long kamapim pasin daun. Na em inap helpim yumi long tingim olsem yumi no gutpela olgeta na i strongim pasin bilong bilip tru long Papa bilong yumi long heven.​—Sindaun 3:​5, 6.

Olsem: Long pasin daun Solomon i askim Jehova long stiaim em na givim savetingting long em bilong bosim ol Israel.​—1 King 3:​5-12.

Beten na kamapim bel hevi. Taim yumi autim ol hevi bilong yumi long God, dispela bai mekim gut bel bilong yumi na yumi larim Jehova i strongim yumi na yumi no bilip long strong bilong yumi yet.​—Song 62:8.

Olsem: King Asa i beten taim ol birua i laik pait long em.​—2 Stori 14:11.

Beten bilong helpim ol man i mas kisim helpim. Ol kain beten olsem i helpim yumi long lusim pasin bilong tingim yumi yet tasol na kisim pasin bilong pilim hevi bilong ol narapela.

Olsem: Jisas i beten bilong helpim ol disaipel bilong em.​—Jon 17:​9-17.

Beten bilong litimapim nem bilong Jehova. Taim yumi litimapim nem bilong Jehova long ol gutpela wok em i bin mekim na ol gutpela pasin bilong em, pasin bilong yumi long rispek na tenkyu long em bai i go bikpela. Ol kain beten olsem inap helpim yumi tu long pas gut moa wantaim God na Papa bilong yumi.

Olsem: Devit i litimapim nem bilong God long ol samting Em i bin wokim.​—Song 8.

Narapela gutpela samting i save kamap long rot bilong beten em “bel isi God i save givim yumi.” (Filipai 4:7) Long dispela taim nogut, pasin bilong kisim bel isi em i gutpela samting tru. Em inap helpim tu bodi bilong yumi. (Sindaun 14:30) Tasol yu ting dispela i kamap long hatwok bilong yumi yet tasol? O i gat wanpela bikpela samting moa i insait long en?

[Rait long pes 10]

Beten i save helpim bodi, tingting na bel, na moa yet em i helpim yumi long pas gut wantaim God