Ol Man i Askim . . .
Yu ting God i bin wokim Satan?
▪ Baibel i tok God i bin “wokim olgeta samting,” olsem na sampela man i ting God i bin wokim Satan. (Efesus 3:9; Revelesen 4:11) Tasol Baibel i kamapim klia tru olsem God i no bin wokim Satan.
Jehova i bin wokim dispela ensel husat i bin kamap Satan. Olsem na hau dispela nambawan birua bilong God i kamap, i mas i stret wantaim ol tok Baibel i mekim long Jehova olsem Man Bilong Wokim olgeta samting. Baibel i tok long God olsem: “Em i olsem wanpela bikpela strongpela ston . . . [“Ol wok bilong em i nambawan olgeta,” NW ]. Na pasin bilong en i gutpela na stretpela tasol.” (Lo 32:3-5) Long dispela tok yumi inap kisim tingting olsem dispela ensel bilong God husat i kamap Satan, pastaim em i gutpela na stretpela olgeta. Long Jon 8:44, Jisas i tok Satan “i no holimpas tok i tru,” na dispela i makim olsem pastaim Satan em i wanpela ensel i save mekim tok tru na em i no gat asua.
Tasol dispela ensel husat i kamap Satan, em i wankain olsem ol narapela ensel na ol man Jehova i bin wokim, na em i stap fri long makim olsem em i laik bihainim pasin i stret o pasin i no stret. Em i makim rot bilong birua long God na em i kirapim namba wan man na meri tu long bihainim em, na long dispela rot em i mekim em yet i kamap Satan, mining bilong en olsem “Birua.”—Stat 3:1-5.
Dispela ensel nogut i mekim em yet i kamap Devil, mining bilong en “Man Bilong Krungutim Gutnem.” Satan em man bilong giaman na yumi no inap lukim em, na long rot bilong snek em i giamanim Iv na pulim em long sakim lo God i bin putim. Em as na Jisas i bin kolim Satan olsem “papa bilong pasin giaman.”—Jon 8:44.
Tasol olsem wanem wanpela ensel i gutpela olgeta husat i no gat ol pasin kranki o sampela lain nogut bilong pulim em, em inap kisim tingting nogut long bel bilong em? I luk olsem em i gat bikpela laik tru long ol manmeri i mas lotuim em—em lotu ol i mas givim long God tasol—na em i lukim olsem em i gat rot long pulim ol man na bai ol i stap aninit long em olsem bos bilong ol, na ol i no ken i stap aninit long Jehova. Em i wok long tingim tingim long bel olsem em yet inap bosim ol man na em i no rausim dispela tingting, olsem na dispela tingting i kamap strong long bel bilong em na em i kirap bihainim dispela tingting. Buk Jems i stori long dispela kain samting olsem: “Laik bilong bel bilong olgeta man wan wan i save traim ol, dispela laik i save giamanim ol na pulim ol. Na taim dispela laik i stap long bel i kamap bikpela, em i save kamapim sin.”—Jems 1:14, 15; 1 Timoti 3:6.
Yumi ken tok piksa olsem: Wanpela akaunten i lukim wanpela gutpela rot bilong paulim sampela mani bilong kampani na kisim bilong em yet. Ating kwiktaim em i rausim dispela tingting i no stret. Tasol sapos em i tingim tingim dispela samting, dispela tingting bai kamap strong long bel na ating em bai kirap mekim dispela pasin. Taim em i mekim olsem, em i mekim em yet i kamap stilman. Sapos em i giaman na tok em i no bin mekim dispela rong, em i kamap man bilong giaman tu. Olsem tasol, dispela ensel i larim laik nogut bilong en i kamap strong moa na em i kirap bihainim dispela laik. Olsem na long laik bilong em yet em i kirap mekim pasin giaman na bikhet long Papa bilong em, na long dispela rot em i mekim em yet i kamap Satan.
Yumi amamas olsem God bai bagarapim Satan long taim em yet i makim. (Rom 16:20) Tasol long nau, ol manmeri i lotuim God Jehova ol i save pinis long ol pasin trik bilong Satan, na Jehova i lukautim ol na bai ol i no ken pundaun long ol pasin trik na giaman bilong Satan. (2 Korin 2:11; Efesus 6:11) Olsem na yu mas “sakim Satan, na em bai lusim [yu] na ranawe.”—Jems 4:7.
[Rait long pes 21]
Wanpela ensel i gutpela olgeta i makim rot bilong birua long God na em i mekim em yet i kamap Satan