Jisas​—⁠Em i Bilong We

“[Pailat] i go insait gen long haus gavana na tokim Jisas: ‘Yu bilong we?’ Tasol Jisas i no bekim tok long em.”​—JON 19:⁠9.

GAVANA Bilong Rom, Pontius Pailat, i bin kamapim dispela askim taim Jisas i sanap long kot bilong skelim olsem em bai i stap laip o ol bai kilim em i dai. Pailat i save Jisas i kam long wanem ples bilong Israel. (Luk 23:​6, 7) Em i save tu olsem Jisas i no wanpela man nating. Olsem wanem? Pailat i ting Jisas i bin stap laip long bipo? Dispela man haiden i gat laik long save long tok i tru na em i laik bihainim? Tasol maski em i gat dispela tingting o nogat, Jisas i no bekim tok bilong em, na i no longtaim na ol samting i kamapim klia olsem dispela man i tingim tasol namba bilong em na em i no tingim tok i tru na stretpela pasin.​—⁠Matyu 27:​11-26.

Gutpela tru na ol man husat i gat laik tru long save long Jisas i bilong we, ol i ken kisim save long dispela. Baibel i kamapim klia Jisas Krais i bilong we. Tingim ol dispela samting.

▪ Ples mama i karim em Taim yumi skelim ol yia, yumi ken save olsem mama i bin karim Jisas long Oktoba bilong yia 2 B.C.E. long Betlehem, em wanpela liklik ples long Judia. Sisar Ogastus i tokaut olsem olgeta man i mas i go na rejistaim nem bilong ol. Dispela i bin kirapim mama bilong Jisas, Maria, na man bilong em Josep, long i go long Betlehem, em asples bilong Josep. Long dispela taim ‘klostu Maria i laik karim pikinini.’ I gat planti man long dispela ples, olsem na tupela i no inap painim ples slip long wanpela haus pasindia na ol i go slip long wanpela haus bilong ol animal. Maria i karim Jisas long dispela hap na putim em long wanpela bokis kaikai bilong ol animal.​—⁠Luk 2:​1-7.

Sampela handret yia paslain long dispela, wanpela tok profet long Baibel i tokaut long ples em mama bai karim Jisas, olsem: “Betlehem Efrata, yu liklik taun tru namel long olgeta taun bilong Juda, tasol wanpela man bilong yu bai i kamap hetman na em bai i bosim ol Israel long nem bilong mi.”a (Maika 5:⁠2) Betlehem em wanpela liklik taun tru namel long ol taun bilong Judia. Tasol dispela liklik taun bai kisim biknem. Mesaia o Krais, em God i tok promis long em, bai kamap long Betlehem.​—⁠Matyu 2:​3-6; Jon 7:​40-42.

▪ Ples em i kamap bikpela long en Famili bilong Jisas i bin sindaun sotpela taim long Isip, na bihain ol i go sindaun long Nasaret, wanpela taun i stap long provins Galili inap 96 kilomita long hap not bilong Jerusalem. Long dispela taim, Jisas i no winim yet 3-pela krismas. Hia long dispela naispela provins we i gat ol fama, ol wasman bilong sipsip, na ol man bilong kisim pis, Jisas i go bikpela insait long wanpela bikpela famili i no gat planti samting bilong skin.​—⁠Matyu 13:​55, 56.

Sampela handret yia paslain long mama i karim Jisas, Baibel i bin tok profet olsem Mesaia bai wanpela “man Nasaret.” Matyu, man bilong raitim Gutnius, i tok famili bilong Jisas i kam sindaun long Nasaret. “Em i mekim olsem na dispela i truim tok bilong ol profet: ‘Bai ol i kolim em man Nasaret.’ ” (Matyu 2:​19-23) Dispela nem Nasaret i kam long wanpela tok Hibru i makim “kru.” Taim Matyu i tok olsem, em i kamapim tok profet bilong Aisaia olsem Mesaia em i “kru” i kamap long lain bilong Jesi, dispela i makim olsem Mesaia em wanpela tumbuna pikinini bilong Jesi, em papa bilong King Devit. (Aisaia 11:⁠1) Tru tumas, Jisas em i tumbuna pikinini bilong Jesi long rot bilong Devit.​—⁠Matyu 1:​6, 16; Luk 3:​23, 31, 32.

▪ Ples em i bin stap long en bipo tru Baibel i tok laip bilong Jisas i kirap paslain tru long mama i karim em long dispela haus bilong ol animal long Betlehem. Tok profet bilong Maika, em yumi stori pinis long en, i tok moa long Em olsem “long bipo tru [em i] . . . kamap, na lain bilong en i stap yet.” (Maika 5:⁠2) Jisas em i namba wan Pikinini Bilong God, na paslain long mama i karim em olsem wanpela man long graun, em i bin stap olsem wanpela spirit long heven. Jisas yet i tok: “Mi lusim heven na kam daun.” (Jon 6:38; 8:23) Olsem wanem dispela samting inap kamap?

Long rot bilong holi spirit, God Jehova i wokim mirakel na kisim laip bilong Pikinini bilong em long heven na putim long bel bilong wanpela nupela meri Juda, em Maria, bambai em i ken karim Jisas olsem wanpela pikinini i gutpela olgeta.b I no hatwok long God i Gat Olgeta Strong i wokim kain mirakel olsem. Olsem ensel husat i bin stori long Maria long ol samting bai kamap i tok, “olgeta samting God i tokaut long en bai kamap tru.”​—⁠Luk 1:​30-35, 37.

Baibel i tokim yumi long Jisas i bilong we, na i no dispela tasol. Fopela Gutnius​—⁠Matyu, Mak, Luk, na Jon​—⁠i kamapim planti stori long ol wok em i bin mekim.

[Ol Futnot]