Jisas Krais Em i Husat Tru?
“Taim Jisas i go long Jerusalem, olgeta manmeri long taun i kirap nogut na ol i wok long askim olsem: ‘Dispela man em i husat?’ Ol manmeri i wok long tok: ‘Em Jisas, profet i kam long Nasaret bilong Galili!’ ”—MATYU 21:10, 11.
TAIM Jisas Kraisa i kam long Jerusalem long dispela de long yia 33 C.E., bilong wanem planti man i kirap nogut long dispela? Planti manmeri long taun i bin harim ol stori bilong Jisas na long ol narakain samting em i bin mekim. Ol i wok long tokim ol narapela long em. (Jon 12:17-19) Tasol ol manmeri i no bin save olsem dispela man i stap namel long ol bai stiaim tingting na i stap bilong planti manmeri long olgeta hap bilong graun i kam inap long nau!
Tingim sampela bikpela samting we Jisas i bin stiaim tingting bilong ol man i kam inap long nau.
▪ Kalenda em planti man i mekim wok long en i kirap long yia ol man i ting mama i bin karim Jisas.
▪ Inap 2 bilion manmeri—olsem 33 pesen bilong olgeta manmeri long graun—i tok ol i Kristen.
▪ Lotu Islam, winim 1 milion manmeri i insait long en long olgeta hap, i skulim ol man olsem Jisas em i “wanpela bikpela profet tru, winim Abraham, Noa, na Moses.”
▪ Ol man i save mekim wok long planti savetok bilong Jisas. Sampela bilong ol em olsem:
“Tanim narapela wasket tu long em.”—MATYU 5:39.
“Amamas bilong givim samting i winim amamas bilong kisim samting.”—APOSEL 20:35.
“I no gat wanpela man inap stap wokboi bilong tupela bosman.”—MATYU 6:24.
“No ken tromoi ol gutpela bis bilong yupela i go long ol pik.”—MATYU 7:6.
“Olgeta samting yupela i laik bai ol man i mekim long yupela, yupela i mas mekim long ol.”—MATYU 7:12.
‘Skelim gut pe bilong samting.’—LUK 14:28.
Em nau, Jisas i stiaim tru tingting bilong planti man long olgeta hap. Tasol maski i olsem, ol man i gat kain kain tingting na bilip long em. Olsem na ating yu tingting planti olsem: ‘Jisas Krais em i husat tru?’ Baibel tasol i tokim yumi long Jisas i bilong we, ol wok em i mekim, na as na em i dai. Taim yumi save long tok i tru bilong ol dispela samting bilong em, dispela bai mekim bikpela samting long laip bilong yumi—long nau na long bihain.
[Futnot]
a “Jisas,” em nem bilong dispela profet bilong Nasaret, na mining bilong en “Jehova i Save Kisim Bek Ol Man.” Dispela tok “Krais” em wanpela biknem na mining bilong en “Man God i Makim,” dispela i makim olsem God i bin makim Jisas long holim wanpela bikpela wok.