Go Klostu Long God
Taim Ol Lapun Bai Yangpela Gen
YUMI olgeta i no laik i go lapun na kisim ol hevi bilong lapun—olsem skin i slek, ai i nogut, yau i no inap harim gut tok, na lek nogut. Ating yu inap kisim tingting olsem, ‘Bilong wanem God i wokim yumi na yumi amamas long i stap yangpela, tasol bihain yumi bel hevi long ol samting nogut bai painim yumi olsem lapun?’ Yumi amamas long save olsem dispela i no laik bilong God, nogat. God i tingting pinis long mekim ol samting bilong pinisim pasin bilong i go lapun! Tingim tok God i bin mekim long Jop long Jop 33:24, 25.
Tingim ol samting i painim Jop, em wanpela gutpela man Jehova i laikim tumas. Jop i no save olsem Satan i sutim tok long pasin bilong em long stap gut long God. Satan i tok olsem Jop i mekim tasol wok bilong God, long wanem, em i kisim planti gutpela samting. Jehova i bilip strong olsem Jop bai stap gut long em, na Jehova i save olsem em i gat strong long stretim bek ol hevi i painim Jop, olsem na Jehova i larim Satan i traim Jop. Orait, Satan i “mekim ol strongpela sua i kamap long olgeta hap bilong bodi bilong Jop.” (Jop 2:7) Ol liklik snek bilong lang i pulap long ol sua long olgeta hap bilong bodi bilong em, na strongpela skin i karamapim ol dispela sua, na skin i kamap blakpela na i tekewe. (Jop 7:5; 30:17, 30) Yu inap pilim dispela pen em i karim? Maski i olsem, Jop i stap gut yet long God, na i tok: “I go inap long taim mi dai mi no ken lusim pasin bilong mi long stap gut long God!”—Jop 27:5, NW.
Tasol Jop i mekim wanpela bikpela popaia. Taim em i ting em bai dai, em i tingting tumas long litimapim nem bilong em yet na i tok “em yet i mekim stretpela pasin na pasin bilong God i no stret.” (Jop 32:2) Elihu, mausman bilong God, i stretim Jop. Tasol Elihu i kamapim tu wanpela gutpela tok bilong God long Jop, olsem: “‘Yu ken marimari long dispela man [Jop] na yu no ken larim em i go long ples bilong ol man i dai pinis, long wanem, mi painim pinis rot bilong baim bek dispela man,’ orait bodi bilong dispela man bai i kamap gutpela na strongpela gen, wankain olsem em i bin i stap long taim em i yangpela man.” (Jop 33:24, 25) Dispela tok i mekim gut bel bilong Jop. Em i no mas karim dispela pen i go inap long em i dai. Sapos Jop i tanim bel, God bai i orait long wanpela ofa bilong baim bek em na em bai i no gat moa pen na hevi.a
Long pasin daun Jop i bihainim ol tok bilong stretim em, na em i tanim bel. (Jop 42:6) Jehova i orait long ofa bilong baim bek Jop, na larim dispela ofa i karamapim rong bilong Jop na i opim rot long God i ken stretim bek Jop na givim blesing long em. Jehova i blesim em na “las hap bilong laip bilong en i winim tru ol yia em i bin i stap bipo.” (Jop 42:12-17) Tingim amamas Jop i kisim taim ol sua long skin bilong em i pinis na em i kamap “gutpela na strongpela gen, wankain olsem em i bin i stap long taim em i yangpela man”!
Ofa em God i orait long en bilong baim bek Jop, em inap helpim Jop liklik tasol, long wanem, Jop i stap yet olsem sinman na bihain em i dai. Yumi gat wanpela nambawan gutpela ofa bilong baim bek yumi. Jehova i laikim tumas yumi na em i givim Pikinini bilong em bilong baim bek yumi. (Matyu 20:28; Jon 3:16) Olgeta man husat i bilip long pe bilong baim bek ol man, ol bai kisim laip oltaim long Paradais long graun. Long dispela nupela taim, God bai pinisim pasin bilong i go lapun. Olsem na i gutpela sapos yu kisim save long ol samting yu inap mekim na bai yu inap stap long dispela taim we ol lapun i lukim ‘bodi bilong ol i kamap gutpela na strongpela gen, wankain olsem em i bin i stap taim ol i yangpela.’
Baibel ritim bilong Epril:
[Futnot]
a Dispela tok “baim bek” long hia i makim karamapim. (Jop 33:24) Bilong baim bek Jop, ating dispela ofa em wanpela animal, em God i orait long en bilong karamapim sin, o tekewe sin, bilong Jop.—Jop 1:5.