Yu Ting God i Gat Wanpela Oganaisesen?

OLGETA samting God i bin wokim i wok stret. Olsem: Yumi ken tingim wanpela liklik sel bilong yis, olgeta samting bilong en i wok stret tru. Em i gat planti hap bilong en, wankain olsem traipela balus Boeing 777. Tasol olgeta liklik liklik hap i gat ples na wok bilong en, na olgeta wantaim i stap insait long wanpela raunpela samting em braitpela bilong en inap olsem 5 maikron.a Ol sel bilong yis ol inap kamapim ol narapela sel, em samting ol balus i no inap mekim. Tru tumas, ol dispela liklik liklik samting i save mekim stret wok bilong en na ol i wok gut wantaim!​—⁠1 Korin 14:⁠33.

Na i no ol samting long graun tasol i save wok stret na i wok gut wantaim. Baibel i soim yumi olsem ol spirit i stap long ples antap ol tu i save mekim stret wok bilong ol na ol i wok gut wantaim olsem God i laik bai ol i mas mekim. Long wanpela driman, profet Daniel i lukim wanpela traipela lain ensel i stap long ples bilong God long heven: “I gat planti tausen . . . i mekim wok bilong dispela Man, na planti milion . . . i sanap klostu long em.” (Daniel 7:​9, 10) Yumi ken tingim dispela traipela lain ensel​—⁠winim wan handret milion​—⁠ol i mas wok gut wantaim bilong mekim laik bilong God long helpim ol wokman bilong em hia long graun!​—⁠Song 91:⁠11.

Tru, Man Bilong Wokim olgeta samting, em God Jehova, em i Nambawan Man tru bilong stretim gut ol wok, tasol em i no tingting tasol long ol lo bilong mekim wok, nogat. Em i God bilong pasin sori na amamas, na em i laik bai olgeta samting em i wokim i stap gut. (1 Timoti 1:11; 1 Pita 5:⁠7) Dispela i kamap ples klia long pasin em i bin mekim long lain Israel bilong bipo na long ol Kristen bilong pastaim.

Israel Bilong Bipo​—⁠Jehova i Bosim Ol

God Jehova i mekim wok long Moses long stretim ol samting bilong ol Israel long mekim lotu i tru. Yumi ken tingim pasin bilong wokim kem taim ol i stap long ples drai nating bilong Sainai. Sapos God i larim olgeta wan wan famili i sanapim haus sel bilong ol long hap ol yet i laikim, ol samting bai paul tru. Jehova i tokim ol long wanem hap stret ol wan wan lain i mas sanapim haus sel bilong ol. (Namba 2:​1-34) Na Lo Bilong Moses i kolim stret ol lo bilong lukautim gut helt na i stap klin​—⁠olsem lo bilong rausim pekpek.​—⁠Lo 23:​12, 13.

Taim ol Israel i go insait long Graun Bilong Promis, ol i wanpela lain i gat ol lo bilong stretim gut olgeta samting long sindaun bilong ol. Jehova i brukim ol i go long 12-pela lain, na olgeta wan wan lain i gat graun bilong ol yet. Lo Jehova i givim long lain Israel long rot bilong Moses i bosim olgeta samting long i stap bilong ol​—⁠lotu, marit, famili, ediukesen, bisnis, kaikai, wokim gaden, lukautim ol animal, na ol narapela samting.b Sampela lo i kolim stret ol liklik liklik samting ol i mas mekim, tasol olgeta lo i soim olsem Jehova i tingim gut lain bilong em na i helpim ol long i stap amamas. Taim ol Israel i bihainim ol dispela gutpela lo Jehova i givim long ol, em i mekim gut tru long ol.​—⁠Song 147:​19, 20.

Tru, Moses em wanpela lida i gat gutpela save, tasol maski em i gat save long mekim wok olsem lida, em i mas i stap gut long oganaisesen bilong Jehova bambai wok bilong em i ken kamap gutpela. Tingim dispela: Olsem wanem Moses i tingim wanem rot ol bai bihainim long ples drai nating? Long san Jehova i putim wanpela klaut na long nait em i putim wanpela paia bilong soim rot long Moses. (Kisim Bek 13:​21, 22) Tru, God i mekim wok long ol man, tasol Jehova yet i stretim ol samting bilong ol manmeri bilong em na soim rot long ol. Na i wankain tu long taim bilong ol aposel.

Ol Kristen Bilong Pastaim i Stretim Gut Ol Wok

Ol aposel na ol disaipel i bin taitim bun tru long autim tok, olsem na ol kongrigesen Kristen i kamap long planti hap bilong Esia na Yurop long dispela taim bipo. Maski ol dispela kongrigesen i stap long ol narapela narapela hap, ol i no stap wanpis na bosim ol yet, nogat. Olgeta kongrigesen i wok gut wantaim, na ol aposel i lukautim ol na ol i kisim gutpela helpim long dispela. Olsem: Aposel Pol i makim Taitus long go long Krit bilong “stretim ol samting.” (Taitus 1:⁠5) Na Pol i tokim kongrigesen Korin olsem sampela brata “i gat save long mekim wok bos,” olsem ol i man bilong stretim gut ol wok. (1 Korin 12:28) Tasol husat i as na ol samting bilong kongrigesen i wok gut? Pol i tok, “God i bin joinim,” olsem stretim gut, ol wok bilong kongrigesen.​—⁠1 Korin 12:⁠24.

Ol wasman insait long kongrigesen Kristen ol i no stap bos bilong ol wanbilip, nogat. Ol i “wanwok” bilong ol na ol i bihainim tok i kam long rot bilong spirit bilong God, na ol i mas i stap olsem “gutpela piksa bilong ol dispela sipsip.” (2 Korin 1:24; 1 Pita 5:​2, 3) Jisas Krais yet, em i bin kirap bek long matmat, em i stap “het bilong kongrigesen,” na i no wanpela man bilong graun o wanpela lain man i gat sin, nogat.​—⁠Efesus 5:⁠23.

Taim kongrigesen long Korin i kirap mekim ol samting i narapela kain tru long ol samting ol narapela kongrigesen i mekim, Pol i tokim ol: “Olsem wanem? Tok bilong God i bin kirap long yupela pastaim, a? Yupela tasol i bin kisim tok bilong God, na ol arapela manmeri nogat?” (1 Korin 14:36) Pol i mekim dispela askim bilong stretim tingting bilong ol na helpim ol long save olsem ol i no ken bihainim tingting bilong ol yet long mekim ol wok insait long kongrigesen. Ol kongrigesen i go bikpela na i kamap strong taim ol i bihainim tok bilong ol aposel.​—⁠Aposel 16:​4, 5.

Kamapim Klia Pasin Laikim Bilong God

Olsem wanem long nau? Ating sampela i surik long go insait long wanpela oganaisesen bilong lotu. Tasol ol tok bilong Baibel i soim olsem, long olgeta taim God i bin mekim wok long oganaisesen bilong em bilong kamapim ol samting em i tingting pinis long mekim. Em i bin stretim gut wok lotu bilong lain Israel bilong bipo, na em i bin stretim gut wok bilong ol Kristen bilong pastaim long mekim lotu bilong ol.

Olsem na i stret yumi ken ting God Jehova i bosim yet lain bilong em olsem em i bin mekim bipo, a? Tru tumas, taim em i stretim gut ol samting insait long lain i save lotuim em na ol i stap wanbel long lotu, dispela i kamapim pasin bilong em long tingim gut ol. Long nau, Jehova i save mekim wok long oganaisesen bilong em long kamapim ol samting em i tingting pinis long mekim long ol manmeri bilong graun. Olsem wanem yumi inap luksave long oganaisesen bilong em? Tingim ol mak oganaisesen bilong em i mas winim.

▪ Ol Kristen tru i wok gut wantaim bilong mekim wanpela wok. (Matyu 24:14; 1 Timoti 2:​3, 4) Jisas i tokim lain bilong em long ol i mas autim gutnius bilong Kingdom long olgeta kantri, em wanpela wok ol i no inap mekim sapos i no gat wanpela oganaisesen i stap long olgeta hap. Yumi ken tok piksa olsem: Yu wanpela inap givim kaikai long wanpela man, tasol sapos yu mas givim kaikai long planti tausen, o planti milion man, yu mas i gat wanpela lain i save wok gut wantaim, olsem wanpela oganaisesen bilong stretim gut wok. Bilong inapim gut wok autim tok ol i bin kisim, ol Kristen tru i save “wok gut wantaim” long mekim dispela wok. (Sefanaia 3:​9, NW ) Yu ting wanpela wok inap kamap long olgeta kantri, long kain kain tokples, na long kain kain skin sapos i no gat wanpela oganaisesen i save stap wanbel na i wok gut wantaim? Bekim bilong dispela askim i klia tru, a?

▪ Ol Kristen tru i wok gut wantaim bilong helpim na strongim narapela narapela. Taim man i stap wanpis na i wokabaut i go antap long ol maunten, em inap tingim wanem maunten em i laik go antap long en, na em i no gat wok long tingim na lukautim ol man i no save gut long wokabaut long ples maunten. Tasol sapos em i kisim bagarap o em i pundaun long baret samting, em inap painim taim nogut, long wanem, bai i no gat man bilong helpim em. Em i no savepasin long i stap wanpis. (Sindaun 18:⁠1) Bilong mekim gut wok Jisas i bin givim long ol, ol Kristen i mas helpim narapela narapela. (Matyu 28:​19, 20) Kongrigesen Kristen i save givim ol tok bilong Baibel, trening, na ol tok bilong strongim bel bambai olgeta i ken wok i go yet na ol i no ken les na lusim wok. Sapos i no gat ol miting Kristen bilong skulim yumi long lotuim Jehova, bai yumi go we bilong kisim save long ol tok na lo bilong Jehova?​—⁠Hibru 10:​24, 25.

▪ Ol Kristen tru i save wok gut wantaim bilong mekim wok bilong God long pasin wanbel. Ol sipsip bilong Jisas i save ‘putim yau long nek bilong em,’ na ol i kamap “wanpela lain sipsip” i stap aninit long em. (Jon 10:16) Ol i no save stap namel long ol narapela narapela lotu na lain em ol i save bosim ol yet, na ol i no bruk long ol samting bilong bilip. Olgeta i “wanbel long ol toktok [ol] i mekim.” (1 Korin 1:10) Bilong i stap wanbel, yumi mas wok gut wantaim, na bilong mekim olsem, i mas i gat oganaisesen bilong stretim gut ol wok. Wanpela lain i stap olsem brata brata na i stap wanbel, dispela lain tasol inap kisim blesing bilong God.​—⁠Song 133:​1, 3.

Pasin bilong laikim tru God na laikim tok i tru bilong Baibel i bin pulim planti milion manmeri i kam long wanpela oganaisesen i winim ol dispela mak na ol narapela mak Baibel i kolim. Ol Witnes Bilong Jehova ol i wanpela lain i stap wanbel na stretim gut wok bilong ol, na long olgeta hap bilong graun ol i wok strong long mekim laik bilong God. Em i tok promis long ol olsem: “Mi bai stap namel long ol na wokabaut namel long ol, na mi bai stap God bilong ol, na ol bai stap lain manmeri bilong mi.” (2 Korin 6:16) Yu tu inap kisim dispela gutpela blesing sapos yu insait long oganaisesen bilong God Jehova na lotuim Em.

[Ol Futnot]

[Piksa long pes 13]

I gat ol lo i bosim kem bilong ol Israel

[Piksa long pes 14, 15]

I mas i gat wanpela oganaisesen bilong stretim gut wok bilong autim tok long olgeta hap

Autim tok long ol haus

Helpim ol lain i kisim bagarap

Ol kibung

Wokim ol haus bilong lotu