Yu Save Long Dispela?
Paslain long aposel Pita i go long Kornilius em i stap wantaim wanpela man bilong redim skin bilong animal, yu ting dispela i gat bikpela mining bilong en?
▪ Buk Aposel i stori olsem Pita i bin stap “planti de liklik . . . long Jopa wantaim Saimon, em wanpela man bilong kisim skin bilong animal na redim bilong wokim ol arapela samting” na “haus bilong en i stap arere long solwara.” (Aposel 9:43; 10:6) Long tingting bilong ol Juda, wok bilong redim skin bilong animal em wok i no klin na i daunim tru man. Buk Talmut i tok, wok bilong redim skin bilong animal i nogut moa long wok bilong bungim pekpek bilong animal. Wok bilong Saimon i mekim na planti taim em i save holim bodi bilong ol animal i dai pinis, na dispela i mekim em i doti long ai bilong God. (Wok Pris 5:2; 11:39) Sampela narapela buk i stori long dispela samting olsem: Ating Saimon i yusim solwara bilong mekim dispela wok, na ples wok bilong em i stap longwe long taun, long wanem, “stingpela smel i save kamap long dispela wok.”
Maski i olsem, Pita i orait long stap wantaim Saimon. Dispela i soim olsem Pita i lain pinis long sakim pasin bilong ol Juda long tingting nogut long ol man em ol i ting ol i no klin, wankain olsem Jisas i bin sakim ol dispela pasin paslain long em.—Matyu 9:11; Luk 7:36-50.
Wanem mining bilong dispela tok bilong Jisas olsem “yu yet yu tok olsem”?
▪ Taim Kaiafas, em hetpris bilong ol Juda, i tokim Jisas long tokaut long ol man sapos em i Krais, Pikinini Bilong God, Jisas i tok: “Yu yet yu tok olsem.” (Matyu 26:63, 64) Wanem mining bilong dispela tok?
Jisas i no traim long abrusim askim bilong Kaiafas, nogat. Dispela tok “yu yet yu tok olsem” em i wanpela pasin bilong ol Juda long tok bokis bilong makim olsem wanpela tok em i tru. Olsem: Talmut Bilong Jerusalem, em wanpela buk lotu bilong ol Juda ol i bin raitim bihain long yia 300 C.E., i kamapim stori bilong wanpela man Juda em ol man i bin askim sapos wanpela tisa i dai pinis, em i bekim tok olsem: “Yu yet i tok olsem.” Taim ol man i harim dispela tok ol i save olsem tisa i dai pinis.
Jisas i save olsem hetpris i gat namba long tokim em olsem em i mas tok tru antap na kamapim em i husat tru. Na sapos Jisas i no bekim wanpela tok, ating hetpris bai ting olsem Jisas i no dispela Krais. Olsem na taim Jisas i tok: “Yu yet yu tok olsem,” em i kamapim klia olsem tok bilong hetpris i stret. Mak tu i raitim stori long dispela samting. Em i tok, taim Kaiafas i askim Jisas long tokaut long Em i husat, Jisas i bekim tok olsem: “Mi dispela man.”—Mak 14:62; lukim tu Matyu 26:25 na Mak 15:2.
[Piksa long pes 18]
Ples bilong redim skin bilong animal long Fez, Moroko