Go Klostu Long God
Tok Bilong Mekim Gut Bel Bilong Man
‘JEHOVA i no inap laikim mi.’ Em tok bilong wanpela meri Kristen i gat sik bilong bel hevi long klostu laip olgeta bilong em. Em i ting olsem Jehova i stap longwe tru long em. Olsem wanem? I tru Jehova i stap longwe long ol wokman bilong em husat i gat sik bilong bel hevi? Yumi inap painim bekim bilong dispela askim long tok bilong Devit long Song 34:18, NW.
Devit i save long samting em bikpela bel hevi inap mekim long wanpela gutpela wokman bilong Jehova. Taim Devit i yangpela em i stap olsem ranaweman. Sol, em king i jeles tru, em i wok long ranim Devit na i laik kilim em i dai. Devit i ranawe i go long wanpela ples we em i ting Sol i no inap go painim em—em long Get, taun bilong ol birua bilong em, long hap bilong ol Filistia. Tasol taim ol i luksave long Devit na ol i laik kilim em i dai, em i giaman long kamap longlong na em i ranawe. Devit i litimapim nem bilong God long kisim bek em, na em i tingim ol dispela samting i bin kamap na raitim Song 34.
Yu ting Devit i pilim olsem God i stap longwe long ol man em bikpela hevi i painim ol na ol i bel hevi o pilim olsem ol i no gutpela long ai bilong God? Devit i tok: “Jehova i save stap klostu long ol manmeri i gat hevi. Na em i save helpim ol manmeri bel bilong ol i bagarap.” (Ves 18) Orait nau yumi laik save long olsem wanem ol dispela tok i ken mekim gut bel bilong yumi na ol inap helpim yumi long wetim gutpela samting i kamap bihain.
“Jehova i save stap klostu.” Wanpela buk i tok dispela tok “i makim olsem Bikpela i save lukluk long lain bilong em, na oltaim em i redi long helpim na kisim bek ol.” Taim yumi save olsem Jehova i save was long lain bilong em, dispela i mekim gut bel bilong yumi. Em i lukim ol hevi ol i karim long dispela “taim nogut,” na em i save long tingting tru i stap long bel bilong ol.—2 Timoti 3:1; Aposel 17:27.
“Ol manmeri i gat hevi.” Long sampela kalsa dispela tok i makim olsem narapela i no laikim yu olsem yu laikim em. Tasol wanpela saveman i tok, dispela tok bilong man bilong raitim song i makim pasin bilong “bel hevi na krai sori.” Tru tumas, sampela gutpela wokboi bilong God i save kisim bikpela hevi tru na dispela i mekim bel bilong ol i bagarap.
“Ol manmeri bel bilong ol i bagarap.” Ol man i bel hevi ol inap pilim olsem ol i nogut tru na inap sampela haptaim ol inap ting olsem i no gat gutpela samting ol inap wetim. Wanpela buk bilong ol man bilong tanim ol tok bilong Baibel i tok ol inap tanim dispela tok olsem “ol manmeri i no gat wanpela gutpela samting ol inap wetim i kamap.”
Jehova i save mekim wanem long ol man “i gat hevi” na “bel bilong ol i bagarap”? Yu ting em i stap longwe long ol, na em i ting olsem ol i no gutpela tumas long em i laikim ol na tingim ol? Nogat tru! Olsem wanpela gutpela papa o mama husat i holimpas na mekim gut long pikinini taim em i bel hevi, Jehova i save stap klostu long ol wokman bilong em husat i askim em long helpim ol. Em i redi tru long helpim na mekim gut bel bilong ol manmeri i gat hevi na bel bilong ol i bagarap. Em inap givim savetingting na strong long ol bambai ol i ken karim ol hevi i painim ol.—2 Korin 4:7; Jems 1:5.
Olsem wanem? Yu laik kisim save long olsem wanem yu inap i go klostu moa long Jehova? Dispela God bilong pasin sori i tok promis olsem: “Mi stap . . . wantaim ol manmeri i save daunim ol yet na sori long ol sin bilong ol. Na mi save strongim bel bilong ol na mekim laip bilong ol i kamap gutpela gen.”—Aisaia 57:15.
Baibel ritim bilong Jun: