Jehova i Save Harim Singaut Bilong Man i Bel Hevi
SAVEMAN King Solomon bilong Israel bilong bipo i tok, “taim nogut i save painim yumi olgeta.” (Sav. 9:11) Taim nogut o bikpela hevi inap kamap na bagarapim tru sindaun bilong yumi. Olsem: Sapos wantu tasol wanpela wanblut i dai, dispela inap bagarapim tru bel bilong yumi. Insait long ol wik na mun bihain, dispela bel hevi inap kamap bikpela moa na daunim yumi. Tingting bilong yumi inap paul olgeta na yumi pilim olsem yumi no gutpela tumas inap long yumi beten long Jehova.
Long kain taim olsem, man i mas i gat wanpela i strongim bel bilong em, tingim em, na laikim em. Devit, em man bilong raitim song, i tok long Jehova olsem: “Em i save helpim olgeta manmeri i gat hevi na em i save litimapim olgeta manmeri ol arapela man i daunim ol.” (Sng. 145:14) Baibel i tok: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” (2 Sto. 16:9) Em i “stap tu wantaim ol manmeri i save daunim ol yet na . . . strongim bel bilong ol na mekim laip bilong ol i kamap gutpela gen.” (Ais. 57:15) Long wanem ol rot Jehova i save givim helpim na mekim gut bel bilong man i stap bel hevi?
“Gutpela Tok Long Taim Stret”
Wanpela rot we Jehova i save givim helpim long taim stret, em long rot bilong lain brata Kristen. Baibel i kirapim ol Kristen long “mekim gut bel bilong ol man i bel hevi.” (1 Te. 5:14, NW) Taim ol wanbilip i kamapim ol tok i soim olsem ol i tingim na laikim narapela, dispela inap strongim tru bel bilong man long taim em i stap bel hevi. Ol gutpela tok, maski em sotpela tok tasol, dispela inap mekim isi bel bilong em. Ol kain gutpela tok olsem inap kam long man husat i bin pilim wankain bel hevi olsem. O em inap kam long wanpela pren husat i bin karim wankain hevi. Long ol dispela rot, Jehova inap strongim bel bilong man.
Tingim wanpela elda Kristen, nem bilong em Alex, husat i marit nupela na wantu meri bilong em i dai, long wanem, em i gat wanpela sik i no gat rot long stretim. Wanpela wasman raun husat i pilim hevi bilong em, em i mekim sampela tok bilong mekim gut bel bilong Alex. Meri bilong dispela wasman tu i bin i dai, tasol wasman i marit gen. Em i stori long olsem wanem bel hevi bilong em i bin daunim em tru. Em i pilim gutpela taim em i stap wantaim ol narapela long wok autim tok na long ol miting. Tasol taim em i go bek long haus, em i pilim olsem em i stap wanpis tru. Alex i tok: “Bel bilong mi i stap gut taim mi save olsem ol narapela i bin pilim wankain olsem mi.” Tru tumas, taim man i “mekim gutpela tok long taim stret,” dispela i save helpim gut tru man i gat hevi.—Snd. 15:23, NW.
Narapela elda Kristen husat i save gut long sampela em poroman marit bilong ol i bin i dai, em i mekim sampela gutpela tok long strongim Alex. Long gutpela pasin sori, em i tok Jehova i save long yumi pilim olsem wanem na long samting yumi mas i gat bilong helpim yumi. Brata i tok: “Pasin bilong marit gen em wanpela gutpela rot bilong Jehova long helpim man long nau. Olsem na sapos long sampela mun o yia bihain man i pilim olsem em i mas i gat poroman marit, orait em i ken marit gen.” Tru, sampela em poroman marit bilong ol i bin i dai na ol i gat laik long marit gen, ol i no inap. Tasol Alex i tingim tok brata i bin mekim na i tok: “Taim man i tingim olsem pasin bilong marit gen em wanpela gutpela samting Jehova i bin putim, dispela inap helpim em long save, sapos em i marit gen, dispela i no makim olsem em i no stap gut long meri bilong em o long lo bilong Jehova long marit, nogat.”—1 Ko. 7:8, 9, 39.
Planti hevi i bin painim Devit, em man bilong raitim song, na em i tok: “Bikpela i save lukautim ol stretpela manmeri, na em i save harim beten bilong ol.” (Sng. 34:15) Tru tumas, Jehova i save harim beten bilong man i gat hevi na long taim stret Em inap helpim em long rot bilong ol gutpela tok ol strongpela wanbilip Kristen i givim long em. Dispela pasin Jehova i mekim em i gutpela samting tru!
Long Rot Bilong Ol Miting Kristen
Taim man i stap bel hevi, em inap kisim kain kain tingting kranki i kirapim em long stap longwe long ol narapela. Tasol Sindaun 18:1 i givim tok lukaut olsem: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” Alex i tok: Taim poroman marit i dai, man inap kisim kain kain tingting kranki.” Alex i bin askim em yet: “‘Mi bin mekim olgeta samting mi inap mekim bilong helpim meri bilong mi? Mi bin tingim em gut na pilim tru hevi bilong em?’ Mi no laik stap mi yet. Mi no laik stap singel. Em hatwok tru long rausim ol dispela kain tingting, long wanem, olgeta de i gat ol samting i kamap we i kirapim mi long tingim olsem mi stap wanpis.”
Bikpela samting moa yet long man i stap bel hevi, em i mas bung wantaim ol bratasista. Em i ken mekim olsem long rot bilong go long ol miting bilong kongrigesen. Long ol dispela miting, tingting bilong yumi i redi long kisim ol gutpela tok i kam long God bilong strongim yumi.
Ol miting Kristen i helpim yumi long kisim stretpela tingting long ol hevi bilong yumi. Taim yumi putim yau long ol tok bilong Baibel na tingim tingim long bel, yumi tingim tupela bikpela tok—Jehova i gat rait long i stap King, na nem bilong em i mas i stap holi—yumi no tingim hevi bilong yumi yet. Moa yet, taim yumi kisim skul long ol miting Kristen, yumi kisim strong, long wanem, yumi save olsem maski ol narapela i no save long hevi bilong yumi o ol i no save yumi pilim olsem wanem, Jehova i save. Em i save olsem “sapos bel bilong man i hevi, bai tingting bilong en i bagarap.” (Snd. 15:13) God i laik helpim yumi, na dispela i strongim yumi na i kirapim yumi long wok i go yet.—Sng. 27:14.
Taim ol birua i putim bikpela hevi long King Devit, em i singaut long God: “Tingting bilong mi i bagarap, na bel bilong mi i hevi moa yet.” (Sng. 143:4) Ol hevi inap pinisim strong bilong man, na bel i no inap pilim moa wanpela samting. Na tu, ol hevi inap mekim na wanpela sik i painim man o wanpela hap bilong bodi i bagarap. Yumi inap bilip tru olsem Jehova bai helpim yumi long karim dispela hevi. (Sng. 41:1-3) God i no save wokim mirakel na oraitim wanpela man long nau, tasol em i save givim gutpela tingting long man i karim pen na hevi na strongim em long karim dispela hevi bilong em. Tingim Devit, taim ol hevi i daunim em tru, em i save beten long Jehova. Em i tok: “Nau mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.”—Sng. 143:5.
Ol dispela tok God i kirapim ol man long raitim long Baibel, dispela i kamapim klia olsem Jehova i save gut long ol samting yumi pilim long bel. Ol kain tok olsem i makim olsem em i save putim yau taim yumi singaut long em. Sapos yumi larim Jehova i helpim yumi, ‘bai em i strongim yumi.’—Sng. 55:22.
“Beten Oltaim”
Jems 4:8 i tok: “Yupela i mas i go klostu tru long God, na em bai i kam klostu tru long yupela.” Wanpela rot bilong i go klostu long God em long rot bilong beten. Aposel Pol i tokim yumi long “beten oltaim.” (1 Te. 5:17) Maski sapos yumi hatwok long kamapim stret ol tingting i stap long bel, “Holi Spirit yet i save prea bilong helpim yumi.” (Ro. 8:26, 27) Tru tumas, Jehova i save gut long yumi save pilim olsem wanem.
Monika, husat i pas gut wantaim Jehova, em i tok: “Long rot bilong beten, ritim Baibel, na mekim Baibel stadi bilong mi yet, mi pilim olsem Jehova i kamap gutpela Pren bilong mi. Mi tingim em olsem wanpela man i stap tru na mi inap lukim ol samting em i mekim oltaim bilong helpim mi. Mi amamas long save olsem maski mi no inap kamapim klia samting mi pilim long bel, em i save gut long dispela. Mi save olsem ol gutpela pasin em i mekim long mi na ol blesing em i givim, i no gat pinis bilong en.”
Olsem na yumi mas larim ol gutpela tok bilong ol wanbilip Kristen i helpim yumi, na bihainim ol gutpela tok bilong ol miting Kristen bilong strongim bilip, na kamapim bel bilong yumi long Jehova long rot bilong beten. Dispela 3-pela samting em rot bilong Jehova long helpim yumi long taim stret na i soim olsem em i tingim yumi. Alex i tok: “Sapos yumi wok strong long kisim helpim long ol samting God Jehova i givim bilong helpim yumi long pas gut wantaim em, bai yumi gat ‘bikpela strong’ long karim olgeta kain hevi i painim yumi.”—2 Ko. 4:7.
[Blok/Piksa long pes 18]
Ol Tok Bilong Mekim Gut Bel Bilong Man i Gat Hevi
Buk Song i pulap long ol tok i stori long ol samting man i pilim long bel na tingting, na ol tok i soim olsem Jehova i save harim singaut bilong man em bel hevi i daunim em tru. Tingim ol dispela tok:
“Mi bel hevi nogut na mi singaut strong long Bikpela. Mi singaut long God bilong mi bai em i helpim mi. Em i stap long haus bilong en na em i harim singaut bilong mi. Na em i putim yau long beten bilong mi.”—Sng. 18:6.
“God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”—Sng. 34:18.
“Em i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.”—Sng. 147:3.
[Piksa long pes 17]
“Gutpela tok long taim stret” inap mekim gut bel bilong man i gat hevi!