Pas i Kam Long Madagaska
Em i Krai Olsem Gutpela Musik
MI WANTAIM man bilong mi i go long wanpela nupela ples wok olsem misineri—em ailan Madagaska. Mipela i tok gutbai long ol famili na pren na daunim aiwara na pret bilong mipela, na mipela i bilip strong olsem Jehova bai givim wanpela ples wok long mipela we mipela i ken mekim gut wok.
Mipela i no inap lusim tingting long namba wan miting mipela i bin go long en long nupela kongrigesen. Brata i lukautim Stadi Wastaua i olsem wanpela kondakta i go pas long wanpela grup i mekim musik. Long dispela taim mipela i no kliagut long tokples, olsem na taim mipela i harim tok i kamap, dispela i krai olsem wanpela gutpela musik. Em bai longpela haptaim liklik na mipela inap kisimgut ol tok i kamap.
Long namba wan taim mi klia long wanpela askim em ol i no raitim long paragraf, mi popaia na kolim strong bekim. Ol lain i sindaun klostu long mi i harim, na mi mas pasim maus long han bilong mi na mi lap. Mi sem, tasol mi amamas, long wanem, mi bin kliagut long tok brata i kolim!
Mi pilim olsem mi yet i mas i stap gutpela piksa long ol narapela long mekim wok autim tok, tasol long dispela taim ol bratasista i mas helpim mi. Long gutpela pasin ol i helpim mi long mekim sotpela tok long taim bilong autim tok, na ol i soim mi long ol tok mi ken mekim na skripsa mi ken yusim.
Mi tingim wanpela taim mi go autim tok na wanpela liklik mangi i singaut olsem: “Vazaha! Vazaha!” Dispela tok i makim “man bilong narapela kantri” long tokples Malagasi. Mipela i kirap wokabaut hariap, nogut ol narapela pikinini tu i harim na kolim wankain tok. Orait nau wanpela mangi i krosim dispela liklik mangi i wok long singaut. Em i tok: “Dispela meri i no bilong narapela kantri, em i ken mekim tokples bilong yumi!” Sista i wokabaut wantaim mi i mas tanim tok ol mangi i mekim, long wanem, ol i toktok hariap tumas na mi no kliagut long tok bilong ol. Tasol maski i olsem, mi amamas. Mi pilim olsem Madagaska i wok long kamap ples tru bilong mi.
Planti taim mi pilim olsem mi stap wanpis, tasol mi save amamas taim ol pikinini i kam na holim han bilong mi na ol i smail na amamas long lukim mi, maski mi no inap toktok gut wantaim ol narapela. Ol pikinini insait long kongrigesen i stap olsem gutpela blesing i kam long Jehova. Wanpela yangpela sista, em Hasina, i kamap meri bilong tanim tok bilong mi. Taim ol narapela i no kliagut long tok bilong mi, em i kliagut long en. Na planti taim em i helpim mi taim mi laik toktok wantaim ol pren bilong mi insait long kongrigesen, na em i kamapim insait bilong ol tok bilong mi.
Mi na man bilong mi i stap long wanpela kongrigesen ol i laik brukim i go long tupela kongrigesen. Dispela i makim olsem ol bratasista i mas askim ol narapela long stadi wantaim sampela Baibel sumatin em ol i stap long hap bilong nupela kongrigesen. Wanpela sista i strongim bel bilong mi long lukautim wanpela Baibel sumatin bilong em. Mi pret na mi tokim em olsem mi no redi yet, tasol em i strong long mi mas mekim. Em i tokim mi olsem Jehova bai helpim mi long mekim. Long gutpela pasin em i tokim mi olsem klostu nau bai mi inap skulim ol narapela long Baibel long rot mi laik mekim. Dispela tok i strongim tru bel bilong mi.
Kirap long dispela taim na i kam, dispela sumatin i wok long kamap strong. Wanpela taim mi stap ausait, mi harim sumatin i kolim nem bilong mi. Em na man bilong em i wokabaut i go bilong sainim pepa bilong gavman long rejistaim marit bilong ol. Man bilong em tu i kirap stadi na tupela wantaim i putim sampela mak ol i laik winim, na wanpela em bilong kisim baptais. Dispela i givim bikpela amamas long mi, maski mi save olsem Jehova i save kirapim ol man long kam klostu long em na i no long strong bilong mipela.
Mipela i kisim skul long planti samting long dispela nupela ples wok. Maski mipela i misim ol pren na famili bilong mipela long ples, mipela i pilim olsem mipela i kisim ol i kam wantaim mipela. Mipela i save stori long famili bilong mipela long ol brata na sista long hia, na nau ol dispela nupela pren i save askim tu long famili bilong mipela. Mipela i wetim dispela taim we famili tru bilong mipela na famili long Madagaska i ken bung wantaim.
Taim ol manmeri i toktok, dispela i olsem “musik” yet long yau bilong mi. Tasol nau mi kliagut long ol tok. Mi wetim dispela taim we mi tu inap toktok gut long dispela tokples na em bai olsem musik i krai gut. Jisas i tok: “No ken tingting planti long ol samting bilong de antap, long wanem, de antap bai i gat ol wari bilong en.” (Matyu 6:34) Olsem na nau mipela i wok long lain yet long dispela “musik,” olsem mipela i putim gut yau, bel, na tingting long ol tok bambai mipela i ken wok gut wantaim ol gutpela brata na sista bilong mipela hia long Madagaska.
[Piksa long pes 25]
Mi autim tok wantaim Hasina