As na Ol i Laikim Tru Dorkas

YUMI olgeta i laik ol manmeri i mas laikim tru yumi. Yu tu i save pilim olsem?​—a Baibel i stori long Dorkas, wanpela meri em planti manmeri i laikim em tru.

Dorkas i sindaun long Jopa, wanpela taun klostu long solwara Mediterenian. Jerusalem i stap olsem 56 kilomita longwe long Jopa. Dorkas em wanpela bilong ol disaipel bilong Jisas.

Yu ting bilong wanem ol manmeri i laikim tru Dorkas?​— Baibel i tok em i mekim planti gutpela pasin na givim ol gutpela presen long ol narapela. Em i bin wokim ol naispela klos bilong ol wido, olsem ol meri em man bilong ol i dai pinis. Na tu, em i bin toktok wantaim planti manmeri long God tru, em Jehova, wankain olsem Jisas i bin mekim.

Yu save long wanem samting nogut i painim Dorkas?​— Em i kisim bikpela sik na em i dai. Olgeta pren bilong em i bel hevi tru. Olsem na ol i salim sampela man i go long hap we aposel Pita i stap long en, em inap 16 kilomita longwe. Ol dispela man i askim Pita long kam hariap. Taim Pita i kamap, em i go antap long rum we Dorkas i stap long en. Olgeta meri i krai na ol i soim em ol klos em Dorkas i bin wokim bilong ol.

Orait, Pita i tokim olgeta long lusim rum. Bipo Pita wantaim ol narapela aposel i bin wokim sampela mirakel, tasol i no gat wanpela taim ol i bin kirapim bek wanpela daiman. Yu ting nau Pita i mekim wanem samting?​—

Pita i brukim skru klostu long bodi bilong meri i dai pinis na em i beten long Jehova. Orait nau em i tokim Dorkas long kirap. Na Dorkas i kirap! Pita i givim han long em na helpim em long kirap. Nau em i singautim olgeta wido na ol narapela na em i soim Dorkas long ol. Yu inap tingim bikpela amamas bilong ol?​—

Orait nau yumi ken tingim wanem skul yu ken kisim long dispela stori long kirap bek bilong Dorkas. Wanpela samting long dispela stori em olsem: Sapos yu helpim ol narapela, orait planti bilong ol bai laikim yu. Tasol bikpela samting moa, God bai tingim yu na laikim yu tru. Em i no inap lusim tingting long ol gutpela pasin yu mekim long ol narapela manmeri. Na em bai givim yu laip oltaim, na bai yu stap amamas tru long nupela taim we i gat stretpela pasin tasol long en.