Wanpela i Bin Giamanim Yu?
TAIM wanpela yu trastim i giamanim yu, dispela bai bagarapim tru bel bilong yu. Ating yu belhat na yu pilim olsem em i daunim yu na i givim baksait long yu. Tok giaman i save bagarapim pasin pren na marit, na i pulim ol man long lusim bikpela mani.
Tingim: Yu bai pilim olsem wanem sapos yu painimaut olsem wanpela i bin giamanim yu long ol tok i tru bilong God? Sapos yu save tingim tru lotu, dispela bai bagarapim bel bilong yu, olsem dispela tupela manmeri i bin pilim:
● “Mi pilim olsem lotu i bin giamanim mi.”—DEANNE.
● “Mi belhat stret. Mi pilim olsem ol i bin trikim mi—ol samting mi bin wetim na ol mak mi putim bilong winim, ol i lus nating tasol.”—LUIS.
Ating yu no laik kisim tingting olsem wanpela i bin giamanim yu long God. Ating ol samting yu bilip long en i kam long wanpela man yu save trastim na em i no inap tru long giamanim yu—olsem papamama, pris, pasto, o wanpela gutpela pren. Ating yu bin bilipim wanpela tok bilong lotu long laip olgeta bilong yu. Maski planti man i bilip long wanpela tok, dispela i no makim olsem dispela tok em i tru, nogat. Wanpela presiden bilong Amerika em Franklin D. Roosevelt i tok: “Sapos yu kolim wanpela tok giaman planti taim, dispela i no inap mekim tok giaman i kamap tok tru.”
Olsem wanem yu ken save sapos wanpela i bin giamanim yu o nogat? Jisas i beten long God na i tok: “Tok bilong yu em i tok i tru.” (Jon 17:17) Baibel i kamapim ol tok bilong helpim yumi long save long wanem tok i tru na wanem tok i giaman.
I gutpela yu larim Baibel i helpim yu long save long 5-pela tok giaman ol man i mekim long God. Yu bai luksave olsem tok i tru inap senisim laip bilong yu na mekim i kamap gutpela moa.