Kisim Skul Long Tok Bilong God

Dispela atikol i kamapim sampela askim ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long dispela bekim.

1. Bilong wanem em i bikpela samting long man na meri i mas marit gut?

Jehova em i God bilong amamas na em i as bilong marit. Taim man na meri i marit gut, dispela inap helpim famili long stap amamas na bai tupela i stap olsem gutpela pren, na tu, ol inap lukautim gut pikinini. God i gat wanem tingting long marit? Em i laik bai marit i mas stap strong oltaim na i stret long ai bilong gavman. (Luk 2:​1-5) God i laik bai maritman na maritmeri i mas stap gut long poroman marit bilong ol. (Hibru 13:⁠4) Jehova i orait tasol long ol Kristen i ken katim marit na marit gen sapos poroman marit bilong ol i mekim pasin adaltri.​—⁠Ritim Matyu 19:​3-6, 9.

2. Man na meri marit i mas mekim wanem pasin long narapela narapela?

Jehova i bin wokim ol man na ol meri bambai tupela i ken poroman wantaim long inapim ol wok insait long marit. (Stat 2:18) Man marit em i het bilong famili, olsem na em i gat wok long go pas long lukautim famili long ol samting bilong skin na long skulim ol long God. Em i mas daunim laik bilong em yet na laikim tru meri bilong em. Maritman na maritmeri i mas laikim na rispektim poroman marit bilong em. Olgeta man na meri i gat sin, olsem na pasin bilong fogivim narapela em i bikpela samting bilong helpim marit long i stap amamas.​—⁠Ritim Efesus 4:​31, 32; 5:​22-25, 33; 1 Pita 3:⁠7.

3. Yu ting i stret long lusim poroman marit taim hevi i kamap?

Sapos yu na poroman marit bilong yu i gat hevi, orait mekim pasin laikim long narapela narapela. (1 Korin 13:​4, 5) Baibel i no orait long man na meri marit i seperet bilong stretim hevi i kamap insait long marit. Taim bikpela hevi tru i kamap, orait Kristen yet i ken skelim olsem em na poroman bai seperet o nogat.​—⁠Ritim 1 Korin 7:​10-13.

4. Ol pikinini, God i laik bai yu stap olsem wanem?

Jehova i laik bai yu stap amamas. Em i givim yu ol gutpela tok long olsem wanem yu ken i stap amamas taim yu yangpela. Em i laik bai yu kisim helpim long ol gutpela tok na kisim skul long ol samting i painim papamama bilong yu. (Kolosi 3:20) Jehova i amamas long olgeta samting yu mekim bilong litimapim nem bilong em.​—⁠Ritim Saveman 11:9–12:1; Matyu 19:​13-15; 21:​15, 16.

5. Ol papamama, olsem wanem ol pikinini bilong yupela i ken stap amamas?

Yupela i mas wok strong long lukautim ol pikinini bilong yupela long kaikai, haus, na klos samting. (1 Timoti 5:⁠8) Tasol bilong ol pikinini bilong yupela i ken stap amamas, yupela i mas skulim ol tu long laikim God na kisim skul long em. (Efesus 6:⁠4) Yupela i mas stap gutpela piksa long pasin bilong laikim tru God, na dispela bai stiaim tru bel bilong pikinini bilong yupela. Taim yupela i yusim Tok Bilong God long skulim ol pikinini, dispela bai helpim tru ol.​—⁠Ritim Lo 6:​4-7; Sindaun 22:⁠6.

Taim yu mekim gutpela tok bilong strongim ol pikinini na tok amamas long ol samting ol i mekim, dispela i save helpim ol tru. Na tu, ol i mas kisim ol tok bilong stretim ol. Kain skul olsem i banisim ol long ol pasin we inap nogutim ol na ol i no stap amamas. (Sindaun 22:15) Tasol taim yu stretim ol, no ken mekim strongpela tok o ol tok i bagarapim bel bilong ol.​—⁠Ritim Kolosi 3:⁠21.

Ol Witnes Bilong Jehova i wokim sampela buk em ol i stret bilong helpim ol papamama na ol pikinini. Tok bilong ol dispela buk i kam long Baibel.​—⁠Ritim Song 19:​7, 11.

Bilong kisim sampela save moa, lukim sapta 14 bilong dispela buk em ol Witnes Bilong Jehova i wokim. Tru Tru Baibel i Tok Wanem?