Abraham​—Man i Gat Bilip

Long wanpela nait, olgeta samting i stap isi tru, na Abraham i stap ausait. Taim em i lukluk i go antap long skai na lukim ol sta, em i tingim promis bilong God olsem lain tumbuna pikinini bilong em bai kamap planti tru olsem ol dispela sta. (Stat 15:5) Ol sta i kirapim Abraham long tingim promis bilong Jehova. Na tu, ol sta i kirapim em long bilip tru olsem promis bilong God bai kamap tru. Jehova i gat bikpela strong na em i bin wokim yunives na bikpela lain sta bilong en, olsem na i no gat wanpela samting inap pasim em long helpim Abraham na Sara long kamapim pikinini. Dispela em bilip bilong Abraham.

BILIP EM WANEM SAMTING? Long Baibel, “bilip” i makim olsem maski man i no lukim wanpela samting long ai tru bilong em, planti samting i mekim na em i gat strongpela tingting olsem dispela samting i stap tru na em bai kamap tru. Man i bilip long God, em i save putim tingting olgeta long truim bilong ol promis bilong Jehova; long tingting bilong em i olsem ol promis i kamap tru pinis.

OLSEM WANEM ABRAHAM I SOIM OLSEM EM I GAT BILIP? Abraham i kamapim klia olsem em i bilipim ol promis bilong God. Abraham i gat strongpela bilip, olsem na em i lusim asples bilong em, em i bilip tru olsem Jehova bai truim promis bilong Em long givim em narapela graun. Abraham i gat strongpela bilip, olsem na em i raun olsem tripman long Kenan, na em i bilip tru olsem lain tumbuna pikinini bilong em bai kisim graun bilong Kenan. Abraham i gat strongpela bilip, olsem na em i bihainim tok na redi long givim Aisak olsem ofa, em i bilip tru olsem Jehova inap kirapim bek Aisak.—Hibru 11:8, 9, 17-19.

Abraham i putim tingting olgeta long ol samting bai kamap bihain, na i no long ol samting bilong bipo. Sindaun bilong Abraham na Sara long Ur i gutpela moa winim sindaun bilong ol long Kenan, na “sapos ol i bin tingting yet long ples ol i bin lusim, orait rot inap op long ol i go bek,” tasol ol i no mekim olsem, nogat. (Hibru 11:15) Ol i putim tingting olgeta i go long ol blesing em God bai givim long ol na long ol lain tumbuna pikinini bilong ol.—Hibru 11:16.

Yu ting gutpela samting i kamap long bilip bilong Abraham? Yes, gutpela samting i bin kamap. Jehova i truim olgeta wan wan promis bilong em. Lain tumbuna pikinini bilong Abraham i kamap planti tru na ol i kamapim kantri Israel. Bihain, lain Israel i go sindaun long Kenan, em dispela graun we Jehova i bin promis long givim long Abraham.—Josua 11:23.

YUMI KISIM WANEM SKUL LONG DISPELA? Yumi ken bilip tru olsem Jehova bai truim ol promis bilong em. Ating long tingting bilong yumi ol man, yumi inap pilim olsem sampela promis i no inap kamap tru, tasol yumi mas bilip tru olsem “God inap mekim olgeta samting.”—Matyu 19:26.

Pasin bilong Abraham i skulim yumi long putim tingting olgeta i go long ol gutpela samting yumi bai amamas long en long bihain, na i no long ol samting bilong bipo. Wanpela man, Jason, em i bin lain long mekim olsem. Jason i kisim sik we i mekim em i kamap paralais olgeta. Jason i tok: “Mi mas tokaut stret olsem sampela taim mi save tingim ol samting mi bin mekim long bipo.” Na em i tok moa: “Mi misim tru ol liklik samting mi save mekim, olsem mi no inap moa long hagim meri bilong mi, Amanda.”

Maski i olsem, Jason i bilip tru olsem Jehova bai truim ol promis bilong em, na mekim graun bilong yumi i kamap Paradais na ol gutpela manmeri bai kisim laip oltaim na helt bilong ol bai gutpela olgeta.a (Song 37:10, 11, 29; Aisaia 35:5, 6; Revelesen 21:3, 4) Jason i tok: “Mi save tokim mi yet olsem yumi wet yet long gutpela taim tru bai kamap. Klostu nau, olgeta bel hevi, bel pen, na wari bai pinis olgeta.” Yumi ken tok, Jason i gat strongpela bilip olsem Abraham!

[Futnot]