I Gat Wanpela Lotu Yu Inap Trastim?

Sapos wanpela lotu i mekim yu bel hevi, ating bai yu hatwok long trastim olgeta kain lotu. Tasol yu ken save olsem i gat wanpela lotu i stap em yu ken trastim. Taim Jisas i stap long graun em i bungim wanpela lain na skulim ol long bihainim ol lo bilong God. Long taim bilong yumi, i gat ol gutpela disaipel bilong Krais em ol i wok strong long bihainim stret ol lo Kristen long laip bilong ol. Yu inap painim ol we?

Estelle, em mipela i stori pinis long em, i tok: “Mi wok long kisim save long Baibel taim mi kirap stadi wantaim ol Witnes Bilong Jehova. I no longtaim mi kliagut long tok bilong Jon 8:32, em i tok: ‘Yupela bai save long tok i tru, na tok i tru bai mekim yupela i kamap fri.’”

Ray, em mipela i stori pinis long em, i tok: “Taim mi stadi long Baibel wantaim ol Witnes Bilong Jehova, mi kisim save olsem God i no as bilong ol pen na hevi ol man i karim. Mi amamas long kisim save olsem i gat as na God i larim pen na hevi i stap, em i promis olsem klostu nau em bai pinisim olgeta pen na hevi.”

I hatwok long bihainim stretpela pasin taim planti manmeri i no bihainim ol lo bilong stretpela pasin. Tasol yu inap bihainim stretpela pasin. Planti man i laik kisim helpim bilong kliagut long ol tok bilong Baibel na bihainim. Em as na ol Witnes Bilong Jehova i save mekim fri Baibel stadi wantaim planti milion manmeri long olgeta hap bilong graun. Long olgeta wan wan wik planti manmeri i kisim save long ol tok i tru bilong Baibel. Olsem na ol i wok long pas gut wantaim God na mekim ol samting bilong i stap amamas.a

Long narapela taim yu bungim ol Witnes Bilong Jehova, i gutpela yu askim ol long as na ol i trastim lotu bilong ol. Skelim tok ol i skulim man long en na ol samting lotu bilong ol i save mekim. Orait nau yu ken makim sapos i gat wanpela lotu i stap em yu ken trastim.