Yu Inap Trastim Lotu Long Sait Bilong Stretpela Pasin?

Sylvia i save mekim wok bisnis bilong helt, i tok: “Mi go long kolis wantaim planti manmeri em ol i tok ol i lotu lain, tasol ol i save lukstil long ol tes na kisim drak. Lotu i no helpim ol long bihainim stretpela pasin.”

Wanpela man nem bilong em Lionel, i tok: “Ol wanwok bilong mi i save giaman olsem ol i sik na i no kam long wok. Ol i gat lotu, tasol ol i no mekim wok long en, i olsem lotu i samting bilong bilas tasol.”

Lotu i no strong long stiaim ol man long bihainim stretpela pasin long laip bilong ol. Planti man long nau “i luk olsem ol i gat pasin bilong givim bel tru long God,” tasol “ol i no larim strong bilong dispela pasin i bosim wokabaut bilong ol.” (2 Timoti 3:5) Ol hetman bilong lotu i no stap gutpela piksa, na tu, ol i no givim ol tok bilong Baibel long helpim ol sipsip bilong ol long bihainim stretpela pasin. Em as na planti man i ting olsem God i no wari long pasin ol i mekim.

BAIBEL I TOK WANEM?

Baibel i tok God i save pilim samting long bel na pasin bilong yumi inap mekim em i amamas o bel hevi. Taim lain Israel bilong bipo i bin bikhet na sakim tok bilong God, “ol i mekim em i bel hevi.” (Song 78:40) Tasol bikpela “amamas i kamap long heven” taim wanpela man i tanim bel na senisim ol pasin nogut bilong em. (Luk 15:7) Taim man i pilim ol gutpela pasin bilong Papa bilong yumi long heven, em bai laikim God moa yet na dispela bai kirapim em long laikim ol samting God i laikim na heitim ol samting God i heitim.—Amos 5:15.

OLSEM WANEM LONG OL WITNES BILONG JEHOVA?

Nius The Deseret News bilong Salt Lake City, Utah, Amerika, i tok olsem ol Witnes Bilong Jehova i “wok long strongim ol famili long pas gut wantaim na ol i save helpim ol man long kamap ol gutpela man na mekim pasin i tru.” Nius i tok moa: “Lain bilong ol i save olsem em i bikpela samting long bihainim ol stretpela lo. Ol i save olsem smok, spak, kisim drak, pilai laki, pamuk na man i slip wantaim man, ol dispela pasin i save bagarapim pasin bilong man long pas gut wantaim God.”

Ol Witnes i kisim save long pasin bilong God na dispela i helpim ol olsem wanem? Sylvia, em mipela i stori pinis long em, i tok: “Pasin giaman i pulap long ol wok bisnis bilong helt. Em i isi long bihainim wankain pasin. Tasol mi kliagut long tingting bilong Jehovaa long ol kain pasin olsem, na dispela i helpim mi long bihainim stretpela pasin. Mi stap amamas na bel isi.” Sylvia i save tru olsem taim em i bihainim bilip bilong em, dispela i mekim sindaun bilong em i kamap gutpela.