Yu Holim Wankain Tingting Olsem Jehova Long Ol Man i No Gat Strong?

1, 2. Hau na Pol inap pilim hevi bilong ol man em ol i no gat strong?

SAMPELA taim yumi olgeta i save pilim olsem yumi no gat strong. Ating sik kus o sampela kain kaikai o smel bilong plaua i mekim na yumi pilim sik na yumi no gat strong long mekim ol wok bilong olgeta wan wan de. Ating olgeta strong bilong yu i pinis, na i no 1-pela o 2-pela wik tasol, nogat, yu pilim olsem inap planti mun. Sapos kain samting olsem i kamap long yu, ating yu bai amamas sapos ol arapela i soim olsem ol i pilim hevi bilong yu, a?

² Aposel Pol i bin pilim olsem ol hevi insait long kongrigesen na ausait long kongrigesen i putim presa long em. Planti taim em i pilim olsem em i no gat strong moa long karim ol hevi. (2 Kor. 1:8; 7:5) Pol i tingim bek ol hevi na ol samting i bin kamap long laip bilong em olsem wanpela Kristen, na em i tok: “Sapos wanpela i no gat strong, mi tu mi pilim olsem mi no gat strong.” (2 Kor. 11:29) Pol i tok olgeta wan wan insait long kongrigesen Kristen i olsem ol hap bilong wanpela bodi, olsem na ol manmeri “em yumi ting olsem ol i no gat strong, ol i gat wok ol i mas mekim.” (1 Kor. 12:22) Wanem insait bilong dispela tok? Wai na yumi mas holim wankain tingting olsem Jehova long ol man husat i pilim olsem ol i no gat strong? Hau bai dispela i helpim yumi?

TINGTING BILONG JEHOVA LONG OL MAN I NO GAT STRONG

3. Wanem samting inap stiaim tingting yumi holim long ol arapela long kongrigesen husat i nidim helpim?

³ Yumi stap long taim we planti man i resis long bungim mani kago na ol i givim biknem long ol lain i gat strong na ol yangpela. Planti man i save mekim olgeta samting ol inap mekim bilong inapim laik bilong ol, na ol i save luk daun long filings bilong ol man i no gat strong. Yumi no orait long kain pasin olsem, tasol sapos yumi no was gut, yumi inap kisim tingting kranki long ol arapela husat i nidim helpim long olgeta taim, na dispela i makim tu sampela long kongrigesen. Tasol yumi inap kisim stretpela tingting, wankain olsem God.

4, 5. (a) Olsem wanem tok piksa long 1 Korin 12:21-23 i helpim yumi long holim wankain tingting olsem Jehova long ol man i no gat strong? (b) Taim yumi helpim ol man i no gat strong, hau bai dispela i helpim yumi?

⁴ Tok piksa i stap long namba 1 pas Pol i bin raitim long ol Kristen long Korin inap helpim yumi long kisim save long tingting Jehova i holim long ol man i no gat strong. Long sapta 12, Pol i tok olsem maski wanpela hap bilong bodi i no luk nais o em i no gat strong, em tu i gat wok bilong en. (Ritim 1 Korin 12:12, 18, 21-23.) Sampela man husat i bilip long evolusen, ol i ting olsem yumi no nidim ol dispela hap bilong bodi. Tasol wok painimaut i soim olsem olgeta wan wan hap bilong bodi em yumi ting olsem ol i samting nating, ol i save mekim ol bikpela wok.a Olsem: Sampela i ting olsem liklik tou i no gat wok bilong en, tasol long nau ol saveman i luksave olsem liklik tou i save mekim wok bilong balensim bodi olgeta.

⁵ Tok piksa bilong Pol i kamapim olsem olgeta Kristen insait long kongrigesen i gat wok. Satan i save tekewe gutnem bilong ol man, tasol long tingting bilong Jehova, olgeta wokman bilong em, na ol man i no gat strong, ol i stap olsem lain husat “i gat wok ol i mas mekim.” (Jop 4:18, 19) Olsem na yumi olgeta wan wan i mas amamas long wok yumi mekim insait long kongrigesen, na amamas long yumi inap stap olsem lain bilong God long olgeta hap bilong graun. Tingim wanpela taim we yu bin putim han i go bilong helpim wanpela lapun husat i nidim helpim. Ating yu senisim spit bilong wokabaut bilong yu. Samting yu mekim i helpim tru dispela lapun, na yu kisim amamas long en, a? Yes, taim yumi helpim ol narapela long ol samting ol i nidim, yumi kisim amamas na yumi strongim moa yet pasin bilong yumi long i no les kwik, pasin laikim, na kamap strong long bilip. (Efe. 4:15, 16) God i save olsem sapos olgeta long kongrigesen i tingim tru olgeta wan wan, maski sapos sampela i gat hevi, ol i soim olsem ol i gat stretpela tingting na pasin laikim.

6. Wai na Pol i bin yusim ol dispela hap tok, “no gat strong,” na “ol man i gat strongpela bilip”?

⁶ Taim Pol i raitim pas long ol Kristen long Korin, em i yusim dispela hap tok, “no gat strong,” na dispela i makim tingting em i holim long em yet na tingting ol narapela man i holim long ol Kristen long taim bilong ol aposel. (1 Kor. 1:26, 27; 2:3) Taim Pol i stori long “ol man i gat strongpela bilip,” i no olsem em i laik mekim sampela Kristen i pilim olsem ol i winim ol arapela, nogat. (Rom 15:1) Tok bilong em i makim olsem ol Kristen i gat strongpela bilip, ol i mas soim pasin isi long ol man i no kamap strong yet long tok i tru.

YU TING YUMI GAT WOK LONG SENISIM TINGTING?

7. Wanem samting inap pasim yumi long helpim ol narapela em ol i nidim helpim?

⁷ Taim yumi helpim “ol rabisman,” yumi bihainim pasin bilong Jehova na em i orait long yumi. (Sng. 41:1; Efe. 5:1) Sapos yumi holim tingting kranki long ol man i nidim helpim, dispela inap pasim yumi long helpim ol. O, ating yumi no save long wanem kain tok yumi bai mekim, olsem na yumi sem na yumi stap longwe long ol man i karim hevi. Cynthia,b em wanpela sista em man bilong em i bin lusim em, em i tok: “Sapos ol bratasista i abrusim yu, o ol gutpela pren i no soim gutpela pasin olsem ol i save mekim, dispela inap bagarapim bel bilong yu. Taim hevi i painim yu, i gutpela long ol narapela i stap wantaim yu.” Devit i save long filings bilong ol man taim ol narapela i abrusim ol na i no tingim ol.—Sng. 31:12.

8. Wanem samting bai helpim yumi long pilim tru hevi bilong ol arapela?

⁸ Yumi bai pilim hevi bilong ol arapela sapos yumi tingim olsem sampela bratasista i no gat strong, long wanem, helt bilong ol i no gutpela, famili i no wanbel long lotu, na bel hevi i daunim ol. Kain hevi olsem inap painim yumi. Taim lain Israel i stap long Isip, ol i stap rabis na ol i no gat strong. Paslain long ol i go insait long Graun Bilong Promis, ol i kisim toksave olsem ol i “no ken givim baksait” long lain brata bilong ol husat i karim hevi. Jehova i laik bai ol i tingim olsem i stret long helpim ol man i stap rabis.—Lo 15:7, 11; Wkp. 25:35-38.

9. Taim ol hevi i painim ol narapela, orait yumi mas painim rot long helpim ol olsem wanem? Stori long tok piksa.

⁹ Taim hevi i painim ol narapela, yumi no ken skelim ol o saspek nating long ol, nogat, yumi mas yusim Tok Bilong God long mekim gut bel bilong ol. (Jop 33:6, 7; Mat. 7:1) Yumi ken tok piksa olsem: Taim man i ronim motobaik na em i kisim eksiden na i go kamap long imejensi wod, yu ting ol wokman bilong haus sik bai traim long skelim sapos em i bin kamapim dispela eksiden? Nogat. Ol bai hariap long helpim em. Olsem tasol, sapos ol hevi i mekim na wanpela wanbilip i no gat strong moa, orait yumi mas painim rot long helpim em long kamap strong gen long bilip.—Ritim 1 Tesalonaika 5:14.

10. Sampela bratasista husat i luk olsem ol i no gat strong, olsem wanem ol i “pulap tru long bilip”?

¹⁰ Sapos yumi lusim sampela haptaim long tingim sindaun bilong ol bratasista, dispela inap stretim tingting yumi holim long ol. Tingim ol sista em famili i birua long ol inap planti yia. Sampela bilong ol i save stap isi na i luk olsem ol i no gat strong, tasol ol i soim klia olsem ol i gat strongpela bilip na strongpela bel. Olsem wanem? Taim yu lukim mama wanpis i kam oltaim long miting wantaim ol pikinini, yu save pilim tru pasin bilong em long bilip na holim strongpela tingting? Olsem wanem long ol tineja em ol i holim strong tok i tru maski ol wanskul i bihainim kain kain pasin nogut? Yumi luksave olsem ol lain yumi ting olsem ol i no gat strong, ating ol i “pulap tru long bilip” wankain olsem ol arapela em sindaun bilong ol i gutpela.—Jems 2:5.

KISIM TINGTING BILONG JEHOVA

11, 12. (a) Wanem samting bai helpim yumi long senisim tingting yumi holim long ol man i no gat strong? (b) Yumi kisim wanem skul long pasin Jehova i mekim long Aron?

¹¹ Taim yumi skelim ol samting Jehova i mekim long sampela wokman bilong em, dispela bai helpim yumi long senisim tingting na holim wankain tingting olsem Jehova long ol man i no gat strong. (Ritim Song 130:3.) Olsem: Sapos yu bin stap wantaim Moses taim Aron i wokim imis bilong bulmakau gol, bai yu pilim olsem wanem long ol eskius bilong Aron? (Kis. 32:21-24) O, yu bai kisim wanem tingting long pasin bilong Aron taim susa bilong em, Miriam, i kirapim em long sutim tok long Moses long em i maritim meri bilong narapela ples? (Nam. 12:1, 2) Taim Jehova i wokim mirakel na givim wara long lain Israel long ples Meriba, bai yu mekim wanem taim Aron na Moses i no givim biknem long Jehova?​—Nam. 20:10-13.

¹² Taim wan wan bilong ol dispela samting i bin kamap, Jehova inap panisim Aron long dispela taim stret. Tasol Em i luksave olsem Aron i no man nogut, na i no olsem em tasol i gat asua. I luk olsem Aron i larim ol hevi na ol narapela long pulim em long lusim stretpela pasin. Tasol taim em i luksave long rong em i mekim, em i tokaut long ol dispela rong, na em i orait long kisim panismen i kam long Jehova. (Kis. 32:26; Nam. 12:11; 20:23-27) Jehova i tingim bilip bilong Aron na pasin bilong em long tanim bel. Inap planti yia bihain, ol manmeri i tingim Aron na ol tumbuna pikinini bilong em olsem ol man bilong pret long Jehova.​—Sng. 115:10-12; 135:19, 20.

13. Olsem wanem yumi ken skelim tingting yumi holim long ol man i no gat strong?

¹³ Sapos yumi laik senisim tingting na holim wankain tingting olsem Jehova, orait yumi mas skelim tingting yumi holim long ol man em ol i luk olsem ol i no gat strong. (1 Sml. 16:7) Olsem: Sapos wanpela tineja i no bihainim gutpela tingting long makim samting em i mekim bilong kisim amamas long en o taim em i soim olsem em i no tingim ol narapela, bai yumi mekim wanem? Yumi no ken sutim planti tok tumas long em, nogat. Mobeta yumi tingim ol samting yumi inap mekim bilong helpim em long kamap bikpela long tingting. Yumi ken go pas long helpim man i nidim helpim, na long dispela rot yumi bai kisim pasin bilong pilim gut tingting bilong ol narapela na strong moa long soim pasin laikim.

14, 15. (a) Wanem samting i mekim na Elaija i pret? (b) Jehova i pilim olsem wanem long Elaija na Em i mekim wanem bilong helpim Elaija? (c) Yumi inap kisim wanem skul long ekspiriens bilong Elaija?

¹⁴ Taim yumi skelim tingting bilong yumi wantaim pasin Jehova i bin mekim long ol wokman bilong em husat i bel hevi tru, dispela bai helpim yumi long kisim stretpela tingting long ol narapela. Wanpela em Elaija. Maski Elaija i no pret long salensim 450 profet bilong god Bal, taim em i harim olsem Kwin Jesebel i painim rot bilong kilim em, Elaija i ranawe. Em i wokabaut inap 150 kilomita i go kamap long Berseba, na em i wokabaut i go moa long ples drai nating. San i hot nogut tru taim em i wokabaut, olsem na em i pilim taiet olgeta na em i sindaun aninit long diwai na em i laik bai God i “larim [em] i dai.”​—1 Kin. 18:19; 19:1-4.

¹⁵ Jehova i pilim olsem wanem taim em i lukluk i kam daun na lukim gutpela profet bilong em i stap bel hevi tru? Yu ting God i sakim wokman bilong em, long wanem, em i pret na bel hevi? Nogat tru! Jehova i luksave long ol samting em Elaija i nidim na em i salim ensel i go bilong helpim em. Tupela taim ensel i strongim Elaija long kaikai. Dispela bai strongim em na bai em “inap wokabaut i go long longpela rot.” (Ritim 1 King 19:5-8.) Paslain long Jehova i tokim Elaija long ol samting em i mas mekim, Em i putim gut yau na mekim ol samting bilong strongim Elaija.

16, 17. Olsem wanem yumi inap bihainim pasin Jehova i bin mekim bilong lukautim Elaija?

¹⁶ Olsem wanem yumi inap bihainim pasin bilong God? Yumi no ken hariap long givim skultok. (Snd. 18:13) Sapos sindaun bilong sampela i mekim na ol i pilim olsem ol i “nogut liklik,” orait i gutpela sapos pastaim yumi tokim ol olsem yumi pilim hevi bilong ol. (1 Kor. 12:23) Dispela bai helpim yumi long save long samting yumi ken mekim bilong helpim ol.

¹⁷ Olsem: Tingim Cynthia, em yumi bin stori long em long kirap bilong dispela atikol—man bilong em i lusim em wantaim 2-pela pikinini meri. Ol i stap ol yet. Olsem wanem ol arapela Witnes i helpim ol? Em i tok: “Mipela i ringim ol na toksave long hevi i kamap, na insait long 45 minit ol i kam kamap long haus na ol i aiwara. Ol i stap wantaim mipela inap 2-pela o 3-pela de. Mipela i no kaikai gut na bel hevi i daunim tru mipela, olsem na inap longpela haptaim liklik ol i kisim mipela i go stap wantaim ol na lukautim mipela.” Dispela i kirapim yumi long tingim tok Jems i mekim, olsem: “Sapos wanpela Kristen brata o susa i stap skin nating na i sot long kaikai bilong dispela de, na wanpela bilong yupela i tokim em: ‘Yu ken i stap bel isi, hatim skin bilong yu na kisim gut kaikai,’ tasol yupela i no givim em ol samting em i mas kisim bilong i stap laip, orait olsem wanem dispela inap helpim em? Olsem tasol, sapos bilip i stap nating, na i no kamapim ol gutpela wok, orait dispela bilip i dai pinis.” (Jems 2:15-17) Ol bratasista i bin givim helpim long taim i stret na dispela i strongim Cynthia na ol pikinini meri bilong em, olsem na inap 6-pela mun bihain long hevi i painim ol, ol i kirap mekim wok painia haptaim.​—2 Kor. 12:10.

PLANTI MAN I KISIM HELPIM

18, 19. (a) Sapos ol man i no gat strong inap sotpela haptaim, olsem wanem yumi inap helpim ol? (b) Taim yumi helpim ol man i no gat strong, dispela pasin bai helpim husat?

¹⁸ Ating yu save olsem sapos yu gat wanpela sik we i mekim na yu no strong moa, sampela haptaim inap lus paslain long yu kamap orait gen. Olsem tasol, sapos ol hevi i daunim wanpela Kristen na em i no gat strong moa, sampela haptaim inap lus paslain long em i kamap strong gen long tok i tru. Em tru olsem dispela wanbilip yet i mas strongim bilip bilong em long rot bilong mekim stadi bilong em yet, beten, na ol narapela wok lotu. Olsem wanem? Bai yumi soim pasin isi long em i go inap long em i kamap strong gen? Taim em i wok long mekim ol samting bilong kamap strong, yumi bai wok yet long soim pasin laikim? Sapos ol man i no gat strong inap sotpela haptaim, bai yumi wok strong long helpim ol long pilim olsem yumi tingim ol na laikim ol?​—2 Kor. 8:8.

¹⁹ Yumi no ken tru lusim tingting olsem taim yumi helpim ol bratasista, yumi inap kisim amamas we i save kamap long pasin bilong givim. Yumi kisim tu pasin bilong soim olsem yumi pilim hevi bilong narapela na soim pasin isi. Na tu, olgeta wan wan long kongrigesen i kamap strong moa long pasin bilong tingim na laikim tru narapela narapela. Bikpela samting moa, yumi bihainim pasin bilong Jehova—em i save tingim olgeta wan wan man olsem ol i dia tumas long ai bilong em. Yes, i gat gutpela risen long yumi olgeta i mas bihainim tok na “helpim ol man i no gat strong.”​—Apo. 20:35.