YU TINGIM YET?

Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim:

Taim Kristen i dai, yu ting i stret long kukim bodi bilong em long paia?

Olgeta wan wan man i mas mekim dispela disisen. Baibel i no mekim wanpela tok stret bilong tambuim dispela pasin, tasol i gutpela long luksave olsem ol man i bin kisim bodi bilong King Sol na pikinini bilong em Jonatan na ol i kukim long paia na planim ol bun bilong ol. (1 Sml. 31:2, 8-13)—6/15, pes 7.6/15, page 7.

Olsem wanem yumi save tru olsem God i no save kamapim ol hevi?

God i save bihainim stretpela pasin long olgeta samting em i mekim. Oltaim em i save stap gut long lain bilong em, na bihainim stretpela pasin. Na tu, Jehova i save tingim gut lain bilong em na soim pasin marimari long ol. (Lo 32:4; Sng. 145:17; Jems 5:11)—7/1, page 4

Taim man i go long narapela kantri long helpim wok autim tok long ol hap i sot long ol pablisa, em inap bungim wanem ol hevi?

I gat 3-pela hevi: (1) lain long nupela sindaun, (2) pilim hom sik, na (3) lain long pas gut wantaim ol bratasista. Planti bratasista husat i bin bungim ol dispela hevi, ol i kisim planti blesing tru.—7/15, pages 4-5.

Wai na ol brata bilong Josep i birua long em?

Jekop i save laikim tumas Josep, olsem na em i givim wanpela naispela klos long Josep. Ol brata bilong Josep i jeles na ol i salim em na ol narapela lain i baim em olsem wokboi nating.8/1, pages 11-13

Yumi bin kisim ol nupela nius. Wai na ol dispela nius i gutpela tru na em isi long tilim long ol man?

Ol i bihainim wankain pasin taim ol i raitim ol dispela nius. Olgeta wan wan nius i opim rot long yumi inap ritim wanpela tok bilong Baibel na givim askim long man bilong haus. Maski man i givim wanem bekim, yumi ken opim nius long namel pes na soim em long tok Baibel i mekim. Yumi ken kamapim tu wanpela askim bilong opim rot long yumi inap mekim gobek long man.—8/15, pages 13-14.

Siria Peshitta em wanem samting?

Siria em wanpela tokples bilong lain Aram, na planti man i kirap long mekim dispela tokples bihain long yia 100 C.E. o 200 C.E. I luk olsem Siria em fes tokples ol i bin yusim long tanim sampela hap bilong Ol Skripsa Grik. Bihain, ol i kolim Baibel long tokples Siria olsem Baibel Peshitta.—9/1, pages 13-14.

Olsem wanem ol papamama Kristen inap lukautim gut ol pikinini?

Ol i mas putim gut yau na bai ol inap save gut long tingting bilong ol pikinini. Wok hat long mekim ol samting bilong strongim bilip bilong ol. Olsem: Sapos ol i holim 2-pela tingting long sait bilong bilip, orait bihainim pasin laikim na stiaim ol.—9/15, pages 18-21.

Taim Kingdom Bilong God i bosim graun, wanem ol hevi bai pinis olgeta?

Olgeta kain sik, hevi bilong indai, hevi bilong i no gat wok mani, woa, hevi bilong kaikai i sot, na pasin bilong i stap rabis bai pinis olgeta.—10/1, pages 6-7.

Wanem kontrak long Baibel i opim rot long ol narapela inap mekim wok king wantaim Krais?

Bihain long Jisas i mekim laspela kaikai wantaim ol aposel, em i mekim kontrak wantaim ol disaipel husat i stap gut long em, na dispela em kontrak bilong Kingdom. (Luk 22:28-30) Dispela kontrak i strongim bilip bilong ol olsem ol bai mekim wok king wantaim Jisas long heven.—10/15, pages 16-17.

Kolim 2-pela eksampel long Baibel i soim olsem Satan i stap tru.

Baibel i tok Satan i bin toktok wantaim Jisas bikos em i laik traim Jisas. Long taim bilong Jop, Satan i bin toktok wantaim God. Ol dispela stori i soim olsem Satan em i wanpela man i stap tru.—11/1, pages 4-5.

Olsem Jems i stori long en long Aposel 15:14, husat i stap olsem “wanpela lain em nem bilong [God] i ken stap long ol”?

Dispela lain i makim lain Juda na ol narapela em ol i no bilong lain Juda, na God i bin makim ol long i stap olsem lain husat bai “tokaut long olgeta hap long ol gutpela pasin” bilong Man husat i bin singautim ol. (1 Pita 2:9, 10)—11/15, pages 24-25.

Timgad i bin stap long wanem hap? Sampela manmeri long Timgad i bin holim wanem tingting?

Timgad em i wanpela bikpela taun bilong Rom long Not Afrika (nau em Aljiria). Ol saveman i painim wanpela hap ston i gat rait long en olsem: “Painim Abus, Waswas, Pilai, Lap—Dispela Em Laip!” Dispela i wankain long tingting i stap long 1 Korin 15:32.—12/1, pages 8-10.