Yu Tingim Yet?

Olsem wanem? Yu bin amamas long kaunim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Bilong truim tok bilong Aisaia 21:​8, God i putim wanem “wasman” long taim bilong yumi?

Ol Kristen God i bin makim, ol i mekim wok olsem lain wasman, na ol i tokim ol manmeri long ol samting i kamap long graun na olsem wanem ol dispela samting i truim ol tok profet. Na tu, ol i bin helpim ol sumatin bilong Baibel long lusim planti bilip i no stap long Baibel.​​—⁠1/1, pes 8, 9.

• Bilong wanem na yu mas bilip long ol tok profet bilong Baibel na yu no ken bilip long ol man bilong skelim ol samting ol i ting bai kamap bihain o ol man i save lukluk long ol sta samting?

Ol man i laik kamap olsem profet, ol tok ol i mekim i no save kamap tru, long wanem, ol i sakim Jehova na Baibel. Ol tok profet bilong Baibel tasol inap helpim yu long save tru long olsem wanem ol samting i wok long kamap ol i insait long ol samting God i laik mekim, na dispela i ken helpim yu wantaim famili bilong yu inap oltaim.​​—⁠1/15, pes 3.

• Wanem sampela samting i kamapim olsem yumi stap long taim bilong las de?

Yumi lukim ol samting i kamap, kirap long taim ol i bin rausim Satan long heven. (KTH 12:⁠9) Nau yumi stap long taim bilong laspela “king” em Kamapim Tok Hait 17:​9-11 i tok profet long en. Ol Kristen em God i bin makim ol tru long spirit holi, namba bilong ol i wok long i go daun, tasol i luk olsem sampela bai stap yet long graun taim bikpela hevi tru i kirap.​​—⁠1/15, pes 12, 13.

• Long wanem taim ol i bin raitim Buk Habakuk, na bilong wanem yumi mas i gat laik long save long en?

Ol i raitim dispela buk long 628 B.C.E samting. Em i gat tok bilong strafe bilong Jehova bai painim lain Juda bilong bipo na Babilon. Na tu, em i toktok long bagarap em liklik taim God bai kamapim bilong pinisim pasin nogut bilong dispela graun.​​—⁠2/1, pes 8.

• Long wanem hap bilong Baibel yumi inap lukim gutpela tok bilong wanpela mama em i toktok long pasin bilong gutpela meri marit?

Laspela sapta bilong Buk Sindaun, em sapta 31, em i gat kain gutpela tok olsem.​​—⁠2/1, pes 30, 31.

• Bilong wanem yumi ken amamas olsem Jehova i bin kamapim “tingting bilong Krais” long yumi? (1 Korin 2:⁠16)

Long rot bilong ol tok i stap long Gutnius, Jehova i bin opim rot na yumi inap lain long tingting bilong Jisas, long ol samting em i pilim tru long bel, long ol wok em i mekim, na long ol samting em i putim i go pas long ol narapela samting. Dispela bai helpim yumi long bihainim tru pasin bilong Jisas, olsem long taim yumi strong long autim tok, em dispela wok bai i helpim ol man long kisim laip.​​—⁠2/15, pes 25.

• Olsem wanem? God i save harim ol beten bilong yumi long nau?

Yes, em i save harim. Tru, Baibel i kamapim olsem God i no save harim olgeta beten, tasol ol samting i bin kamap long nau i kamapim olsem planti taim God i bin harim beten bilong ol man em ol i singaut long em i ken mekim gut bel bilong ol na bilong kisim helpim long ol samting, olsem bilong stretim hevi bilong marit.​​—⁠3/1, pes 3-7.

• Yumi ken mekim wanem bilong kisim strong bilong God?

Yumi ken beten askim God long givim dispela strong long yumi, na long rot bilong Baibel yumi ken kisim strong, na yumi ken kisim strong long rot bilong bung wantaim ol Kristen.​​—⁠3/1, pes 15, 16.

• Olsem wanem ol papamama inap helpim ol pikinini bilong ol na bai ol miting i ken helpim ol tru?

Ol i ken helpim ol pikinini bambai ol i no ken slip long miting. Ating ol i ken tokim ol pikinini long slip liklik paslain long miting. Ol i ken kirapim ol pikinini long “raitim sampela sotpela tok” long not-buk, olsem ol i ken putim wanpela mak long pepa long olgeta taim ol i harim wanpela tok o nem ol i save long en.​​—⁠3/15, pes 17, 18.

• Pasin bilong Jop inap lainim yumi long wanem ol samting?

Jop i tingim pasin bilong pas gut wantaim God em i nambawan bikpela samting, na em i mekim pasin i stret long ol narapela man, na em i wok strong long stap gut long poroman marit bilong em, na em i tingim famili bilong em long ol samting bilong spirit, na taim ol traim i painim em, em i sanap strong na i stap gut long God.​​—⁠3/15, pes 25-​27.

• Sampela tok i stap hait namel long ol tok bilong Baibel na i kamapim as bilong sampela tok hait?

Nogat. Ol inap mekim dispela kain tok tu long sampela ol buk bilong graun. Long Baibel dispela kain samting i no gat wok long en, long wanem, i gat narapela narapela pasin bilong raitim ol tok long ol olpela rait bilong Baibel long tok Hibru.​​—⁠4/1, pes 30, 31.