Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• I gat wanem as na long nau tu yumi mas tingim gut ol askim i stap long Jop sapta 38?
Ol saientis long nau i hatwok long save gut long planti strongpela wok God i bin kamapim. Sampela strongpela wok em, olsem wanem graviti i helpim graun long wokabaut long hap stret bilong en, lait em i wanem samting tru, bilong wanem i gat kain kain snoflek, ren i kamap olsem wanem, na olsem wanem bikpela ren wantaim klaut i pairap i save kamapim bikpela strong.—4/15, pes 4-11.
• Wanem ol stori bilong Baibel inap helpim yumi long daunim bel hevi?
Asap, Baruk, na Naomi ol i bin bel hevi inap sampela taim. Stori bilong Baibel long pasin bilong ol long daunim dispela bel hevi em inap helpim yumi.—4/15, pes 22-24.
• Wanem sampela gutpela rot bilong helpim ol meri Kristen em man bilong ol i dai pinis?
Long gutpela pasin ol pren i ken tokaut klia olsem ol i laik helpim ol. Ol wanblut o sampela narapela ol i ken givim mani samting bilong helpim ol taim ol i sot tru. Ol wanbilip Kristen i ken helpim ol long rot bilong stap gutpela pren bilong ol, na helpim ol long ol samting bilong spirit na mekim gut bel bilong ol.—5/1, pes 5-7.
• I gat wanem as na em i bikpela samting long maritim “man i bilip long Bikpela,” olsem 1 Korin 7:39 i tok?
Planti taim marit bilong ol Kristen i maritim poroman i no bilip i save kamapim planti samting nogut. Na tu, bilong i stap gut long God Jehova, yumi mas bihainim dispela tok. Taim yumi bihainim Tok Bilong God, bel bilong yumi i no kotim yumi. (1 Jon 3:21, 22)—5/15, pes 20-21.
• Jehova tasol inap long lusim sin bilong yumi, olsem na bilong wanem ol Kristen i save autim ol bikpela rong long ol elda bilong kongrigesen?
Tru, Kristen i mas askim Jehova long lusim ol bikpela rong bilong em. (2 Samuel 12:13) Tasol wankain olsem profet Natan i bin helpim Devit, ol elda long kongrigesen inap helpim ol man i mekim rong na i hevi long rong ol i mekim. Taim ol Kristen i go lukim ol elda, ol i bihainim tok bilong Jems 5:14, 15.—6/1, pes 31.
• Wanem samting i kamapim klia olsem yumi mas lukautim ol pikinini i no gat papamama na ol meri em man bilong ol i dai pinis na ol i sot long ol samting?
Ol stori bilong ol samting i kamap bipo i soim olsem dispela pasin i olsem mak bilong lotu tru bilong ol Hibru bilong bipo na ol Kristen long taim bilong ol aposel. (Kisim Bek 22:22, 23; Galesia 2:9, 10; Jems 1:27) Long Baibel, aposel Pol i kamapim klia olsem ol Kristen i gat wok long lukautim ol meri em man bilong ol i dai pinis na ol i sot long ol samting. (1 Timoti 5:3-16)—6/15, pes 9-11.
• Wanem samting inap helpim yu long i stap amamas na mekim i stap bilong yu i gat as bilong en?
Yumi mas kisim pasin bilong pas gut wantaim Papa bilong yumi long heven, em Jehova, na mekim dispela pasin i kamap strong moa. Pasin bilong stadi long Baibel em i wanpela bikpela samting tru bilong helpim yumi long mekim olsem.—7/1, pes 4-5.
• Yu ting olgeta wan wan man i gat wanpela spirit i save stap yet taim man i dai pinis?
Tru, sampela man i ting olsem taim man i dai, spirit bilong em i no save dai, tasol Baibel i no mekim wanpela tok bilong helpim dispela tingting. Baibel i kamapim olsem taim man i dai, em i kamap das na em i pinis olgeta. Tasol God i gat strong long givim laip gen long em, olsem em inap long kirapim bek man i dai pinis na givim laip long em. (Saveman 12:7)—7/15, pes 3-6.
• Daniel i bin i stap we taim traim i painim tripela Hibru long ples stret bilong Dura?
Baibel i no mekim wanpela tok long dispela samting. Ating Daniel i no gat wok long i go long dispela hap, long wanem, em i holim bikpela namba o ating em i go mekim sampela wok long narapela hap. Tasol yumi ken bilip tru olsem em i bin sanap strong na stap gut long Jehova.—8/1, pes 31.