FRAN PES STORI | SAPOS YUMI DAI—YUMI INAP I STAP LAIP GEN?

Wanem Samting i Painim Ol Man i Dai Pinis?

Ol man na ol pikinini i sanap klostu long kofin long ples matmat

“Mi ting ol man i dai pinis bai go stap long 3-pela ples, em heven, helpaia na klinpaia. Mi pilim olsem mi no gutpela tumas bilong i go long heven, na mi no man nogut na bai mi go long hel. Mi no save long klinpaia i wanem kain ples. Na mi no ritim kain tok olsem long Baibel. Em ol stori ol man yet i kamapim.”—Lionel.

“Ol i skulim mi olsem olgeta man i dai pinis i save go long heven, tasol mi no bilipim dispela tok. Mi ting taim ol man i dai, ol i pinis olgeta.”—Fernando.

Olsem wanem? Yu gat ol kain askim olsem: ‘Wanem samting i save painim ol man i dai pinis? Ol man em yumi laikim tru i dai pinis i kisim pen na hevi long wanpela ples? Bai yumi bungim ol gen? Olsem wanem yumi inap save olsem ol dispela samting bai kamap tru?’ I gutpela yu ritim ol tok Baibel i kamapim. Pastaim, yumi laik save long Baibel i tok wanem long samting i painim ol man i dai pinis. Na bihain, bai yumi stori long ol gutpela samting bai painim ol.

Wanem samting i painim ol man i dai pinis?

BAIBEL I TOK: “Dok i gat laip i winim laion i dai pinis. Olsem tasol, ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol. Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”a—Saveman 9:4, 5, 10.

Matmat em ples ol man i dai pinis i save go stap long en. Dispela i no makim wanpela ples tru, tasol em i tok piksa bilong makim olsem long dispela hap ol man i no inap kisim save na mekim wok. Bilipman Jop i gat wanem tingting long Matmat? Long wanpela de tasol olgeta pikinini bilong en i dai, na tu, ol man i stilim olgeta kago bilong en. Na i no longtaim, em i kisim ol sua na dispela i givim bikpela pen long em. Olsem na em i tokim God: “I gutpela sapos yu haitim mi long ples bilong ol man i dai pinis, [“long hel,” Catholic Douay Version].” (Jop 1:13-19; 2:7; 14:13) I klia tru olsem Jop i no tingim matmat olsem ples paia we ol man i kisim bikpela pen na hevi, nogat. Em i tingim matmat olsem ples we man i kisim bel isi.

Na tu, i gat narapela rot we inap helpim yumi long kisim save long samting i save painim ol man i dai pinis. Yumi ken skelim ol stori Baibel i kamapim long 8-pela man husat i bin kirap bek.—Lukim blok “Baibel i Stori Long 8-pela Man i Bin Kirap Bek.”

Dispela 8-pela man i kirap bek i no bin stori olsem ol i go stap long wanpela gutpela ples o ples bilong karim pen. Sapos ol i bin go stap long kain ples olsem, ating ol bai stori long ol dispela samting, tasol Baibel i no mekim kain stori olsem. Na dispela i makim olsem taim ol i dai, ol i no save long wanpela samting. Sampela taim Baibel i tok piksa long man i dai pinis i kain olsem em i slip. Olsem, taim Lasarus i dai, Jisas i tok: “Pren bilong yumi Lasarus, em i slip. Tasol mi bai go long hap na kirapim em.”—Jon 11:11.

Wanem samting bai painim ol man i dai pinis? Yu ting ol bai kirap bek?

a Long Baibel New World Translation of the Holy Scriptures, ol i kolim dispela tok “Matmat” long tok Hibru olsem “Sheol,” na long tok Grik “Hades.” Long sampela Baibel ol i yusim tok “hel,” tasol Baibel i no tok em i wanpela ples paia we ol man i karim pen long taim ol i dai pinis.

BAIBEL I STORI LONG 8-PELA MAN I BIN KIRAP BEKb

Pikinini man bilong wido Profet Elaija i bin kirapim bek pikinini man bilong wanpela wido meri long Sarefat, long hap not bilong Israel.—1 King 17:17-24.

Wanpela mangi long taun Sunem Elaija em man i kisim ples bilong profet Elisa, i kirapim bek wanpela mangi long taun Sunem. Na Elaija i givim em bek long papamama bilong em.—2 King 4:32-37.

Bodi bilong wanpela man long ples matmat Ol man i tromoi bodi bilong wanpela man long hul we ol bun bilong Elisa i stap long en. Taim bodi bilong dispela man i pas long ol bun bilong Elisa, dispela man i kirap bek.—2 King 13:20, 21.

Pikinini man bilong wido meri long Nain Jisas i bungim sampela man i karim bodi bilong wanpela yangpela man i dai pinis. Na Jisas i sori tru long mama bilong dispela mangi, olsem na em i kirapim bek dispela mangi na givim em bek long mama bilong en.—Luk 7:11-15.

Pikinini meri bilong Jairus Jairus em wanpela hetman bilong sinagog, em i strong long askim Jisas long oraitim pikinini meri bilong em i sik. Taim Jisas i go kamap long haus bilong Jairus, liklik gel i dai pinis, tasol Jisas i kirapim em bek.—Luk 8:41, 42, 49-56.

Lasarus em gutpela pren bilong Jisas Maski Lasarus i dai na slip long matmat inap 4-pela de, Jisas i kirapim em bek long ai bilong planti manmeri.—Jon 11:38-44.

Dorkas Aposel Pita i kirapim bek dispela meri em planti man i laikim tru, long wanem, em i save mekim planti samting bilong helpim ol narapela.—Aposel 9:36-42.

Yutikus Yangpela man Yutikus i sindaun long windo long namba 3 plua bilong haus, na em i pundaun i go daun long graun na i dai. Tasol aposel Pol i kirapim em bek na em i stap laip gen.—Aposel 20:7-12.

b Nambawan kirap bek em kirap bek bilong Jisas Krais. Kirap bek bilong em i narapela kain long kirap bek bilong ol dispela 8-pela manmeri em yumi stori long en. Neks atikol bai stori long dispela.