BEKIM OL ASKIM BILONG BAIBEL
Yu ting yumi inap kisim stretpela save long God?
Bilong wanem God i laik yumi mas save long tok i tru? Ritim Jon 17:3
Baibel i helpim yumi long save long God. Long rot bilong holi spirit, God i stiaim ol man bilong raitim Baibel long kamapim ol tingting na pasin bilong Em. (2 Pita 1:20, 21) Yumi inap kisim stretpela save long God taim yumi ritim Baibel.—Ritim Jon 17:17; 2 Timoti 3:16.
Long Baibel, God i kamapim tingting na pasin bilong en. Em i tokaut long risen em i wokim ol man, samting em i tingting pinis long mekim bilong helpim yumi, na ol pasin em i laik yumi mas bihainim long i stap bilong yumi. (Aposel 17:24-27) God Jehova i laik bai yumi kisim stretpela save long tok i tru.—Ritim 1 Timoti 2:3, 4.
Bilong wanem God i amamas long ol man i laikim tok i tru?
Jehova em i God bilong tok i tru, na em i bin salim Pikinini bilong em Jisas long skulim ol man long tok i tru. Olsem na ol man i laikim tok i tru, ol i save wok strong long bihainim pasin bilong Jisas. (Jon 18:37) God i laik bai ol dispela man i lotuim em.—Ritim Jon 4:23, 24.
Tasol Satan i pasim tingting bilong planti man, olsem na ol i no kisim stretpela save long God. (2 Korin 4:3, 4) Ol man i no laikim tok i tru i amamas long harim ol tok giaman bilong Satan. (Rom 1:25) Tasol planti milion man i gat gutpela bel i stadi long Baibel na ol i kisim save long tok i tru long God.—Ritim Aposel 17:11.