Tok Bilong Baibel Long Laip na Dai

Taim yumi ritim stori bilong Buk Stat long Baibel long olsem wanem God i wokim ol samting, yumi kisim save long tok em i givim long namba 1 man, Adam. God i tok: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:16, 17) Dispela tok i soim olsem sapos Adam i bihainim lo bilong God, em i no inap i dai, nogat, em bai stap laip yet long gaden Iden.

Sori tru olsem Adam i sakim tok bilong God, na em i kaikai prut tambu em Iv i givim long em. (Stat 3:1-6) Long nau, yumi karim yet ol hevi i kamap long pasin bikhet bilong Adam. Aposel Pol i tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Dispela “wanpela man” em Adam. Em i mekim wanem sin? Bilong wanem sin i bringim dai i kam?

Taim Adam i sakim tok na brukim lo bilong God, em i mekim sin. (1 Jon 3:4) Pe bilong sin em dai, olsem God i bin tokim Adam. Sapos Adam—na ol tumbuna pikinini bilong em i kamap bihain—i bihainim lo bilong God, ol bai i no gat sin na ol bai i no inap i dai. God i no wokim ol man bilong i stap sotpela taim na i dai, nogat—em i wokim ol bilong i stap laip inap oltaim oltaim.

Baibel i tok “dai i painim olgeta manmeri.” Tasol taim yumi dai, yu ting sampela hap bilong bodi inap i stap laip yet? Planti man bai tok olsem wanpela hap bilong yumi—ol i kolim soul—em i no save dai. Sapos dispela tok em tru, dispela i makim olsem God i giamanim Adam. Bilong wanem yumi tok olsem? Sapos wanpela hap bilong bodi i stap laip yet long narapela ples, dispela bai makim olsem dai i no pe bilong sin olsem God i bin tok. Baibel i tok: “God i no inap giaman.” (Hibru 6:18) Satan yet i giaman taim em i tokim Iv olsem: “Yutupela i no inap i dai.”—Stat 3:4.

Sapos dispela tok olsem man i gat soul i no save dai em wanpela tok giaman, orait yumi laik save, wanem samting tru i save painim man taim em i dai?

BAIBEL I MEKIM OL SAMTING I KAMAP STRET

Buk Stat i stori olsem: “God, Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” Dispela tok, “man i kisim laip,” i kam long tok Hibru ne’phesh,a na mining bilong en i olsem, “samting i save pulim win.”—Stat 2:7.

Baibel i kamapim klia olsem taim God i wokim ol man, em i no givim ol wanpela soul i no save dai, nogat. Olgeta wan wan em ol “man i kisim laip.” Olsem na i no gat wanpela hap bilong Baibel i gat dispela tok, “soul i no save dai.”

Baibel i no tok ol man i gat wanpela soul i no save dai. Olsem na bilong wanem planti lotu i skulim ol man olsem yumi gat wanpela soul i no save dai? Bilong kisim bekim bilong dispela askim, yumi mas kisim save long histori bilong ol Isip bilong bipo.

BILIP HAIDEN I KAMAP BIKPELA

Herodotus em wanpela saveman bilong Grik long ol yia bihain long 500 B.C.E., na em i tok lain Isip em ol “fes lain long sambai long dispela bilip olsem ol man i gat soul i no save dai.” Lain Babilon bilong bipo tu i holim dispela bilip olsem ol man i gat soul i no save dai. Taim Bikpela King Aleksander i daunim na kisim Midel Is long 332 B.C.E., ol saveman bilong Grik i sapotim dispela bilip na i no longtaim planti manmeri long ol hap em Gavman Grik i bosim i save long dispela bilip.

Long taim bilong ol aposel, lain Esin na lain Farisi em tupela lain husat i gat biknem namel long ol lain Juda. Ol i skulim ol man olsem ol man i gat wanpela soul i no save dai. The Jewish Encyclopedia i tok: “Ol Juda i kisim tingting olsem ol man i gat wanpela soul i no save dai, taim ol i bung wantaim lain Grik na kisim skul bilong Plato.” Long taim bilong ol aposel, saveman Josifas bilong ol Juda i tok dispela bilip i no kam long Ol Rait Holi, nogat, em i kam long “bilip bilong ol pikinini man bilong Grik,” na em i tingim dispela olsem ol stori nating bilong ol lain tumbuna bilong ol.

Planti manmeri i kirap long bihainim tingting na pasin bilong ol Grik, olsem na ol man i tok ol i Kristen, ol tu i kisim dispela bilip bilong ol haiden. Jona Lendering em wanpela saveman bilong histori, na em i tok: “Plato i skulim ol man olsem, pastaim soul bilong man i stap long wanpela gutpela ples na nau em i stap long ples i gat hevi, olsem na ol Kristen i bungim dispela tingting wantaim bilip bilong ol.” Long dispela rot, bilip haiden i kamap bikpela bilip bilong ol man i tok ol i Kristen.

“TOK I TRU BAI MEKIM YUPELA I KAMAP FRI”

Aposel Pol i tok lukaut olsem: “Holi spirit i tok klia olsem, long bihain bai i gat haptaim we sampela man bai lusim bilip. Ol bai putim yau long ol tok giaman i kam long ol spirit na long skul i kam long ol spirit nogut.” (1 Timoti 4:1) Dispela tok i kamap tru! Dispela bilip olsem ol man i gat soul i no save dai em wanpela “skul i kam long ol spirit nogut.” Baibel i no sapotim dispela bilip. Ol lotu haiden bilong bipo na tingting bilong ol saveman i as bilong dispela bilip.

Jisas i tok: “Yupela bai save long tok i tru, na tok i tru bai mekim yupela i kamap fri.” (Jon 8:32) Yumi kisim stretpela save long tok i tru bilong Baibel, olsem na yumi stap fri na yumi no kalabus long ol bilip na ol pasin em planti lotu i bihainim na dispela i no givim biknem long God. Na tu, Tok Bilong God i opim rot na yumi no stap kalabus long ol bilip giaman na ol pasin tumbuna we i sapotim bilip giaman olsem yumi gat soul i no save dai.—Lukim blok “Ol Daiman i Stap We?”

Krieta bilong yumi i no plen long ol man bai stap 70 o 80 yia long graun na bihain ol i go stap long narapela ples inap oltaim oltaim, nogat. Taim God i wokim ol man long namba 1 taim, em i laik bai ol i stap oltaim long dispela graun olsem ol pikinini bilong em na bihainim tok bilong em. Dispela laik bilong God i soim klia olsem em i laikim tru ol man, na laik bilong em i no inap senis. (Malakai 3:6) Man bilong raitim song i tok: “Ol stretpela man bai i kisim graun God i givim ol, na bai ol i stap oltaim long en.”—Song 37:29.